މާލެ ސިޓީގައި ދިރިއުޅޭ ހުރިހާ ރައްޔިތުންވެސް ބޯހިމެނުމުގައި ބައިވެރިވުމަށް މާލެ ސިޓީގެ މޭޔަރު ޑރ. މުޙައްމަދު މުޢިއްޒު އެދިލައްވައިފިއެވެ.
ބޯހިމެނުުގައި މާލެ ސިޓީގެ ހުރިހާ ރައްޔިތުން އެއްބާރުލުން ދެއްވުމާއި ގުޅޭގޮތުން މޭޔަރު ވަނީ ވީޑިއޯއެއް ޓްވިޓާގައި ހިއްސާ ކުރައްވާފައެވެ. އެ ވީޑިއޯގައި މޭޔަރު ވިދާޅުވީ މާލެ ސިޓީ އާއި ވިލިމާލެ އަދި ހުޅުމާލޭގެ އާބާދީގެ މަޢުލޫމާތަކީ ވަރަށް މުޙިއްމު މަޢުލޫމާތެއް ކަމަށާއި، އެ ހުރިހާ މަޢުލޫމާތެއް ހޯދޭނީ ބޯހިމެނުމުގެ ތެރެއިން ކަމަށެވެ.
ބޯހިމެނުމަކީ ޤައުމީ މަސައްކަތެއް ކަމަށާއި، ޤައުމުގެ ކުރިމަގަށްޓަކައި މި މަޢުލޫމަތަކީ ވަރަށް މުޙިއްމު މަޢުލޫމާތެއް ކަމުގައި މޭޔަރު ވިދާޅުވިއެވެ. އަދި އެމަނިކުފާނުވެސް ބޯހިމެނުމުގައި މިހާރު ބައިވެރިވެވަޑައިގަނެފައިވާކަން ފާހަގަ ކޮށްލެއްވިއެވެ.
8 އަހަރަށްފަހު ރާއްޖޭގައި ބޯހިމެނުމުގެ މަސައްކަތް މިހާރު ފަށައިގެން ކުރިއަށްދާއިރު، ޤައުމުގެ ކުރިމަގު ބިނާކުރުމުގައި ބޯހިމެނުމުން އެއްކުރެވޭ މަޢުލޫމާތުތައް ބޮޑު އެހީއަކަށްވާނެއެވެ. މާޒީއަށްބަލާއިރުވެސް އެކި ސަރުކާރުތަކުން ބަޖެޓާއި، ރައްޔިތުންނާގުޅުން ހުރި ސިޔާސަތުތަކާއި ތަރައްޤީގެ މަޝްރޫޢުތައް އެކުލަވާލުމުގައި ބޯހިމެނުމުން އެއްކުރެވޭ މަޢުލޫމާތުތަކަށް ވަރަށް ބޮޑަށް ބަރޯސާވެފައިވެއެވެ.
މިމަހުގެ 13 އިން ފެށިގެން ބޯހިމެނުމުގެ މަސައްކަތްތައް ރާއްޖޭގައި ފަށާފައިވާއިރު، އެންމެ ފުރަތަމަ ކުރިއަށްގެންގޮސްފައިވަނީ ގޭބިސީތަކާއި މަސައްކަތްކުރާ ތަންތަން ލިސްޓު ކުރުމުގެ މަސައްކަތެވެ. އަދި މިއަދުން ފެށިގެން ބޯހިމެނުމުގެ ތަފްޞީލު މަޢުލޫމާތު ގޭބިސީތަކުންނާއި މަސައްކަތްކުރާ ތަންތަނުން ނެގުން މިމަހުގެ 27ގެ ނިޔަލަށް ކުރިއަށްދާނެއެވެ.
މި މަސައްކަތުގައި ރައްޔިތުންގެ ފަރާތުން މިހާތަނަށްވެސް ވަރަށް ފުރިހަމަ އެއްބާރުލުމެއް ލިބެމުންދާކަން މޯލްޑިވްސް ބިއުރޯ އޮފް ސްޓެޓިސްޓިކްސްއިން ފާހަގަކުރެއެވެ.
