ޔުރޮޕާ ލީގުގައި ކްރިސްޓިއާނޯ ރޮނާލްޑޯގެ ގޯލާއިއެކު މޯލްޑޮވާގެ ޝެރިފް ޓިރަސްޕޯލް އަތުން 3-0 އިން މެންޗެސްޓާ ޔުނައިޓެޑް މޮޅުވެއްޖެއެވެ.
މިދިޔަ ހަފުތާގައި ޕްރިމިއާ ލީގު މެޗެއްގައި ކުޅެން އަރަން ދެކޮޅު ހެދުމުން ދިން އަދަބުން ސަލާމަތްވެ އެނބުރި އައިސް ރޭ ކުޅުނު މެޗުގައި ރޮނާލްޑޯގެ ފަރާތުން މޮޅު ކުޅުމެއް ވަނީ ފެނިގެން ގޮސްފައެވެ.
މެޗުގައި ޔުނައިޓެޑްގެ ފުރަތަމަ ގޯލް ފުރަތަމަ ހާފްގެ ފަހު މިނެޓުގައި ޖެހީ ޑިއޮގޯ ޑަލޮޓްއެވެ. ދެވަނަ ލަނޑު ރަޝްފޯޑް ޖެހީ 65 ވަނަ މިނެޓުގައެވެ. އޭނާ ކުޅެން ނުކުތީ ދެވަނަ ހާފްގެ ފުރަތަމަ މިނެޓުގައެވެ. ރޮނަލްޑޯ ލަނޑު ޖެހީ 81 ވަނަ މިނެޓުގައެވެ. މިއީ ޕްރިމިއަރ ލީގުގައި ޓޮޓެންހަމް އަތުން ޔުނައިޓެޑް މޮޅުވި މެޗުގައި ބަދަލެއްގެ ގޮތުގައި ކުޅެން ނުކުންނަން އިންކާރުކުރުމަށްފަހު, މެޗު ނުނިމެނީސް ބެންޗު ދޫކޮށް ދިއުމުން ދިން އެއް މެޗުގެ ސަސްޕެންޝަނަށްފަހު ރޮނަލްޑޯ އެނބުރި އައިމެޗެވެ.
ޔުނައިޓެޑްގެ ކޯޗު އެރިކް ޓެން ހާގު ރޮނަލްޑޯ ސްކޮޑްގައި ނުހިމަނާ ދޫކޮށްލީ ލީގުގައި ޗެލްސީއާ ވާދަކުރި މެޗުގައެވެ. އެކަމަކު ޝެރިފް އަތުން މޮޅުވި މެޗުގައި ކޯޗު ވަނީ ރޮނަލްޑޯ ފުރަތަމަ އެގާރައިގަ ހިމަނާފައެވެ.
މި ނަތީޖާއާ އެކު ޔުނައިޓެޑަށް ވަނީ ގްރޫޕުގެ ގަދަ ދެ ޓީމުގެ ތެރޭ ހިމެނޭނެކަން ކަށަވަރުވެ އަނެއް ބުރުން ޖާގައެއް ލިބިފައެވެ. އެއް ވަނަ ހޯދައިފި ނަމަ އެ ޓީމަށް ގަދަ 16 ޓީމުގެ ބުރުން ފުރުސަތު ލިބޭނެއެވެ. ދެ ވަނަ އަށް ގޮސްފި ނަމަ ޖެހޭނީ އޭގެ ކުރިން ޕްލޭއޮފް ބުރެއް ކުޅޭށެވެ. މި ގްރޫޕުގެ އެއް ވަނަ ކަށަވަރުވާނީ އަންނަ ބުރާސްފަތި ދުވަހުގެރޭ ޔުނައިޓެޑާއި ސްޕެއިނުގެ ރެއާލް ސޮސިއެޑާ ކުޅޭ މެޗުންނެވެ.
މި ވަގުތު 15 ޕޮއިންޓާ އެކު އެއް ވަނައިގައި އޮތީ ސޮސިއެޑާޑެވެ. ޔުނައިޓެޑް އޮތީ 12 ޕޮއިންޓާ އެކު ދެ ވަނައިގައެވެ. ޝެރިފް ތިން ޕޮއިންޓާ އެކު ތިން ވަނައިގައި އޮތްއިރު ފުލުގައި ޕޮއިންޓެއް ނުލިބި އޮތީ ސައިޕްރަސްގެ އޮމޯނިއާއެވެ.
