މައްޔިތެއްގެ ހަށިގަނޑު ފަޅައި ސާމްޕަލް ނެގޭނީ އޭނާގެ ބަދަލުވެރިން ނުވަތަ ވާރިސުންގެ ހުއްދަ ލިބިގެން ކަމަށާއި އެ ނޫން ގޮތަކަށް އެކަން ކުރާ ނަމަ ކޯޓު އަމުރެއް ހޯދަން ޖެހޭ ކަމަށް ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވެއްޖެއެވެ.
އާޒިމާ މިހެން ވިދާޅުވީ ފުލުހުންގެ ބެލުމުގެ ދަށުގައި ހުއްޓާ މަރުވި ރަޝީދުގެ ހަށިގަނޑު އާއިލާއާ ހަވާލުނުކޮށް، ފުލުހުން ޕޯސްޓްމޯޓަމް ހަދަން އުޅޭ މައްސަލާގައި އާއިލާ އިން ކަންބޮޑުވުން ފާޅު ކުރަމުންދާ ދަނޑިވަޅެއްގައެވެ. އާއިލާއިން ބުނެފައިވަނީ ޕޯސްޓްމޯޓަމް ހަދައިފިނަމަ އާއިލާއިން ހަށިގަނޑާއި ހަވާލު ނުވާނެކަމަށެވެ.
އާޒިމާ ވިދާޅުވީ ރާއްޖޭގެ ޤާނޫނު އަސާސީގައި އެއްވެސް މީހަކު ހިފާ ހައްޔަރުކޮށް 24 ގަޑިއިރަށްވުރެ ގިނައިރު ހިފެހެއްޓޭނީ ފަނޑިޔާރެއްގެ ކުރިމައަށްޗަށް އެމީހަކު ހާޒިރުކުރުމަށްފަހު އެކަމަށް ކޯޓު އަމުރު ހޯދައިގެންކަމަށެވެ. މިމާއްދާއަކުން މަރުވެފައި އޮތް މީހެއް އިސްތިސްނާ ނުކުރާކަމަށް އާޒިމާ ވިދާޅުވިއެވެ.
ޖިނާއީ އިޖުރާތު ޤާނޫނަށް ބަލައިފިނަމަ އެއްވެސް މީހެއްގެ ހަށިގަނޑުން ސާމްޕަލް ނެގޭނީ އެމީހެއްގެ ހުއްދަ ލިބިގެން ކަމަށާއި، މިކުމް މަރުވެފައި އޮންނަ މައްޔިތާއަސްވެސް ހިނގާނެކަމަށެވެ. އެއީ ޕޯސްޓްމޯޓަމް ހެދުމާއިބެހޭ ޤާނޫނެއް ނެތީމައި ކަމަށްވެސް އާޒިމާ ވިދާޅުވިއެވެ. އެހެންކަމުން މިހުކުމަށް ބަލާއިރު މައްޔިތާގެ ހަށިގަނޑު ފަޅާ، ސާމްޕަލް ނެގޭނީ އޭނަގެ ޝަރުއީ ބަލަދުވެރިޔާ ނުވަތަ ވާރިސުން ހުއްދަ ދިނީމަ ކަމަށްވެސް އާޒިމާ ވިދާޅުވިއެވެ.
އާޒިމާ ވިދާޅުވީ މިނޫން ގޮތަކަށް ފުލުހުންގެ ތަހުގީގަކަށް ޕޯސްޓްމޯޓަމް ހަދަން ބޭނުންނަމަ ކޯޓުގެ އަމުރެއް ހޯދަން ޖެހޭނެއެވެ. ހަމައެއާއިއެކު މިހާރު އާއިލާނުވަތަ ވާރިސުން ހަށިގަނޑު ހޯދަން ބޭނުންނަމަ، އާއިލާއާއި ހަށިގަނޑު ހަވާލުނުކޮށް ބޭއްވޭނީ ހަމައެކަނި ކޯޓު އަމުރެއްގެ ދަށުން ކަމަށެވެ.
މައްޔިތެއްގެ ހަށިގަނޑަކީ ވާރިސުންގެ ހައްގެއް. ޢާއިލާގެ ނުރުހުމުގައި ހަށިގަނޑު ހިފެހެއްޓުމުގެ ބާރެއް، ރާޢްޖެއިން ފުރުވާލުމުގެ ބާރެއް، އަދި ޕޯސްޓްމޯޓަމް ހެދުމުގެ ބާރެއް އެއްވެސް ޤާނޫނަކުން ދައުލަތަށް ލިބިގެން ނުވޭ.
– އާޒިމާ ވިދާޅުވިއެވެ.
އާޒިމާ ވިދާޅުވީ އާއިލާގެ ނުރުހުމުގައި އެކަން ކުރެވޭނީ ހަމައެކަނި ކޯޓު އަމުރެއްގެ ދަށުންކަމުގައެވެ. އާޒިމާ މިހެން ވިދާޅުވެފައިވާއިރު ނޭޝަނަލް އިންޓަރގްރިޓީ ކޮމިޝަނުން ނެރުނު ނޫސް ބަޔާނެއްގައިވަނީ މިމައްސަލައިގައި އިންސާފަށް ވާސިލްވުމަށް މުހިންމުކަމަކަށްވާތީ ތަހްޤީގުގެ ބޭނުމަށް ކަނޑައެޅިފައިވާ އިޖްރާއަތުގެ ދަށުން ޕޯސްޓްމޯޓަމް ހެދުމަށް ނިންމާފައިވާ ކަމަށެވެ.
