ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްޞަ މަންދޫބެއްގެ ހައިސިއްޔަތުން ޖަޕާނުގެ ކުރީގެ ބޮޑުވަޒީރު ޝިންޒޯ އަބޭގެ ޖަނާޒާގައި ބައިވެރިވެވަޑައިގަތުމަށް މިނިސްޓަރ އޮފް ފޮރިން އެފެއާޒް ނ.ޢ.ޢ.ވ ޝާހިދު މިއަދު ފުރާވަޑައިގެންފިއެވެ.
މިނިސްޓަރ އޮފް ފޮރިން އެފެއާޒްގެ އަރިހުގައި ދިވެހިރާއްޖޭގެ އިއްޒަތްތެރިންގެ ވަފުދެއްވެސް މި ޖަނާޒާގައި ބައިވެރިވެވަޑައިގަތުމަށް މިހާރުވަނީ ފުރާވަޑައިގެންފައެވެ. ޝިންޒޯ އަބޭ އަވަހާރަވީ، 2022 ވަނަ އަހަރުގެ ޖުލައި މަހުގެ 8 ވަނަ ދުވަހު ކުރިއަށްދިޔަ އާންމު އެއްވުމެއްގައި ޝިންޒޯ އަބޭއަށް އަމާޒުކޮށް މީހަކުދިން ބަޑީގެ ހަމަލާއަކާ ގުޅިގެން ލިބުނު ޒަޚަމްތަކުގެ ސަބަބުންނެވެ.
އަބޭއަށް ހަމަލާ ދީފައި ވަނީ އަބޭގެ ފުރަގަހުގައި ހުރި މީހެކެވެ. ޓުޓްސޫޔާ ޔަމަގާމީ ކިޔާ މި މީހާ އަބޭއަށް ހަމަލާ ދިނުމަށް ބޭނުންކޮށްފައި ވަނީ އަމިއްލަ ތައްޔާރުކޮށްފައިވާ ބަޑިއެއް ކަމަށް ޖަޕާނުގެ ފުލުހުން ބުނެއެވެ. 41 އަހަރުގެ ޔަމަގާމީވަނީ ވަގުތުން ހައްޔަރު ކޮށްފައި ކަމަށް ވެސް ފުލުހުން ބުނެއެވެ. ޝިންޒޯ އަބޭއަކީ، ޖަޕާނު ސަރުކާރަށް އެންމެ ދިގު މުއްދަތަކަށް ޚިދުމަތް ކުރެއްވި ބޮޑުވަޒީރެވެ. އެގޮތުން ދެ ފަހަރެއްގެ މަތިން 11 އަހަރު ވަންދެން، ޖަޕާނުގެ ބޮޑުވަޒީރުކަން ޝިންޒޯ އަބޭވަނީ ކުރައްވާފައެވެ. މަޤާމުން އިސްތިއުފާ ދެއްވީ 2020ވަނަ އަހަރުއެވެ.
ޖަޕާނުގެ ކުރީގެ ބޮޑުވަޒީރު ޝިންޒޯ އަބޭގެ ޖަނާޒާ މާދަމާ ޖަޕާނުގެ ވެރިރަށް ޓޯކިޔޯގައި ބާއްވާއިރު، މި ޖަނާޒާގައި ބޭރުގެ ގިނަ އަދަދެއްގެ އިއްޒަތްތެރިންނާއި ސްޓޭޓްތަކުގެ ލީޑަރުން ބައިވެރިވެވަޑައިގަންނަވާނެއެވެ.
