ސިޔާސީ ޕާޓީތަކަށް ވަގަށް މީހުން ވެއްދުން ހުއްޓުވުމަށް އަމާޒު ކޮށްގެން، ޕާޓީތަކަށް މީހުން ވެއްދުމަށް ބޭނުންކުރާ ފޯމަށް އަންނަ ނޮވެމްބަރު މަހުން ފެށިގެން ބަދަލު ގެނައުމަށް އިލެކްޝަންސް ކޮމިޝަނުން ހާމަ ކޮށްފިއެވެ.
ބައެއް މީޑިއާތކަށް މައުލޫމާތު ދެއްވަމުން އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެފައިވާ ގޮތުގައި މިގޮތުން ގެންނަ އެންމެ ބޮޑު ބަދަލަކަށް ވެގެންދާނިީ ފޯމު ފުރާއިރު ފޯމު ފުރާމީހާގެ މަންމަގެ މައުލޫމާތު ފޯމުގައި ޖަހަން ޖެހުމެވެ.
އިލެކްޝަންސް ކޮމިޝަންއިން ގަބޫލުކުރާ ގޮތުގައި، މި މައުލޫމާތު ފޯރމުގައި ހިމެނުމުން ވަގަށް ފޯމުފުރާ މީހުންނަށް މިކަން ފަސޭހަކަމަކަށް ވެގެނެއް ނުދާނެއެވެ. އަދި މީގެ އިތުރުންވެސް އާ ފޯމުގެ ޒަރީއާއިން ޕާޓީއަކަށް ވަންނަން ބޭނުންވާ މީހާގެ ފޮޓޯވެސް އާ ފޯމުގައި ހިމަނާން ޖެހޭއިރު ހެކިވެރީންގެ ފިންގަ ޕްރިންޓްވެސް ފޯމުގައި ހިމަނާން ޖެހޭނެއެވެ.
އަދި މީގެ އިތުރުންވެސް، ޕާޓީތަކަށް ވަގަށް މީހުން ވެއްދުން ހުއްޓުވުމުގެ ގޮތުން، ޕާޓީތަކަށް މީހުން ރަޖިސްޓްރީ ކުރުމަށް ބޭނުންވާ ޚާއްސަ ޕޯޓަލްއެއް ގާއުމްކުރުމުގެ މަސައްކަތްވެސް ކުޔަށް ދާކަމުގައިވެސް ކޮމިޝަންއިން ހާމަ ކޮށްފައި ވެއެވެ. މި ޕޯޓަލްގެ މަސައްކަތް މިއަހަރުގެ ނިޔަލަށް ނިމޭއިރު، އެއަށްފަހު ސިޔާސީ ޕާޓީތަކަށް މީހުން ރަޖިސްޓްރީކުރުމަކީ އޮންލައިންކޮށް ކުރާންޖެހޭ މަސައްކަތަކަށް ބަދަލުވެގެން ދާނެއެވެ.
ސިޔާސީ ޕާޓީތައަކަށް ވަގަށް މީހަކު ވައްދައިފިނަމަ ކޮމިޝަށް ޝަކުވާ ހުށެޅުމުން ޖޫރިމަނާކުރުމުގެ ފުރުސަތު ކޮމިޝަންއަށް ގާނޫނުން ލިބިދީފައެވެ. އަދި މީގެ އިތުރުން ސިޔާސީ ޕާޓީއަކުން ހުށަހަޅާ ކޮންމެ ވަގު ފޯމަކަށް ފޯމު ހުށަހެޅި ސިޔާސީ ޕާޓީއެއް 10،000 ރުފިޔާއިންވެސް ޖޫރިމާނާ ކުރުމަށްވެސް ވަނީ ހަމަޖެހިގައެވެ.
