ރައްޔިތުންގެ މަޖިލީހުގައި އެންމެ އެދެވޭ ގޮތަށް ރައްޔިތުން ތަމްސީލުކުރެވޭނެ ގޮތެއް ހޯދައި، ދައުލަތަށް ބުރަ ނުވާގޮތަކަށް މަޖިލީހުގެ މެންބަރުންގެ ޢަދަދު ހިފަހައްޓައި، އެފަދަ ގޮތެއް ކަނޑައަޅަންޖެހިފައިވާ ކަމަށް އެމްއެންޕީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުޙައްމަދު ނާޒިމް ވިދާޅުވެއްޖެއެވެ.

ނާޒިމް މިހެން ވިދާޅުވީ މިހާރު މަޖިލީހުގެ ތަޅުމުގައި، އެމަޖިލީހުގެ މެންބަރުންގެ އަދަދު 87 ގައި ހިފެހެއްޓުމަށް ދިވެހިރާއްޖޭގެ ޤާނޫނު އަސާސީއަށް މާމިގިލީ ދާއިރާގެ މެމްބަރު ޤާސިމް އިބްރާހިމް ހުށަހެޅިފައިވާ އިޞްލާޙުގެ ބަޙުސްގައި މިއަދު ވާހަކަފުޅު ދައްކަވަމުންނެވެ.

ނާޒިމް ވިދާޅުވީ މިހާރު އޮންނަ ގޮތުން، ކޮންމެ 5 އަހަރަކުން މަޖިލީހުގެ ޢަދަދަށް ބަދަލު އަންނައިރު، މަޖިލީހުގައި މިހާރު ތިއްބަވާ 87 މެންބަރުންނަށްވެސް ދައުލަތުން ކުރާ ހޭދައަކީ މާ ބޮޑު މިންވަރެއް ކަމުގައެވެ. އަދި އެކަން އެހެން އޮތް އިރު، އެންމެ އެދެވޭ މިންވަރަށް މަސައްކަތް ނުކުރެވި، އެކަށީގެންވާ ނަތީޖާ މަޖިލީހުން ނުނެރެވޭކަމުގައެވެ.

ރައްޔިތުންގެ މަޖިލީހުގައި ރައްޔިތުން ތަމްސީލު ކުރެވޭނެ އެންމެ އެދެވޭ ރަނގަޅު ގޮތެއް ހޯދަންޖެހިފައިވާކަމަށް ވެސް މިއަދުގެ ބަޙުސްގައި ޕާޓީގެ ރައީސް ނާޒިމް ފާހަގަކުރެއްވިއެވެ. އެގޮތުން، ބައެއް ދާއިރާތަކުގައި ރަށްރަށް ވަކި ދާއިރާއަކަށް ލެވިފައިވާ ގޮތުން ރައްޔިތުންގެ ތަމްސީލުވުމުގައި ހުރި މައްސަލަތަކާއި، ދާދި ފަހުން ހުޅުމާލެ ދެވަނަ ފިޔަވަހީގައި އެތަކެއް ރައްޔިތުން އާބާދުވެ ދިރިއުޅެން ފަށާފައިވާއިރު އެ ރައްޔިތުންވެސް އެދެވޭ ގޮތަކަށް ތަމްސީލުކުރާނެ މަގެއް ހޯދަންޖެހޭ ކަމުގައި އެމަނިކުފާނު ފާހަގަކުރެއްވިއެވެ. ނާޒިމްގެ ވާހަކައިގައި އިތުރަށް ފާހަގަކުރެއްވި ގޮތުގައި މަޖިލީހުގެ މެންބަރުންނަށް މުސާރައާއި އޭގެ އިތުރުން ލިބޭ އެކިއެކި ޢިނާޔަތްތައްވެސް މާ ބޮޑުކަމަށާއި، ދައުލަތުގެ ވަޒީރުންނަށްވެސް މިވަރުގެ މުސާރައެއް ނުލިބޭތީ އެކަމަށް އިޝާރާތްކުރެއްވިއެވެ.

ދުނިޔޭގެ އެހެން ޤައުމުތަކުގައިވެސް މަޖިލިސް ނުވަތަ ޕާލިމެންޓް މެންބަރުން އެހާ ގިނަކޮށްފައިއެއް ނުވޭ، އަޅުގަނޑުމެން ބޭނުންވަނީ އެންމެ އެދެވޭ ގޮތަށް ރައްޔިތުން ތަމްސީލުކުރެވޭނެ ގޮތެއް ހޯދައި ހަމަޖެއްސުން.

– ނާޒިމް ވިދާޅުވިއެވެ.

ނާޒިމްގެ ވާހަކަ ނިންމަވާލެއްވުމުގެ ގޮތުން މަޖިލީހުގައި މި ބިލަށް ތާއީދުކުރައްވައި ކޮމެޓީ މަރުޙަލާގައި މުހިއްމު 2 ކަމަކަށް ރަނގަޅު ގޮތްތަކެއް ނިންމުމަށް އެދިވަޑައިގަތެވެ. އެއީ މަޖިލީހުގައި ރައްޔިތުން އެދެވޭ ގޮތުގައި ތަމްސީލު ކުރާނީ 5 ހާހުންތޯ، ނޫނީ 10 ހާހުންތޯ ނުވަތަ ކިހާ މިންވަރަކުންތޯ ރަނގަޅަށް ނިންމެވުމަށާއި، މަޖިލީހުގެ މެންބަރުންގެ ޢަދަދާއި މިކަމާ ގުޅޭ ކަންކަން ކަނޑައެޅުމުގައި ދައުލަތަށް މާލީ ބޮޑު ބުރައަކަށް ނުވާނެ ގޮތަކަށް މިކަން ހަމަޖެއްސުމުގެ ވިސްނުން ބެހެއްޓެވުމަށެވެ.