އއ މާޅޮހުގެ ދެކުނުން ބަންޑުން ޖަހާލި ލޯންޗުން ގެއްލުނު މީހާ ހޯދުމަށް ކުރަމުންދާ މަސައްކަތުގައި، އެމްއެންޑީއެފް ކޯސްޓްގާޑުން މިއަދުގެ ނިޔަލަށް 35 އަކަނޯޓިކަލް މޭލުގެ ސަރަހައްދެއް ބަލާފައިވާކަމަށް އެމްއެންޑީއެފް އިން ބުނެފިއެވެ.
މި މަސައްކަތުގައި އެމްއެންޑީއެފް ކޯސްޓްގާޑު ޝިޕް ޝަހީދު ޢަލީއާއި، ކޯސްޓްގާޑު ފާސްޓް އިންޓަސެޕްޓަރ ކުރާފްޓް "ހަކުރާ" އިން ކަނޑުގެ ފަށަލަ ބަލަމުންދާއިރު، އެމްއެންޑީއެފް ޑޯނިއަރ ފްލައިޓްގައި ވައިގެ މަގުން ދަނީ އެ ސަރަހައްދުގައި ހަރަކާތްތެރިވަމުންކަމަށްވެސް އެމްއެންޑީއެފް އިން ބުންޏެވެ.
ގެއްލިގެން ހޯދަމުން ދަނީ، ސ.ހިތަދޫ މިންހާ، މުޙައްމަދު މިންހާޖުކަމަށާއި، އުމުރުން 28 އަހަރުގެ މުޙައްމަދު މިންހާޖު އެންމެ ފަހުން ލައިގެން ހުރީ އަޅި ކުލައިގެ އަތްދިގު ޓީޝާޓަކާއި ނޫ ކުލައިގެ ޖިންސެއް ކަމަށް އެމްއެންޑީއެފް ކޯސްޓްގާޑަށް ވަނީ މަޢުލޫމާތު ލިބިފައިވާކަމަށް ކޯސްޓްގާޑުން ބުންޏެވެ.
އޭނާއާ ބެހޭ އެއްވެސް މަޢުލޫމާތެއް ލިބިއްޖެނަމަ ކޯސްޓްގާޑުގެ ހިލޭ ގުޅޭނަމްބަރު 191 ނުވަތަ 3395981 ،3398898 ނަންބަރަށް އަދި ވައިބަރ ކުރައްވާނަމަ 9931082 އަދި ފެކްސް ކުރައްވާނަމަ 3391665 ނަމްބަރަށް ފެކްސްކުރުމަށް އެމްއެންޑީއެފް އިން ވަނީ އެދިފައެވެ.
