އަންނަ މަހު 11 ގައި ރިލީޒްކުރަން ހަމަޖެހިފައިވާ، އަމީތާބް ބައްޗަންގެ އައު ފިލްމު "އޫޗާއީ"ގެ ޓްރެއިލާ އނެރެފިއެވެ.
މި ފިލްމުގައި ލީޑުން ފެނިގެންދާނީ ބޮލީވުޑްގައި މިވަގުތު ތިބި އެންމެ އުމުރުން ދުވަސްވީ ކުޅަދާނާ ތިން ތަރިންނެވެ. މި ފިލްމު ގައި އަމިތާބްގެ އިތުރުން ދެން ފެނިގެންދަނީ އަނޫޕަމް ކޭރް އަދި ބޮމަން އިރާނީއެވެ.
ފިލްމުގެ މުހިންމު ރޯލުތަކުން ޑެނީ ޑެންޒޯންގްޕާ، ނީނާ ގުޕްތާ، ސާރިކާ، ނަފީސާ އަލީ އަދި ޕަރީނިތީ ޗޯޕްރާ ފެނިގެންދާއިރު ފިލްމަކީ ޒަމާންވީ ރަހުމަތްތެރިކަމުގެ ގުޅުމެއް ދައްކުވައިދޭ ފިލްމެކެވެ.
"އޫޗާއީ" އަކީ މިއަހަރުގެ އެންމެ އުންމީދީ އެއް ފިލްމެވެ. މި ފިލްމުގެ ޑައިރެކްޓަރ ސޫރަޖް ބަރްޖާތިޔާ އެންމެ ފަހުން ގެނެސް ދިން ފިލްމަކީ ސަލްމާން ޚާނާއި ސޯނަމް ކަޕޫރު ލީޑުން ފެނިގެން ދިއަ 2015 ގެ ފިލްމު "ޕްރޭމް ރަތަން ދަން ޕާޔޯ" އެވެ.
އިންޑިއާ އާއި ނޭޕާލްގައި މަންޒަރުތައް ނެގި މި ފިލްމުގެ ޝޫޓިންގ ނިންމައި އަންނަ މަހު ސިނަމާތަކުގައި އަޅުވަން ތައްޔާރުވެފައި ވާއިރު ފިލްމުގައި ކިޔައިދޭނީ އުމުރުން ދުވަސްވީ އެކުވެރިންތަކެއްގެ ވާހަކައެވެ.
