ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ މެމްބަރުކަމުން ވަކިކުރުމަށް ސްޕްރީމް ކޯޓަށް ހުށަހެޅި މައްސަލައިގެ އަޑީގައި އޮތީ ސަރުކާރުކަމަށް ރައީސް ނަޝީދުގެ އަރިސް ބޭފުޅެއްކަމަށްވާ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ހަސަން މިހެން ވިދާޅުވީ ސިޔާސީ ގޮތުން ރައީސް ނަޝީދާއި، ރައީސް ޞާލިހުގެ މެދުގައޮ އޮތް ވާދަވެރިކަން ބޮޑުވެ ކުރިއަށް އޮތް ރިޔާސީ އިންތިޚާބުގައި ރައީސް ޞާލިހަށް ތާއީދު ނުކުރާނެކަން ރައީސް ނަޝީދު ހާމަކުރެއްވިތާ ގިނަ ދުވަސްތަކެއްނުވެ ރައީސް ނަޝީދު މަޖިލީހުގެ މެމްބަރުކަމުގެ މަޤާމުން ވަކިކުރުމަށް ސްޕްރީމް ކޯޓަށް ހުށަހެޅި މައްސަލައަކާއި ގުޅިގެންނެވެ.
ސުޕްރީމް ކޯޓަށް މިއަދު އެ މައްސަލަ ހުށަހެޅުއްވީ ގާނޫނީ ވަކީލު އަހުމަދު ތާލިބެވެ. އޭނާ އެ މައްސަލަ ހުށަހެޅުއްވީ މިސްރުގައި މިހާރު ކުރިއަށްދާ ކޮޕް-27 ސަމިޓްގައި ނަޝީދު، ސްރީ ލަންކާ ތަމްސީލުކުރައްވާތީވެއެވެ.
މިމައްސަލައާއިމެދު ދެކެވަޑައިގަންނަވާ ގޮތް ހާމަކުރައްވަމުން ހަސަން ލަތީފް ވިދާޅުވީ މިމައްސަލައަކީ ޤާނޫނީ އެއްވެސް އަސާސެއް ނެތްމައްސަލައެއް ނަމަވެސް މިމައްސަލަ ކޯޓަށް ވެއްދުމުގެ އަޑީގައި އޮތީ ސަރުކާރުކަމަށެވެ. އޭނާ ވިދާޅުވީ މަޖިލިސް ތެރެއިން ރައީސް ނަޝީދު މަޤާމުން ވަކިކުރުމަށް ކުރި މަަސައްކަތް ކާމިޔާބު ނުވާނެކަން އެގުމުން މިހާރު މަސައްކަތް ކުރަމުންދަނީ ރައީސް ނަޝީދު މަޤާމު ކޯޓު މެދުވެރިކޮށް ރައީސް ނަޝީދު މަޤާމުން ވަކިކުރުމަށް ކަމަށެވެ.
ރައީސް މުހައްމަދު ނަޝީދު ވަކި ކުރަން މަޖިލީހުން އަދަދު ނުލިބުނީމާ މިހާރު އެމަސައްކަތް ފެށީ ކޯޓު މެދުވެރިކޮށް ރައީސް ނަޝީދު ވަކި ކުރެވޭތޯ. އަޅުގަނޑު ގަބޫލުކުރަނީ މިކަމުގައި ޤާނޫނީ އަސާސެއް ނެތަސް މިކަމުގެ އަޑީގައި އޮތީ ސަރުކާރުކަމަށް.
– ހަސަން ލަތީފް ވިދާޅުވިއެވެ.
ރައީސް ނަޝީދު މަޖިލީހުގެ ރައީސްކަމުގެ މަޤާމުން ވަކިކުރުމަށް މަޖިލީހުގެ މިއަހަރުގެ ދެވަނަ ދައުރުގެ ޗުއްޓީގައި އޮއްވައި ރައީސް ޞާލިހަށް ތާއީދު ކުރައްވާ މެމްބަރުން މަސައްކަތް ކޮށްފައިވެއެވެ. ނަމަވެސް އެމްޑީޕީގެ ކޮންގްރެސްއަށްފަހު ރައީސް ޞާލިހާއި، ރައީސް ނަޝީދު ބައެއް ކަންކަމުގައި އެއްގަލަކަށް އެރުމުން މިމަސައްކަތް އޮތީ ހުއްޓިފައެވެ.
ރައީސް ނަޝީދާއި ރައީސް ޞާލިހުގެ ވާދަވެރިކަން ބޮޑުވެފައިވަނީ ކުރިއަށް އޮތް ރިޔާސީ އިންތިޚާބާއި ދިމާކޮށް އުފެދިފައިވާ ޚިޔާލު ތަފާތުވުންތަކާއި ގުޅިގެންނެވެ.
