މަސްތުވާތަކެތި ބޭނުންކުރައްވައިގެން މަސްތުގެ ހާލަތުގައި ބައެއް މެންބަރުން މަޖިލީހަށް ވަޑައިގަންނަވާ ކަމަށް އެމްޑީޕީގެ މަރަދޫ ދާއިރާގެ މެންބަރު އިބްރާހީމް ޝަރީފް ތުހުމަތުކުރެއްވުމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކޯފާވެއްޖެއެވެ.
ސަރުކާރުން ލާމަރުކަޒީ ގާނޫނަށް ހުށަހަޅާފައިވާ އިސްލާހަށް ބަހުސްކުރައްވަމުން ޝަރީފް ވިދާޅުވީ މަޖިލީހަކީ ބިނާކުރެވޭ ހިޔާލު ފާޅުކުރެވޭ އަދި ގައުމަށް ދިމާވާ ބޮޑެތި މައްސަަލަކުގައި ވާހަކަ ދައްކައި މަޝްވަރާކޮށްގެން ހައްލު ހޯދައިދޭން ޖެހޭ ތަނަކަށް ވާން ޖެހޭ ކަމަށެވެ. ހަމަ އެހެންމެ މަޖިލީހުގެ މެމްބަރުންގެ މެދުގައި އޮންނަ ޒާތީ ކަންކަމާއި ރުޅި އިސްކޮށް ޒުވާބުކޮށް މީހުންނަށް ހުޝާމަދު ކުރާ ތަނަކަށް ވާން ޖާގަ ދީގެން ނުވާނެކަމަށެވެ. އެހެން ނަމަވެސް މަޖިލީހުގައި އެފަދަ ކަންކަން ހިނގަމުންދާ ކަމަށް ޝަރީފް ވިދާޅުވިއެވެ.
ޝަރީފް މިހެން ވިދާޅުވުމާ އެކު ރައީސް ނަޝީދު ވަނީ ޝަރީފްގެ ވާހަކަ ހުއްޓުވާފައެވެ. އޭގެފަހުގައި ރައީސް ނަޝީދު ވަނީ ޝަރީފްގެ ވާހަކަތައް ފުރަތަމަ ރަނގަޅު މަގުގައި ބަހައްޓަވަން ދަންނަވާފައެވެ. މެންބަރު ޝަރީފް ރަނގަޅު މަގުގައި އަމަލުކުރެއްވުމުން ކަންކަން ކުރިއަށް ދާނީ ރަނގަޅު މަގުގައި ކަމަށް ގަބޫލުކުރައްވާ ކަމަށްވެސް ނަޝީދު ވިދާޅުވިއެވެ.
ނަޝީދަށް ރައްދު ދެއްވަމުން ޝަރީފް ވިދާޅުވީ ނަޝީދު ވިދާޅުވީ ވަރަށް ހިތާމަކުރައްވާ ފަދަ ވާހަކަފުޅެއް ކަމަށާއި ރައްޔިތުންގެ މަޖިލީހަކީ "ޑްރަގް އައްޑާއަކަށް" ވެގެން ނުވާނެ ކަމަށެވެ.
މަޖިލިސް ގޯތި ތެރޭގައި ފަޅުގައި ޑްރަގް ބޮއެގެން މަސްތުގެ ހާލަތުގައި މިތަނަށް އައިސް މީހުންނާ ދިމާލަށް ހިތުހުރި އެއްޗެއް ގޮވުމުގެ ފުރުސަތު މިތަނުގައި ދެވިގެން ނުވާނެ. މިތާންގައި އެބަޖެހޭ ބުރެތު އެނަލައިޒަރެއް ބަހައްޓަން.
– ޝަރީފް ވިދާޅުވިއެވެ.
ޝަރީފް އެހެން ވިދާޅުވުމުން ނަޝީދު ވަރަށް ބޮޑަށް ކޯފާވެލައްވައި ވިދާޅުވީ އެއްގޮތަކަށްވެސް ހަގީގަތް ނުހިފޭ ޒިންމާދާރުކަން ކުޑަ ވާހަކަ ދައްކަވައިގެން ނުވާނެކަމަށެވެ. އަދި މިޖިލީހުގައި މަސްތުވާތަކެތި ނުގެން ގުޅޭކަމަށާއި، އެއިދާރާއަކީ ރައްޔިތުންގެ މަޖިލިސްކަމަށް ރައީސް ނަޝީދު ވިދާޅުވިއެވެ.
އިއްޒަތްތެރި މެންބަރު ތިޔަ ކުރައްވާ ކަމަކީ މި ތަނުގެ އިއްޒަތާއި ކަރާމާތް ނަގައިލުމަށް ސާބިތުނުހިފޭ ބާވަތުގެ ވާހަކަދައްކަވަމުން ގެންދެވުން. މި ތަނުގައި ޑުރަގެއް ނުގެންގުޅޭނެ. މިތަނުގައި މަސްތުވާތަކެއްޗެއް ނުގެންގުޅޭނެ. މިއީ ދިވެހިރާއްޖޭގެ ރައްޔިތުންގެ މަޖިލިސް.
– ރައީސް ނަޝީދު ވިދާޅުވިއެވެ.
ނަޝީދަށް ޖަވާބު ދެއްވަމުން ޝަރީފް ވިދާޅުވީ އޭނާ ކުރެއްވި ތުހުމަތާ މެދު ވިސްނަވަންޖެހޭ ކަމަށެވެ. ކަމުގެ ހަގީގަތް އެނގޭނީ މަޖިލީހުގައި ބްރެތު އެނަލައިޒާއެއް ބެހެއްޓުމުން ކަމުގައިވެސް ވިދާޅުވިއެވެ.
