އަންގާރަ ދުވަހު ފުލުހުންގެ ބެލުމުގެ ދަށުގައި ހުއްޓާ ނިޔާވި ގދ.ހޯޑެއްދޫ ސްވެން، ރަޝީދުގެ މަރުގެ މައްސަލަ ނޭޝަނަލް އިންޓަރގްރިޓީ ކޮމިޝަނުން އިސްނަގައިގެން ހިންގާ ޖިނާއީ ތަޙްޤީގަށް ފުލުހުންގެ ފުރިހަމަ އެއްބާރުލުން ދޭނެކަމަށް ކަމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ސީޕީ ހަމީދު މިއަދު ކުރެއްވި ޓުވީޓުގައި ވިދާޅުވީ މަސްތުވާތަކެތި ރާއްޖެ އެތެރެކުރިކަމުގެ ތުހުމަތަށް ހައްޔަރުކުރެވުނު ގދ. ހޯޑެއްދޫ، ސްވެން ރަޝީދު ފުލުހުންގެ ހައްޔަރަށް ގެނެވިފައިހުއްޓާ ނިޔާވުން އެއީ ވަރަށް ހިތާމަވެރިކަމެއް ކަމަށެވެ. މިމަރުގައި ފުލުހުންގެ އިހުމާލެއް އޮތްތޯބެލުމަށް ހިންގާ ތަހުގީގަށް ފުރިހަމަ އެއްބާރުލުން ދެވޭނެކަމަށް ސީޕީ ވަނީ ވިދާޅުވެފައެވެ.
މިމައްސަލައާއި ގުޅިގެން ހައްޔަރުކުރެވުނު އެހެން ފަރާތެއް ގދ. ހޯޑެއްދޫ ވަލުތެރޭގައި ވަޅުލައި ފޮރުވާފައިހުރި ގިނައަދަދެއްގެ މަސްތުވާތަކެތި ފުލުހުންގެ ޓީމުންވަނީ ހޯދާފައިވާ ކަމަށާއި، ގދ. ހޯޑެއްދޫގެ އެހެނިހެން ތަންތަން ކުރިއަށް އޮތްވަގުތުތަކުގައި ފުލުހުން ބަލާފާސްކުރާނެ ކަމަށް ސީޕީ ވަނީ ވިދާޅުވެފައެވެ.
ރަޝީދު ނިޔާވެފައިވަނީ ފުލުހުންގެ ބެލުމުގެ ދަށުގައި ހުއްޓާ އޭނާގެ މެއަށް ތަދެއް އަރައި ސީޒަރގެ ޢަލާމާތްތަކެއް ފެނުމާއި ގުޅިގެން އޭނާ ގދ.މަޑަވެލި ސިއްޙީ މަރުކަޒަށް ގެންދިޔަ މަގުމަތީގައިކަމަށް ފުލުހުންވަނީ މީގެކުރިން ވިދާޅުވެފައެވެ. އަދި އޭނާ ސިއްޙީ މަރުކަޒަށް ގެންދިޔައިރުވެސް ނިޔާވެފައިވާކަމަށް މަޑަވެލި ސިއްޙީ މަރުކަޒުން އޭނާ ބެއްލެވި ޑޮކްޓަރުންނާއި ޙަވާލާދީ ފުލުހުން އޭރުވަނީ ވިދާޅުވެފައެވެ.
ފުލުހުން ޤާނޫނާއި ގަވާއިދާ ޚިލާފުވެއްޖެނަމަ އެމައްސަލަ ބެލުމުގެ ޤާނޫނީ ބާރު ނޭޝަނަލް އިންޓަރގްރިޓީ ކޮމިޝަނަށް ލިބިގެންވެއެވެ. އެންއައިސީގެ އިތުރުން މިމައްސަލަ ބެލުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިންވެސް އަންނަނީ ޙަރަކާތްތެރިވަމުންނެވެ. މިމައްސަލައިގައި ފުލުހުންގެ އިހުމާލެއް ވާނަ މުވަތަ އަނިޔާވެރިވެފައިވާކަމަށް ތަޙުގީގަށް ސާބިތުވެއްޖެނަމަ މިމައްސަލައިގައި ހިމެނޭ ފުލުހުންނާއި މެދު ފިޔަވަޅު އަޅުއްވާނެކަމަށް ހޯމް މިނިސްޓަރ ޢިމްރާންވަނީ ވިދާޅުވެފައެވެ.
ރަޝީދުގެ ޕޯސްޓްމޯޓަމް ހެދުމަށް އިންޓަރގްރިޓީ ކޮމިޝަނުން ނިންމި ނަމަވެސް އާއިލާއިން ދަނީ އެކަމާއި ދެކޮޅު ހަދަމުންނެވެ. ބައެއް ޤާނޫނީ ވަކީލުންވެސް ވިދާޅުވަމުންދަނީ އާއިލާގެ ރުހުމަކާއި ނުލައި ޕޯސްޓްމޯޓަމް ހެދޭނީ ކޯޓު އަމުރެއް އޮވެގެން ކަމަށެވެ.
