މާލޭގެ 18 ކެމިކަލް ވެއަރހައުސް ހުރިކަމަށް އެޗްޑިސީން މައުލޫމާތު ދިންކަމަށް ބުނެ ބައެއް މީޑިއާތަކުގައި ރިޕޯޓު ކޮށްފައިވާ ޚަބަރަކީ ސައްޙަ މައުލޫމާތެއް ނޫންކަމަށް އެ ކުންފުނިން ބުނެފިއެވެ.
އެޗްޑީސީން ނެރުނު ނޫސް ބަޔާނެއްގައި ބުނެފައިވަނީ، މާލޭގައި މިވަގުތު 18 ކެމިކަލް ވެއާރ ހައުސްއެއް ހުރިކަމަށް ބުނެ ލިޔެފައިވާ ހަބަރަކީ އެއްވެސް ސައްޙަ މަޢޫލޫމާތަކަށް ބިނާކޮށް ގެނެސްދީފައިވާ ހަބަރެއް ނޫންކަމުގައެވެ.
މިގޮތުން، މިވަގުތު ތިލަފުށީގައި 34 ކެމިކަލް ވެއަރ ހައުސްއެއް ޤާއިމު ކުރެވިފައިވާ ވާހަކަ އާއި އަދި އިތުރު 18 ވެއާރ ހައުސްއެއް ޤާއިމު ކުރުމުގެ މަސައްކަތް ކުރެވެމުންދާ ކަމުގައި މީޑިއާތަކަށް މައުލޫމާތު ދީފައިވާނެކަމަށް ނޫސްބަޔާނުގައި ފާހަގަ ކުރައްވާފައި ވެއެވެ.
އެޗްޑީސީން ބުނެފައިވަނީ، އެއްވެސް ހާލަތެއްގައި މި 18 ވެއާރ ހައުސްތަކަކީ މިވަގުތު މާލޭގައި ހުރި ތަންތަން ބަދުލު ކުރުމަށް ކުރެވޭ މަސައްކަތެއް ކަމުގައިވެސް އެކުންފުނިން މަޢޫލޫމާތު ދީފައި ނުވާނެ ކަމުގައެވެ. އެހެންކަމުން މިކަހަލަ ހައްސާސް ދަނޑިވަޅެއްގައި އާއްމުންގެ މެދުގައި ބިރުވެރިކަން އުފެދޭގޮތަށާއި ޒިންމާދާރުކަން ކުޑަ ގޮތަކަށް ހަބަރު ފަތުރާ ފަރާތްތަކުން ހަބަރުތައް ގެނެސް ދިނުމަކީ އެ ކުންފުނިން ނުހަނު ހިތާމަ ކުރާކަމެއް ކަމުގައި އެޗްޑީސީން ނެރެފައިވާ ނޫސް ބަޔާނުގައި ބުނެފައިވެއެވެ.
މާފަންނު ސެންޑްރޯސް ގޭގައި ހިންގާ ގަރާޖެއްގައި ރޭ ދަންވަރު ހިނގި އަލިފާނުގެ ހާދިސާގައި 11 މީހަކު މަރުވުމާއި ގުޅިގެން، މާލޭގެ ތޮއްޖެހުމާއި، އަދި މާލޭގެ މީހުން ދިރިއުޅޭ ތަންތަނުގައި ގަރާޖްފަދަ ތަންތަން ހުރުމުގެ ކަންބޮޑުވުން އަނެއްކާވެސް އާންމުންވަނީ ފާޅުކުރާން ފަށާފައެވެ.
އެހެންނަަވެސް ރައީސް އޮފީހުން ވިދާޅުވެފައިވަނީ، މިހާރު މާލޭގައި މިހާރު ކެމިކަލް ގުދަންތައް ނުހުންނާނެ ކަމުގައެވެ. ރައީސް އޮފީހުގެ ތަރުޖަމާން މިއުވާން ވިދާޅުވެފައިވަނީ، މާލޭގައި ހިންގާ ކެމިކަލް ގުދަންތައް ތިލަފުއްޓަށް ބަދަލުކުރަން ފެށި މަސައްކަތަށް ކަނޑައެޅި ތާރީހުގައި ކޮށް ނިންމާފައިވާ ކަމަށެވެ.
އަދި މާލޭގައި ގެންގުޅެން ރާއްޖެއަށް ކެމިކަލް އެތެރެ ކުރުމަށް މިހާރު ހުއްދަ ނުދޭނެކަމަށްވެސް އޭވާ ވިދާޅުވެފައި ވެއެވެ. 2019ވަނަ އަހަރު މާލޭގައި ހިނގި އަލިފާނުގެ ބޮޑު ހާދިސާއަކަށްފަހު ސަރުކާރުންވަނީ ކެމިކަލް ގެންގުޅޭ ތަންތަން ތިލަފުށީގައި ހަދަންޖެހޭގޮތަށް ކަޑައަޅާފައެވެ.
