ދިމާވާ އެއްވެސް ހާލަތެއްގައި ކޮމްޕްރޮޒް ވެފައި އިންނަ މީހަކަށް ނުވާނެކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ގެއްލިގެން ހޯދަމުން ދަނިކޮށް ފެނިފައިވާ މުހައްމަދު އަޒުހާންގެ މަރާއި ގުޅޭގޮތުން ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ހުށަހެޅި މައްސަލާގައި ވާހަކަ ދައްކަވަމުން ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ރައީސް ނަޝީދަށާއި، ސަރުކާރަށްވެސް ވަރަށް ބޮޑަށް ފާޑު ވިދާޅުވެފައެވެ.
ޝިޔާމް ވިދާޅުވީ މަރުގެ މައްސަކަތައް ބެލުމުގައި ހެޔޮ ނިޔަތެއް ސަރުކާރުގައި އޮތްތަނެއް ނުފެންނަކަމަށެވެ. ފެންނަނީ ހުސްވާހަކަ ތަކެއް ދައްކާތަންކަމަށެވެ. މިފަދަ މައްސަލަތަކުގައި އެންމެ ރަނގަޅަށް މަސައްކަތް ކުރެވެން އޮތީ މަޖިލިސް ތެރެއިން ކަމަށްވާއިރު މަޖިލީހުގެ ރައީސަކީވެސް އަމިއްލަ ކޮއްކޮ ޖަލު އަދަބުން ސަލާމާތް ކުރުމަށާއި، މަޖިލީހުގެ ރައީސްކަމުގެ ގޮޑިން ބޭރު ކޮށްލަފާނެތީ ކޮމްޕްރޮމައިޒް ވަފައި އިންނެވި ބޭފުޅެއްކަމަށެވެ.
ޝިޔާމްގެ ވާހަކަ ތަކާއި ގުޅިގެން ރައީސް ނަޝީދު ވިދާޅުވީ އެއްވެސް މައްސަލައެއް އެމަނިކުފާނު ކޮމްޕްރޮމައިޒް ވެފައި ނީންނާނެކަމަށެވެ. އިތުބާރު ނެތްކަމުގެ މައްސަލައަކީ އަލިފުށީ ދާއިރާގެ މެމްބަރު މުޙައްމަދު ރަޝީދު ޙުސައިން އިސް ނަގައިގެން ކުރަން އުޅުނު ކަމެއްކަމަށާއި ނަމަވެސް އެކަމަށް ތާއީދު ކުރީ އެންމެ 12 މެމްބަރުން ކަމަށް ނަޝީދު ވިދާޅުވިއެވެ.
އަޅުގަނޑު ދުވަހަކުވެސް ކޮމްޕްރޮމައިޒް ވެފައި ނީންނާނެ. އަލިފުށީ ދާއިރާގެ މެމްބަރު އިސްކޮށް ހުންނަވައިގެން އިތުބާރު ނެތްކަމަށް ނަގަން އުޅުނު. 12 ވަރަކަށް މެމްބަރުން އޭގައި ސޮއި ކުރީ. މަޖިލީހުގެ އިތުބާރު އަޅުގަނޑަށް އެބައޮތް. މާސާފު ބޮޑު އައުލަބިއްޔަތަކުން އަޅުގަނޑަށް ތާއީދު އެބައޮތް. އެއްވެސް ކަމެއްގައި ކޮމްޕްރޮމައިޒް ވެފައި އަޅުގަނޑު ނީންނާނަން.
– ރައީސް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވި ނަމަވެސް މަޖިލީހުގެ މަސައްކަތަކުގައާއި، އެމަނިކުފާނު މީގެ ކުރިން ކުރެއްވި ބައެއް ސިޔާސީ މަސައްކަތްތަކުގައި އެމަނިކުފާނުގެ ކޮއްކޮ ނާޒިމް ސައްތާރު އެއްޖިއްސުން ގުޅުން ހިންގި މައްސަލަގައާއި، ބަރުލަމާނީ ވޯޓުގެ އިތުރުން މަޖިލީހުގެ ރައީސްކަމުގެ މަޤާމުން ވަކިކޮށްފާނެތީ މަސައްކަތުގައި ވަރަށް ބޮޑަށް ފަހަތަށް ޖެހިފައިވާކަމަށް ގިނަ ބަޔަކު ދަނީ ބުނަމުންނެވެ.
