އިންޑިއާގައި ކޯވިޑް19 އަށް ޕޮޒިޓިވް ވެފައިވާ މީހުންގެ އަދަދު މިހަފްތާގެ ހުކުރު ދުވަހު 9 މިލިއަނުން މައްޗަށް އަރައިފިއެވެ. މިގޮތުން އިއްޔެ އެކަނިވެސް އިންޑިއާގައި 45،000 މީހުން ވަނީ މިބައްޔަށް ޕޮޒިޓިވް ވެފައެވެ.
އިންޑިއާގެ ހެލްތު މިނިސްޓްރީން މައުލޫމާތު ދޭގޮތުގައި އެގައުމުގައި 9 މިލިއަން މީހުންނަށް މިބަލި ޖެހިފައިވާ އިރު، ފާއިތު ވެދިޔަ 24 ގަޑިއިރުގެ ތެރޭގައި އެކަނިވެސް، 584 މީހުން އެގައުމުގައި ވަނީ މިބަލި ޖެހިގެން މަރުވެފައެވެ. މިހާތަނަށް މުޅި ޖުމްލަ 132،162 މީހުން އިންޑިއާގައި މިބަލީގައި ވަނީ މަރުވެފައެވެ.
ފާއިތުވި ސެޕްޓެމްބަރުގައި އިންޑިއާގައި ކޯވިޑްގެ ހާލަތު ޕީކަށް އެރުމަށްފަހު، މިހާރު ބަލިޖެހޭ މީހުންގެ އަދަދު ދަނީ ދަށްވަމުންނެވެ. މިގޮތުން ފާއިތުވި 13 ދުވަހުގެ ތެރޭގައި އިންޑިއާގައި ދުވާލަކަށް ބަލި ޖެހޭމީހުންގެ އަދަދު ވަނީ 50،000އިން ދަށުގައި ހިފެހެއްޓިފައެވެ.
އެހެންނަމަވެސް، ވެރިކަން ކުރާ ނިއުދިއްލީގައި ބަލިޖެހޭ މީހުންގެ އަދަދު ދަނީ ކޮންމެ ދުވަހަކުވެސް އިންތިހާއަށް އިތުރުވަމުންނެވެ.
މިގޮތުން ނިއުދިއްލީގެ މަރުކަޒީ ސަރުކާރަށް އެސްޓޭޓް ލޮކްޑައުން ކުރުމަށް ޕްރެޝަރ އިތުރުވަމުން ދާއިރު، ނިއުދިއްލީގެ ކަމާބެހޭ ފަރާތްތަކުން ވަނީ މާސްކު ނާޅާ ބޭރުގައި އުޅޭމީހުން ކުރަމުން ދާ ޖޫރިމާނާގެ އަދަދު 4 ގުނައަށް މަތިކޮށްފައެވެ. ދިއްލީގެ މަގުމަތީގައި މާސްކު ނާޅާ އުޅޭމީހުން މިހާރު ޖޫރިމަނާ ކުރަމުން ދަނީ ބޮލަކަށް 2،000 އިންޑީއާ ރުޕީސް (27 ޑޮލަރު)ގެ މަގުންނެވެ.
އިންޑިއާގެ ސަރުކާރުން ވަނީ ކޯވިޑް19 އަށް ފަރުވާ ދިނުމަށްޓަކާ ޚާއްސަ ޓީމުތައް އެގައުމުގެ ހަރިޔާނާ، ގުޖުރާތު، މަނިޕޫރު އަދި ރާޖަސްތާން ސްޓޭޓުގައި ހަރަކާތްތެރި ކުރުވަން ފަށާފައެވެ.
މިއަހަރުގެ މާރޗްމަހު އިންޑިއާަގައި ބަލި ފެތުރެން ފެށުމާއެކު، އިންޑިއާ ހިމެނިގެން ދިޔައީ އެންމެ ހަރުކަށިކޮށް ލޮކްޑައުން ތައާރަފްކުރި ގައުމުތަކުގެ ތެރޭގައެވެ. އެހެންނަމަވެސް، މި ލޮކްޑައުތަކުގެ ސަބަބުން އިންޑިއާގެ އިގްތިސާދަށް ކުރަންފެށި ނޭދެވޭ އަސަރުތަކުގެ ސަބަބުން އެގައުމުގެ ސަރުކާރުން ފަހުންވަނީ މި ލޮކްޑައުންތަކަށް ވަރަށް ބޮޑުތަނުން ލުއި ދީފައެވެ.
އިންޑިއާގައި މާސްކު އެޅުން މަޖުބޫރު ކޮށްފައި ވިނަމަވެސް، ޚާއްސަކޮށް ބޮޑެތި ސިޓީތަކުގައި ގެއިން ބޭރުގައި މާސްކު އަޅަނީ މަދު ބައެކެވެ. އަދި ޚާއްސަކޮށް، ދީނީ އިހުތިފާލްތަކަށް މާސްކު އެޅުމެއްނެތި އަދިވެސް އެތައްބަޔަކު ޖަމާވަމުން ދެއެވެ.
އިންޑީއާގައި ކޯވިޑްގެ ހާލަތު އެންމެ ގޯސްވެގެން ދިޔައިރު ދުވާލަކަށް 100،000 މީހުންނަށް ބަލި ޖެހިފައި ވެއެވެ. އެހެންނަމަވެސް، ފާއިތުވެދިޔަ ހަފްތާތަކުގައި މިއަދަދު ދެބައިކޮށްފަ އެއްބަޔަށް ތިރިވެފައިވި ނަމަވެސް، އޮފިޝަލުން ލަފާކުރާ ގޮތުގައި އިންޑިއާގައި ކޯވިޑްގެ އިތުރު ވޭވެއް އައުން ވަރަށް ގާތެވެ.
އިންޑިއާގެ ހުޅަގުގެ އަވަށެއް ކަމުގައިވާ އަހުމަދުއާބާދުގައި މި ހަފްތާގެ ބުރާސްފަތި ދުވަހުންފެށިގެންވަނީ މުއްދަތެއް ނެތްގޮތަށް ރޭގަޑުގެ ވަގުތުތަކުގައި ކާފިއު ހިންގާފައެވެ. މި ކާފިއު ހިންގަންޖެހުނީ، ނިއުދިއްލީގަ އޮތް ދީނީ އިހުތިފާލަކަށް ގިނަބަޔަކު އެއްވުމާއި ގުޅިގެން އަހުމަދުއާބާދުގައި އާދަޔާ ޚިލާފަށް ބަލި ފެތުރެން ފެށުމާއި ގުޅިގެންނެވެ.
އިންޑިއާ ހިމެނިގެން ދަނީ، އެމެރިކާ ފިޔަވާ ދުނިޔޭގައި ކޯވިޑް19ގެ ހާލަތު އެންމެ ގޯސް ގައުމުގެ ގޮތުގައެވެ.
