ކަލާޒް ޗެނަލް އިން ގެެނެސްދޭ އެންމެ ކާމިޔާބު އެއް ޝޯވ ކަމުގައިވާ "ބިގް ބޮސް" ގެ ހޯސްޓް އަދި ބޮލިވުޑްގެ ދެވަނައެއް ނެތް ފަދަ ކުޅަދާނާ އެކްޓަރު ސަލްމާން ޚާނަށް ޑެންގޫ ޖެހިގެން މަސައްކަތާ ދުރައްޖެހިލައިފިއެވެ.
ސަލްމާން ބަލިވުމުގެ ސަބަބުން އޭނާ މިހާރު ކުރިއަށް ގެންދާ "ބިގް ބޮސް"ގެ 16 ވަނަ ސީޒަން ގެ ވީކެންޑް ކާ ވާރް ގެެނެސް ދިނީ މަޝްހޫރު ޑައިރެކްޓަރ / ޕްރޮޑިއުސަރ ކަރަން ޖޯހަރެވެ.
އޭނަ "ބިގް ބޮސް 16″ ގައި ހިއްސާވާ އިރު، ކަރަން އަކީ މި ޝޯގެ އެކި ސީޒަންތަކުގައި ކުރިން ވެސް އެކި ގޮތްގޮތުން ހިއްސާވެފައިވާ މީހެކެވެ.
ބިގް ބޮސްއަކީ ތަފާތު ދާއިރާ ތަކުން ހޮވާލެވޭ މަޝްހޫރު ފަންނާނުން ގެއެއްގައި ބަންދުކޮށްގެން ތަފާތު ޓާސްކް ތަކެއް ދީގެން ކުރިއަށް ގެންދާ ޝޯ އެކެއެވެ. މި ޝޯގައި ބެލުންތެރިންގެ މެދުގައި މަގުބޫލު ފަންނާނުންގެ އަސްލު ސޫރަ ބަލާލުމުގެ ފުރުސަތު ލިބިގެން ދެއެވެ.
ސަލްމާނަށް ޑެންގޫ ޖެހިގެން ފަރުވާ ހޯދަން ޖެހުނުއިރު، އޭނާ ދިޔައީ ބައެއް ފިލްމު ތަކުގެ މަސައްކަތް ވެސް ކުރަމުންނެވެ. އެހެން ކަމުން އޭނާ މިހާރު ކުރިއަށް ގެންދާ ހުރިހާ މަސައްކަތެއް ހެން ހުރީ މިވަގުތަށް މެދު ކަނޑާލައިފައެވެ.
