ގދ.ހޯނޑެއްދޫގައި ފުލުހުން ހިންގާ ޑްރަގް އޮޕަރޭޝަންގައި އިތުރު 69 ކިލޯގެ ޑްރަގް ހޮދައިފިއެވެ. މިއާއެކު އެރަށުން ހޮދި ޑްރަގްގެ ބަރުދަން ވަނީ 82 ކިލޯއަށް އަރާފައެވެ.
މިކަން ހާމަކުރައްވާ ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، ހޯނޑެއްދޫ އޮޕަރޭޝަންގެ ތެރެއިން ހޮދި 69 ކިލޯގެ ޑްރަގް ހޯދާފައިވަނީ، ހޯނޑެއްދުއާއި އަދި އެ ސަރަޙައްދުގެ ފަޅު ރަށެއްގައި ވަޅުލާފައި ހުއްޓައިކަމަށެވެ. ސީޕީ ހަމީދު ވަނީ ފުލުހުން ކުރި ކާމިޔާބީ މަސައްކަތެއްގެ ގޮތުގައި ސިފަކުރައްވާފައެވެ.
Apart from 13 kgs of heroin our teams found buried in G.DH Hoadehdhoo on 27/10, @PoliceMv teams have done commendable work to find 69 kgs of narcotic drugs buried in G.DH Hoadehdhoo and a close by uninhabited island today. Taking it to a total 82 kgs of both meth & heroin. pic.twitter.com/ZZCLL0QxXW
— Mohamed Hameed (@M_Hameedh) November 2, 2022
ފުލުހުން ހިންގާ މި އޮޕަރޭޝަންގައި ފުރަތަމަ މަސްތުވާތަކެތި ހޯދީ މިދިޔަ މަހުގެ 27 ވަނަ ދުވަހުއެވެ. މި އޮޕަރޭޝަންގ ހިންގިއިރު، ޑްރަގްގެ ބޮޑު ތުހުމަތެއް ކުރެވޭ އަރުޝަދު ޚާލިދުވެސް ހައްޔަރުކުރިއެވެ. ނަމަވެސް މިހާރު ކޯޓުން އޭނާ ވަނީ މިނިވަންކޮށްފައެވެ.
މީގެ އިތުރުން ފުލުހުންގެ ބެލުމުގެ ދަށަށް ގެންދިޔަ ޢަބްދުﷲ ރަޝީދު ފުލުހުންގެ ބެލުމުގެ ދަށުގައި ހުއްޓާ ވަނީ ނިޔާވެފައެވެ. ނަމަވެސް ސީދާ މި އޮޕަރޭޝަނާއި އެމީހުންނާ ގުޅޭކަން ފުލުހުން ހާމަކޮށްފައެއް ނުވެއެވެ. މި މައްސަލަ ޑްރަގް އެންފޯސްމަންޓުން ގެންދަނީ ތަހުގީގު ކުރަމުން ދާކަމަށާއި، އަދި މި އޮޕަރޭޝަންގެ ތެރެއިން، ކޯޓު އަމުރުގެ ދަށުން އިތުރު ތަންތަން ބަލައިފާސްކުރުމުގެ މަސައްކަތް ފުލުހުންދަނީ ކުރަމުން ކަމަށް ފުލުހުން ވަނީ ބުނެފައެވެ.
