ހައްޖު ކޯޕަރޭޝަންގެ ހަވާލުގައި މިއަހަރު ހައްޖަށް ދިޔަ ހައްޖާޖީންނަށް ކޮފީއާއި، ޕެނަޑޯލް ވިއްކާފައިވާކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
ހައްޖު ކޯޕަރޭޝަންގެ ހަވާލުގައި ހައްޖަށް ދިޔަ ހައްޖާޖީންނަށް އެހެން ޖަމާއަތްތަކުން ހިލޭ ފޯރުކޮށްދޭ ޚިދުމަތްތަކުގެ ގޮތުގައި އޮތް ކޮފީއާއި، ޕެނެޑޯލް ވިއްކި ކަމަށްބުނެ ލިބުނު ޝަކުވާތަކާއި ގުޅިގެން ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު ވަނީ އިސްލާމިކް މިނިސްޓްރީގެ ފަރާތުން މިކަން ސާފު ކުރުމަށް އެދިފައެވެ.
ލިޔުމުން ޖަވާބު ހޯދުމަށް އެދުނު މިސުވާލުގެ ޖަވާބުގައި އިސްލާމިކް މިނިސްޓްރީން ވިދާޅުވީ ހައްޖު ކޯޕަރޭޝަނުން 1443 ވަނަ އަހަރު ހައްޖުގައި ކޮފީ ވިއްކާކަމުގެ ޝަކުވާ ބައެއް ހައްޖުވެރިންގެ ފަރާތުން ލިބުމުން އެއީ ކިހިނެތް ހިނގާކަމެއްތޯ ބެލިއިރު މުޅި ހައްޖު ދަތުރުގައި ހާޖީނަށް ދެވޭ ތިން އިރު ކެއުމާއި ހަވީރު ސަޔާއި އޭގެ އިތުރުން އެހެނިހެން ވަގުތުތަކުގައި އިތުރު ޚިދުމަތެއްގެ ގޮތުގައި ހޮޓަލުގެ ލޮބީގައި ކޮފީ ޝޮޕެއް ހުޅުވައި ކޮފީ ގަންނަން ބޭނުންވި ފަރާތްތަކަށް އެޚިދުމަތް ފޯރުކޮށް ދިނުމަށްޓަކައިވަނީ ކޮފީ ޝޮޕުގައި ކޮފީ ވިއްކާފައިވާކަމަށެވެ.
އަދި ހައްޖު ކޯޕަރޭޝަންގެ ފަރާތުން 14143 ވަނަ އަހަރުގެ ހައްޖުގެ އަޅުކަން އަދާކުރަން ދިޔަ ހައްޖާޖީންގެ ތެރެއިން ޕެނަޑޯލް ގަނަން ބޭނުވި ފަރާތްތަކަށް ޕެނަޑޯލް ވިއްކާފައިވާނޭކަމަށް ހައްޖު ކޯޕަރޭޝަނުން ވިދާޅުވެފައިވާކަމަށް އިސްލާމިކް މިނިސްޓްރީން ވަނީ ވިދާޅުވެފައެވެ. އަދ ިމިފަދަ އެއްވެސް ޝަކުވާއެއް މިނިސްޓްރީއަށް ލިބިފައި ނުވާކަމަށެވެ.
މެމްބަރު ރަޝީދު ވަނީ ހައްޖަށް އެހީތެރިން ގެންދިއުމުގައި ނުފޫޒު ބޭނުން ކޮށްފައިވާ ކަމުގެ ތުހުމަތުތަކާއެކު އެ ކަން ސާފުކުރުމަށް މިދިޔަ ހަފްތާގައިވެސް ސުވާލެއް ކުރައްވާފައެވެ. މިއަހަރު ރާއްޖެއަށް ލިބުނު ކޯޓާގައި ހައްޖަށް ދާން ފުރުސަތު ލިބުނީ ހައްޖު ކޯޕަރޭޝަންގެ ހަވާލުގައި ހައްޖަަށް ދިޔަ މީހުންނަށް އެކަންޏެވެ.
One Response
މި ޝޭޚުން މިތިބީ ލާދީނިއްޔަތު ކރިއަރުވަން ބައިއަތު ހިފައގެން ސުވާލު ވެވޭނެ ދުވަހެއް އތް ކަމގެ ހަނދާނެއް ނެތް