ވިލިގިލީ ކައުންސިލަށް ގެނައި ޕިކަޕެއްގެ މައްސަލަ އޭސީސީއަށް ހުށަހަޅައިފި

ގއ. ވިލިގިލީ ކައުންސިލަށް ގަތުމަށް އެކައުންސިލުން އިއުލާންކޮށް، އެރަށަށް ގެންގޮސްފައިވާ ޑަމްޕް ލޮރީއެއްގެ މައްސަލަ އަމިއްލަ ފަރާތަކުން އޭސީސީއަށް ހުށަހަޅައިފިއެވެ.

ވިލިގިލީގެ އަމިއްލަ ފަރާތަކުން އޭސީސީގެ ރައީސަށް އެޑްރެސްކޮށް ފޮނުވާފައިވާ މި ސިޓީގައި ބަޔާން ކޮށްފައިވަނީ، ގއ. ވިލިގިލީ ކައުންސިލަށް ޑަމްޕް ޓްރަކެއް ސަޕްލައި ކޮށްދިނުމަށް އަގު ހުށަހަޅާފައިވާ 3 ފަރާތުގެ ތެރެއިން އެންމެ ބޮޑު އަގު ހުށަހެޅި "ސެންޓިވިސް"އަށް އެސްޓިމޭޓް ކާމިޔާބުވި ކަމަށް ކަނޑައަޅައި، 20 ދުވަހުގެ ތެރޭގައި ޑަމްޕް ޓްރަކް ސަޕްލައި ކޮށްދިނުމަށް އެ ފަރާތާއެކު ވެފައިވާ އެއްބަސްވުމުގެ މުއްދަތު ހަމަވި ދުވަސް ކަމުގައިވާ، 14 ސެޕްޓެމްބަރު 2022 ވަނަ ދުވަހުގައި، އިތުރު 3 ދުވަހުގެ މުއްދަތެއް ދިނުމަށް އެދި 14 ޖުލައި 2022ގެ ތާރީޚުގައި ވިލިގިލީ ކައުންސިލަށް ސެންޓިވިސް ކުންފުނިން ސިޓީ ފޮނުވާފައި ވާކަމުގައެވެ.

އެހެންނަމަވެސް މި ސިޓީއާއި ގުޅޭގޮތުން ވިލިގިލީ ކައުންސިލުން ގޮތެއް ނިންމާފައި ނުވާއިރު، ކައުންސިލުން ހޯދަން އިއުލާންކުރި ޝަރުތު ފުރިހަމަ ނުވާ ޕިކަޕެއް ،18 ސެޕްޓެމްބަރ 2022 ވަނަ ދުވަހު ވިލިގިއްޔަށް ގެންގޮސްފައިވާ ކަމުގައިވެސް އޭސީސީއަށް އަމިއްލަ ފަރާތުން ފޮނުވާފައި ސިޓީގައި ފާހަގަ ކޮށްފައި ވެއެވެ.

އަދި މިސިޓީގައި އެދިފައިވަނީ، ރާއްޖެއިން ބޭރުން ގެންނަ އައު ޕިކަޕްއެއް އެންމެ 20 ދުވަހުގެ ތެރޭގައި އެރަށަށް ގެންގޮސްދޭނަކަމަށް ބިޑްގައި ޖަހައިގެން މި ބިޑް ކާމިޔާބު ކޮށްފައިވާ މައްސަލަ ސީރިއަސް މައްސަލައެއްގެ ގޮތުގައި ބަލައި ދިނުމަށެވެ. އޭގެ އިތުރުން، 18 ސެޕްޓެމްބަރުގައި ވިލިގިއްޔަށް ގެންގޮސްފައި އޮތް އެ ޕިކަޕަކީ އެންމެ 4 ވަރަކަށް ލައްކަ ރުފިޔާއަށް ބާޒާރުން ލިބޭ ވެހިކަލަކަށް ވާއިރު، 1.38 މިލިއަން ރުފިޔާއަށް މި ޕްރޮޖެކްޓް އެވާރޑް ކުރުމުގައި ކައުންސިލްގެ ރައީސްއާއި ބިޑް ކޮމޓީގެ ވަރަށް ބޮޑު އިހުމާލެއް އޮތްކަމަށް އެރަށުގެ ރައްޔިތުންގެ އިތުރުން ކައުންސިލްގެ ބައެއް މެމްބަރުންވެސް ތުހުމަތު ކުރާތީ، އެއް މައްސަލަވެސް އަވަސް މައްސަލައެއްގެ ގޮތުގައި ބަލުމުގެ އިތުރުން، މައްސަލަ ނިމެންދެން ޕިކަޕް ކައުންސިލަށް ބަލައިތުން މަޑުޖައްސުވައި ދިނުމަށް ވިލިގިލީ ކައުންސިލަށް އަންވާ ދެއްވުމަށްވެސް ޝަކުވާ ހުށަހެޅި ފަރާތުން އޭސީސީގެ ކިބައިން އެދިފައި ވެއެވެ.

މައުލޫމާތު ލިބިފައިވާގޮތުގައި، 1.38 މިލިއަން ރުފިޔާއަށް އެވާރޑް ކޮށްގެން ވިލިގިއްޔަށް ގެންގޮސްފައިވަނީ އެންމެ 4 ވަރަކަށް ލައްކަ ރުފިޔާއަށް ގަންނަން ލިބޭވަރުގެ، އަދި އިއުލާންކުރި ޝަރުތު ފުރިހަމަ ނުވާ ޕިކަޕްއެކެވެ. އަދި މިކަމާއި ގުޅިގެން ވިލިގިލީގެ ބައެއް ރައްޔިތުންނާއި، ކައުންސިލްގެ ބައެއް މެމްބަރުންނާއި، އަދި މުވައްޒަފުން އެކަމާ ހިންހަމަ ނުޖެހި ބޮޑު ހަމަނުޖެހުމަކަށް ދިއުމާއެކު، ރަށު ކައުންސިލުން މިހާރު ނިންމާފައިވަނީ އެ އުޅަނދު ކައުންސިލަށް ބަލައި ނުގަތުމަށެވެ.