މާފަންނު މ. ނިރުފެހިގައި ހިންގާ ގަރާޖެއްގައި ރޭ ދަންވަރު ހިނގި އަލިފާނުގެ ހާދިސާ ހިނގި އިމާރާތުން 28 ބިދޭސީއަކު ސަލާމަތް ކޮށްފައިވާކަމުގައި ނޭޝަނަލް ޑިސާސްޓަރ މެނޭޖްމަންޓް އޮތޯރިޓީން ހާމަ ކޮށްފިއެވެ.

ރޭ ހިނގި، 10 މީހުން މަރުވެފައިވާ މި ހިތާމަވެރި ހާދިސާއާއި ގުޅިގެން އެންޑީއެމްއޭއިން ކުރަމުންދާ މަސައްކަތަކާ ގުޅޭގޮތުން އެ އޭޖެންސީން ހާމަކުރި މައުލޫމާތުގައިވާ ގޮތުން، އަލިފާނުގެ ހާދިސާގެ އަސަރު ކޮށްގެން 4 އިމާރާތަކުން 35 ދިވެހިންނާއި، ހާދިސާ ހިގި އިމާރާތުން ސަލާމަތްކުރެވުނު 28 ބިދޭސީން ހިމެނޭހެން 33 ބިދޭސީއަކު މިހާރުވަނީ އެ އޮތޯރިޓީގައި ރަޖިސްޓްރީ ކޮށްފައެވެ. މީގެ ތެރެގައި 7 ކުޑަކުއްޖަކު ހިމެނެއެވެ.

އެންޑީއެމްއޭއިން ބުނެފައިވަނީ، ރޭގެ ހިނގި، 10 މީހުން މަރުވެފައިވާ މި ހިތާމަވެރި ހާދިސާއާއި ގުޅިގެން، 5 ފިރިހެނުންނާއި 10 އަންހެނުން ހިމެނޭގޮތަށް އެކުޖުމްލަ 15 ދިވެއްސަކާއި، 8 ފިރިހެނުންނާއި 6 އަންހެނުން ހިމެނޭގޮތަށް 14 ބިދޭސީންނަށް މިހާތަނަށް ވަގުތީ ބޯހިޔާވަހިކަން ފޯރުކޮށް ދީފައިވާ ކަމުގައެވެ.

އެންޑީއެމްއޭއިން ހާމަކޮށްފައިވާ ގޮތުގައި، މިހާދިސާގައި ބޯހިޔާވަހިކަން ގެއްލިފައިވާ 19 ބިދޭސީންނަށް އެފަރާތްތަކުގެ ބަލަދުވެރިން ބޯހިޔާވަހިކަން ފޯރުކޮށްދީފައިވާ ކަމުގައެވެ.

އަދި އޭގެ އިތުރުން ނަފްސާނީ ފުރަތަމަ އެހީތެރިކަން ބޭނުންވާ ފަރާތްތައް ދެނެގަނެ އެފަރާތްތަކަށް ދިވެހި ރެޑްކްރެސެންޓާއި މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސާރވިސަސްގެ އެހީތެރިކަމާއެކު ނަފްސާނީ ފުރަތަމަ އެހީ ފޯރުކޮށްދެމުން ދާކަމަށާއި، އަލިފާނުގެ ހާދިސާގައި އަސަރު ކޮށްފައިވާ ގޭގޭގެ ޑެމޭޖް އެސެސްމަންޓް ހެދުމާއި ވަގުތީ ހިޔާތަކުގައި ދިރިއުޅެމުންދާ ފަރާތްތަކުގެ ހާލަތު ގާތުން މޮނިޓަރކޮށް، އެފަރާތްތަކަށް ބޭނުންވާ އިތުރު އެހީތެރިކަން ފޯރުކޮށްދިނުމުގެ މަސައްކަތް ކުރިޔަށްދާކަމަށްވެސް ޑިސާސްޓަރ މެނޭޖްމަންޓް އޮތޯރިޓީން ހާމަ ކޮށްފައި ވެއެވެ.

ފަހުގެ ތާރީޚެއްގައި މާލޭގައި ހިގާފައިވާ އެންމެ ނުރައްކާތެރި އަލިފާނުގެ ހާދިސާއާއި ގުޅިގެން އެންޑީއެމްއޭއިން ކުރަމުންދާ މަސައްކަތަކާ ގުޅޭގޮތުން އެ އޭޖެންސީން ހާމަކުރި މައުލޫމާތުގައިވާ ގޮތުން، މި ހާދިސާގައި ހާލުގައިޖެހުނު ފަރާތްތަކަށް އިންސާނީ އެހީގެ ގޮތުގައި ފުރަތަމަ ފޭސްގެ 5 ދުވަހަށް، ބޯހިޔާވަހިކަމަށް 33،500ރ، އަންނައުނު ނެތް ފަރާތްތަކަށް އަންނައުނު ހޯދުމަށް 19،000ރ، ކެއިންބުއިމަށް 29،000ރ، އަދި ހައިޖީން ކިޓު ހޯދުމާއި އޮޕަރޭޝަނަލް ޚަރަދުގެ ގޮތުގައި 2،633ރ އާއެކު ޖުމްލަ 90،133 ރުފިޔާ މިހާތަނަށް އެ އޮތޯރިޓީންވަނީ ޚަރަދު ކޮށްފައެވެ.

ގަރާޖެއްގައި ރޯވެގެން ރޭ ހިގި މި އަލިފާނުގެ ހާދިސާއަކީ ފަހުގެ ތާރީޚެއްގައި މާލޭގައި ހިގާފައިވާ އެންމެ ހިތާމަވެރި ހާދިސާއެއްވެ. މިފަދަ ކާރިސާއެއްގައި ސުނާމީ ކާރިސާއަށްފަހު ރާއްޖޭގައި އެއްފަހަރާ އެންމެ ގިނައިން މީހުން މަރުވި ހާދިސާވެސްމެއެވެ.

މިހާދިސާގައި 10 މީހަކު ވަރުވެފައިވާކަން މިހާރު ކަށަވަރު ކުރެވިފައިވީ ނަމަވެސް، މަރުވި މީހުންގެ އަދަދު އިތުރުވުމަކީ އެކަށީގެންވާކަމެއް ކަމަށް ބެލެވެއެވެ. އަދި ފުލުހުން މިހާރުވެސް ދަނީ ގެއްލިފައިވާ ބައެއް މީހުން ހޯދަމުންނެވެ. މިގޮތުން ފުލުހުންވަނީ މާލެ ސަރަހައްދުގައި ދިރިއުޅޭ ބިދޭސީންގެ ތެރެއިން ރެއިން ފެށިގެން އެއްވެސް ޚަބަރެއް ނުވާ ބިދޭސީން މަޢުލޫމާތު ވީހާވެސް އަވަހަކަށް ފުލުހުންނަށް ފޯރުކޮށްދިނުމަށް އެދިފައެވެ. މިހާދިސާގައި މަރުވެފައިވަނީ މުޅިންވެސް ބިދޭސީންނެވެ. އޭގެ ތެރޭގައި ގިނައީ އިންޑިއާ މީހުންނެވެ.

މައުލޫމާތު ލިބިފައިވާ ގޮތުގައި ރޭގެ ހާދިސާގައި މަރުވި ބައެއް މީހުންގެ ހަށިގަޑުތައްވަނީ ވަކިކުރަން ނޭގޭވަަރަށް އަދާފައެވެ. މަރުވި މީހުންނަކީ ކޮންބައެއްކަން ދެނެގަތުމުގެ މަސައްކަތް ފުލުހުން މިހާރުވެސް ދަނީ ކުރަމުންނެވެ.