އެމެރިކާގެ އިންތިޚާބީ ރައީސް ޖޯ ބައިޑްން ކެބިނެޓްގެ މަގާމްތަކަށް މިނިސްޓަރުން އައްޔަން ކުރުން އަވަސްކޮށް، އަންނަ ހަފްތާގައި ކެބިނެޓް އިއުލާންކުރަން ނިންމަވާފައިވާ ކަމަށް މިޑިއާ ރިޕޯޓްތައް ބުނަން ފަށައިފިއެވެ.
މައުލޫމާތު ލިބޭގޮތުގައި، އެމެރިކާގެ ރިޔާސީ އިންތިޚާބު އޮޅުވާލާ މަކަރު ހަދާފައިވާ ކަމަށް މުޅިދުނިޔެއަށް ދެއްކުމަށް ޓަރަމްޕް ކުރަމުންދާ މަސައްކަތްތަކާއި ދެކޮޅަށް، ބައިޑަން ކާމިޔާބީއާ އެކީ ފަސްޖެހުމެއް ނެތި ކުރިޔަށް ވަޑައިގަންނަވާ ކަން ސާބިތު ކޮށްދިނުމުގެ ގޮތުން އަންނަ ހަފްތާގައި ކެބިނެޓްގެ މުހިންމު މަގާމްތަކެއް އިއުލާން ކުރައްވާނެއެވެ.
މިހަފްތާގެ ބުރާސްފަތި ދުވަހު ބައިޑްން ވަނީ ކެބިނެޓްގެ ޓެރެޜަރީ ސެކެޓްރީއަކަށް ބޭފުޅަކު ހަމަޖައްސަވާފައި ވާކަމަށް ވިދާޅުވެފައެވެ. އެހެންނަމަވެސް، މިއީ ކޮން ބޭފުޅެއްކަން އިއުލާން ކުރައްވާފައެއް ނުވެއެވެ. ބައެއް ފަރާތްތަކުން މައުލޫމާތު ދޭގޮތުގައި ކެބިނެޓްގެ އެހެން ބައެއް މުހިންމު މަގާމްތަކަށްވެސް ބައިޑްން މިހާރުވަނީ ބޭފުޅުން ހަމަޖައްސަވާ ނިންމަވާފައެވެ. އަދި، އެމެރިކާގެ ރައްޔިތުންނަށް ޝުކުރު އަދާކުރުމުގެ ގޮތުގައި އަންނަ ހަފްތާގައި ގައުމާ މުޚާތަބުކޮށް ވާހަކަ ދައްކަވަން ހަމަޖެހިފައިވާ ޖަލްސާގައި ބައިޑްން މިމަގާމްތަކަށް އައްޔަން ކޮށްފައިވާ ކެބިނެޓް މިނިސްޓަރުންގެ ނަންތައް އިއުލާން ކުރައްވާނެއެވެ.
އެމެރިކާގެ މާލީ ވުޒާކަމުގައިވާ ޓެރެޜަރީ ޑިޕާންޓްމަންޓް ބަލައްހައްޓަވާނީ ބެލެވޭ ގޮތުގައި ފެޑެރަލް ރިޒާވްގެ ބޯޑު މެމްބަރެއް ކަމުގައިވާ ލައެލް ބްރެއިނާޑްއެވެ. އެކަމަނާ މިމަގާމަށް އައްޔަން ކުރެވިއްޖެނަމަ ވެގެންދާނީ އެމެރިކާގެ ތާރީޚުގައި ޓެރެޜަރީ ސެކެޓްރީއަކަށް އައްޔަން ކުރެވިގެންދާނެ ފުރަތަމަ އަންހެން ބޭފުޅާއަށެވެ. އަދި ބެލެވޭ ގޮތުގައި މިއީ ތަފާތު ފަންނުތަކާއި އަދި ދެޖިންސުންވެސް ބޭފުޅުން ކެބިނެޓަށް ލައްވާނެ ކަމަށް ބައިޑްން ވެވަޑައިގެންފައިވާ ވައުދު ފުއްދުމުގެ ގޮތުން ހަޖައްސަވާ މަގާމެއްކެވެ. އެހެންނަމަވެސް، ޓްރަމްޕްގެ އަރިސް ބައެއް ބޭފުޅުން ވިދާޅުވާގޮތުގައި ބްރެއިނާޑް މިމަގާމަށް އައްޔަން ކުރައްވަން ބައިޑްން އަދި މުޅިން ނިންމަވާފައެއް ނުވެއެވެ. އެހެންނަމަވެސް، މިމަގާމަށް ބައިޑްން އަޔަން ކުރުން އެންމެ ގާތް ބޭފުޅާއަކީ ބްރެއިނާޑްކަމަށް އެބޭފުޅުންވެސް އެއްބަސްވެ ވަޑައިގަންނަވައެވެ.
ރިޕޯޓުތައް ބުނާ ގޮތުގައި، ކެބިނެޓްގެ އެންމެ މުހިންމު އެއް މަގާމް ކަމުގައިވާ ސެކެޓްރީ އޮފް ސްޓޭޓްގެ މަގާމަށް އައްޔަން ކުރަވާނެ ބޭފުޅެއްގެ ނަން އަންނަ ހަފްތާގެ ކުރީކޮޅު ބައިޑްން އިއުލާން ކުރައްވާނެއެވެ.
ބައިޑްއަކީ ނިންމެވުންތައް ނިންމެވުމުގައި ވަރަށް ރަގަޅަށް ބައްލަވާ، އަދި ލަސް ބޭފުޅެއްގެ ގޮތުގައި ގިނަބަޔަކު ސިފަ ކުރާ ބޭފުޅެކެވެ. އެހެންނަމަވެސް، ސަރުކާރު އެކުލަވާލުން އަވަސްކުރަން ޖެހިފައިވަނީ، އިންތިޚާބުގެ ހަގީގަތް އޮޅުވާލާ، މުޅި އިންތިޚާބާ ގުޅޭގޮތުން ޓްރަމްޕް ދައްކަވަމުން ގެންދަވާ ތަސައްވުރު ބަދަލުކުރުމަށް އަވަސް ފިޔަވަޅުތަކެއް އަޅަން ޖެހިފައިވާތީކަމަށް ރިޕޯޓުތައް ބުނެއެވެ.
އެގިފައިވާ ގޮތުގައި، އެމެރިކާގެ ޖޯޖިޔާ ސްޓޭޓުގެ ދާއިމީ ނަތީޖާ ލިބެންދެން މުހިންމު ނިންމުންތައް ލަސްކުރުމަށް އޭނާގެ މުޝީރުންނާއި ބައިޑްވަނީ މަޝްވަރާ ކުރައްވާފައެވެ. ސަބަބަކީ އެމެރިކާގެ ސެނެޓްގެ މެޖޯރިޓީ ލިބޭނެ ޕާޓިއެއް ޔަގީން ވެގެން ދާޏީ މިސްޓޭޓުގެ ނަތީޖާއާއ އެކީގައެވެ. އެހެންނަމަވެސް، އިންތިޚާބުގެ ނަތީޖާއަށް ތިން ހަފްތާ ވެގެންދާއިރުވެސް، ޓްރަމް އަމަލް ކުރައްވާފައިވާ ގޮތުން މުހިންމު ނިންމުތައް އެއްވެސް ވަރަކަށް ލަސްކުރުމަށް ބައިޑްންއަށް ޖާގައެއް ނެތްކަމުގައި ބައިޑްންގެ މުޝީރުން ގަބޫލު ކުރާކަމަށް ވެއެވެ.
