މިދަނޑިވަޅަކީ ޓެކްސް ބޮޑު ކުރުމަށް އެންމެ ރަނގަޅު ވަގުތު ނޫންކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން މިއަދު ބުނެފިއެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ސަރުކާރުން ހުށަހަޅާފައިވާ އިސްލާހުގެ މުޅި މަޖިލިސް ބަހުސްގައި ކަމާއި ގުޅުންހުރި އިދާރާތަކުން މަޖިލީހަށް ހާޒިރު ކުރުމަށް މަޖިލިސް ރައީސް ނިންމާފައިވާ ނިންމުމާއި އެއްގޮތަށް މިއަދު ވަނީ ބައެއް އިދާރާތައް މުޅި މަޖިލިސް ކޮމެޓީއަށް ހާޒިރުކޮށްފައެވެ. ކޮމެޓީއަށް ދިން ދައުވަތާއި ގުޅިގެން މަޓީން ބުނެފައިވަނީ އެ ޖަމިއްޔާގެ ބޯޑަށް އެކަން ހުށަހަޅައި، ގޮތެއް ނިންމައިގެން ބޭފުޅަކު ފޮނުވާނެ ކަަމަށެވެ. އެހެން ނަމަވެސް ޓެކްސް ބޮޑުކުރުމާ ބެހޭ ގޮތުން އެ ޖަމިއްޔާގެ ހިޔާލު ވެސް އެ ސިޓީގައި ފާޅުކުރިއެވެ.
މަޓީން ބުނެފައިވަނީ ޓެކްސް ބޮޑުކުރުމަށް އެންމެ ރަނގަޅީ ވަގުތު ދީގެން ކަމަށެވެ. އެގޮތުން އަހަރެއްހާ ދުވަހުގެ މުއްދަތެއް ދިނުމަށް މަޓީން ވަނީ އެދިފައެވެ.
މަޓީ ދެކޭ ގޮތުގައި މިވަގުތަކީ ޓެކްސް ބޮޑުކުރުމަށް އެންމެ އެކަަށީގެންވާ ވަގުތު ނޫންކަމުގައި ދަންނަވަމެވެ. ސަބަބަކީ ރާއްޖޭގެ ފަތުރުވެރިކަމުގެ ސިނާއަތް މިހާރު ވެސް މިއަންނަނީ އެކިއެކި ލޮޅުންތަކުން އަރައިގަތުމަށް މަސައްކަތް ކުރަމުންނެވެ. އަދި މަޓީގެ އެދުމަކީ ޓެކްސް އަށް އަންނަ ކޮންމެ ބަދަލެއް ތަންފީޒުކުރުމަށް އެންމެ މަދުވެގެން 12 މަސް ދުވަސް ދިނުން.
– މަޓީން މަޖިލީހަށް ފޮނުވި ސިޓީގައި ބުނެފައިވެއެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް އިސްލާހު ހުށަހެޅުއްވީ ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއުއެވެ. ޝިފާއު ހުށައެޅުއްވި އިސްލާހުގައި ވަނީ ޓީޖީއެސްޓީ %12އިން %16އަށް، އަދި ޖީއެސްޓީ %6އިން %8އަށް ބޮޑުކުރުމަށެވެ.
ޖީއެސްޓީއާއި ޓީޖީއެސްޓީ ބޮޑުކުރުމަށްޓަކައި ސަރުކާރުން ހުށަހެޅި ގޮތަށް ބިލު ފާސްކުރަން އެމްޑީޕީން ވަނީ ތްރީ ލައިން ވިޕެއްވެސް ނެރެފައެވެ.
