އިސްލާމީ ފަތުވާދޭ އެންމެ މަތީ މަޖިލީހުގެ ދައުރު ހަމަވެ އެތައް ދުވަހެއް ވެގެންދާއިރުވެސް ފަތުވާދޭ މަޖިލިސް އެކުލަވާ ނުލާތީ ވީހާވެސް އަވަހަކަށް އިސްލާމީ ފަތުވާދޭ މަޖިލިސް އެކުލަވާލުމަށް ގޮވާލައި މަޖިލީހަށް މައްސަލައެއް ހުށަހަޅައިފިއެވެ.
މިމައްސަލަ ހުށަހެޅުއްވީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފެވެ. އޭނަ ހުށަހެޅި މައްސަލާގައި ބުނެފައިވަނީ ރާއްޖޭގެ ދީނީ އެއްބައިވަންތަ ކަމުގެ ޤާނޫނަށް ދެވަނަ އިސްލާހު ގެނައުމުގެ ޤާނޫނުން އެޤާނޫނުގެ 5 ވަނަ މާއްދާއަށް ގެނެވުނު އިސްލާހުގެ ދަށުން ރާއްޖޭގައި ދީނީ ގޮތުން ޚިޔާލު ތަފާތުވުން އުފެދޭ ކަންކަމުގައި ސަރުކާރަށާއި ދިވެހި ރައްޔިތުންނަށް ދީނީ ފަތުވާ ފޯރުކޮށް ދިނުމަށާއި ފިގުހީ އައު މައްސަލަތައް ދިރާސާކޮށް އެކަންކަމުގެ ދީނީ ލަފާ ފޯރުކޮށް ދިނުމަށް ރައީސް ޔާމީންގެ ސަރުކާރުން އެފެއްދެވި "އިސްލާމީ ފަތުވާދޭ އެންމެ މަތީ މަޖިލިސް"ގެ 5 އަހަރުގެ ފުރަތަމަ ދައުރު ހަމަވެ އެތައް ދުވަހެއް ފާއިތުވެގެންދާއިރުވެސް ކޯލިޝަން ސަރުކާރުން އެމަޖިލިސް އެކުލަވާލެވިފައި ނުވާކަމަށެވެ.
ބަވަނަ ވެފައިވާ ދުނިޔޭގައި، ގުޅިލާމެހިފައިވާ ގޮތެއްގައި ދިރިއުޅެންޖެހިފައިވާ ދިވެހިންނަށް އެކިގޮތްގޮތުން ފޯރަމުންދާ ނުފޫޒުތަކުގެ ސަރުކާރުން ރާއްޖޭގައި ދީނީ ޚިލާފްތަކާއި ހަރުކަށި ފިކުރު އިތުރުވެ ދީނީ ގޮތުން ޚިލާފް އުފެދޭ ބޮޑެތި މައްސަލަތަކުގައި އަމަލު ކުރަންވީގޮތުން އޮޅި، އެކި މީހުން އެކި ފަތުވާ ނެރުމުގެ ސަބަބުން ދިވެހިންގެ މެދުގައި ބައިބައިވުން އުފެދި، އިޖުތިމައީ މައްސަލަތައް އުފެދެމުންދާކަމަށެވެ.
ޖިނާއީ ކުށްތަކަށް އަރައިގަނެ މީހުންގެ ލޭހުއްދަކޮށް، ނިރުބަވެރި އަމަލުތައް ހިނަގައި، ރާއްޖޭގައި ޤައުމީ ސަލާމަތަށް ނުރައްކާވާފަދަ ކަންކަން ހިނގަމުންދާއިރުވެސް ގާނޫނުގައި ބަޔާންކުރާ އިސްލާމީ ފަތުވާދޭ އެންމެ މަތީ މަޖިލިސް އެކުލަވައި ނުލުމާއި މަޖިލީހުގެ ބޭނުން ކޯލިޝަން ސަރުކާރުން ނުހިފާތީ. އާދަމް ޝަރީފްގެ މައްސަލާގައި ބުނެފައިވެއެވެ.
ރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ޤާނޫނަށް ގެނެވުނު އިސްލާހާއި ގުޅިގެން އެޤާނޫނުގެ 11 ވަނަ މާއްދާގެ ދަށުން ރައީސުލްޖުމްހޫރިއްޔާ އައްޔަންކުރުމަށް ލާޒިމްކުރާ އިސްލާމީ ފަތުވާދޭ އެންމެ މަތީ މަޖިލީހުގެ މެމްބަރުން އައްޔަންކޮށް އެމަޖިލިސް އެކުލަވާލައި އެމަޖިލިސް ހިންގޭނެ އިންތިޒާމުތައް ވީހާވެސް އަވަހަށް ހަމަޖެއްސުމަށް މިމައްސަލަގައި ވަނީ ގޮވާލާފައެވެ.
