ގަލޮޅު ސްޓޭޑިއަމް ތަޅާލާ އެތަން ތަރައްގީކުރުމަށް ސަރުކާރުން ތައްޔާރުވަމުންދާ ކަމުގައި ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެއެވެ.

މިއަދު އޮތް ރައްޔިތުންގެ މަޖިލިހުގެ ޖަލްސާގައި ވާހަކަ ދައްކަވަމުން މަހުލޫފު ވިދާޅުވީ ގަލޮޅު ފުޓްބޯޅަ ސްޓޭޑިއަމް ހުރި ތަނުގައި ޒަމާނީ ފެންވަރުގެ ސްޓޭޑިއަމެއް ތަރައްގީ ކުރުމަށްޓަކާ ސްޓޭޑިއަމް ތަޅާލާ، އެތަން ތަރައްގީ ކުރުމުގެ މަސައްކަތް މިއަހަރު ފަހުކޮޅު ނުވަތަ އަންނަ އަހަރު ކުރީކޮޅު ފެށިގެން ދާނެކަމުގައެވެ.

ގަލޮޅޫ ސްޓޭޑިއަމް ބާވެ، އެތަނުގެ ސިޑިބަރުތަކަކީ ބޭނުންކުރުން އެންމެ ރައްކާތެރި ތަންތަން ނޫންކަމުގެ ޝަކުވާތައްވެސް ބޮޑުވެފައި ވަނިކޮށް، މި ސަރުކަރުންވަނީ އެތަނުގައި އާ ސްޓޭޑިއަމެއް އެޅުމުގެ މަޝްރޫޢު އިއުލާން ކުރައްވާފައެވެ. އަދި ގަލޮޅު ސްޓޭޑިއަމް ހުރި ތަނުގައި އަޅާ އާ ސްޓޭޑިއަމްގެ ފޮޓޯތައްވެސް ޔޫތު މިނިސްޓްރީން އާންމު ކޮށްފައި ވެއެވެ.

ގަލޮޅު ދަނޑު ތަރައްގީ ކުރުމަށްޓަކައި އިންޑިއާގެ ލޯނު އެހީގެ ތެރެއިން 55 މިލިއަން ރުފިޔާގެ ބަޖެޓެއް ވަނީ ހަމަޖައްސައިފައެވެ.

ރާއްޖޭގެ ކުޅިވަރު ތަރައްގީ ކުރުމަށް އިންޑިއާ އިން ދޭ 40 މިލިއަން ޑޮލަރުގެ ލޯން އެހީގެ ތެެރެއިން ގަލޮޅު ދަނޑުގެ ތަރައްގީއަށް ހަރަދުކުރަން މި އަހަރުގެ ބަޖެޓްގައި ހިމަނާފައިވަނީ 45،494،505 (ސާޅީސް ފަސް މިލިއަން ހަތަރުލައްކަ ނުވަދިހަ ހަތަރުހާސް ފަސްސަތޭކަ ފަހެއް) ރުފިޔާ އެވެ. އަދި 2023 ވަނަ އަހަރުގެ ބަޖެޓްގައި 10 މިލިއަން ރުފިޔާ ވަނީ ގަލޮޅު ދަނޑުގެ ތަރައްގީ އަށް ހިމަނައިފަ އެވެ. މިއީ އިންޑިއާގެ އެގްޒިމް ބޭންކް މެދުވެރިކޮށް ދޭ ލޯނުން ހިންގަން ނިންމާފައިވާ ޕްރޮޖެކްޓެކެވެ.

މިއަދުގެ ރައްޔިތުންގެ މަޖިލިހުގެ ޖަލްސާގައި ވާހަކަ ދައްކަވަމުން މަހުލޫފު ވިދާޅުވެފައިވަނީ، ގަލޮޅު ދަނޑު ތަރައްގީކުރުމުގެ މަޝްރޫޢު މިހާރު ފެށުމަށް ތައްޔާރު ވެފައިވާއިރު، ގަލޮޅު ދަނޑު ތަޅާލުމުގެ ކުރިން، ހުޅުމާލޭގެ ޓްރެކް ދަނޑުގައި ކުޅެވޭނެ އިންތިޒާމްތައް މިހާރު ހަމަޖައްވަމުން ދާކަމުގައެވެ.

ހަގީގަތަކީ ދަނޑުގެ ސިޑިބަރިތައް ބޭނުންކުރަން، އެންމެ ފަހުންވެސް ސާފް ޗެމްޕިއަންޝިޕް ބޭއްވި އިރުގަ އަޅުގަނޑުމެން އެތަން ބޭނުންކުރީ އިންޖިނިއަރުންގެ ލަފާގެ މަތިން ވަރަށް ބައިވަރު މަސައްކަތްތަކެއް ކޮށްގެން

މިއަދުގެ ޖަލްސާގައި ވާހަކަ ދައްކަވަމުން މަހުލޫފު ވިދާޅުވެފައި ވެއެވެ.