ހ. ޒާހަމްގައި ހަދަމުން އަންނަ 10 ބުރީގެ އިމާރާތުގެ ހަވަނަ ފަންގިފިލާއިން ވެއްޓުނު ތިން ފޫޓުގެ ދަނގަޑެއް ބިދޭސީ މީހެއްގެ މޫނަށްހެރި ލިބިފައިވާ ޒަހަމްތަކާއި ގުޅިގެން ކުރި އޮޕަރޭޝަނަށްފަހު އޭނާއަށް އައިސީޔޫގައި ފަރުވާދޭން ފަށައިފިއެވެ.
އެ ހާދިސާ ހިނގި ވަގުތު ނަގާފައިވާ ވީޑިއޯތަކުން ފެންނަ ގޮތުގައި ދަގަނޑު ހެރުނު ފަހުން ވެސް އޭނާގެ ހޭ ހުއްޓެވެ. ހޮސްޕިޓަލަށް ގެންދަން އުޅުނު އިރު އޭނާ ހުރީ ވެސް ކޮޅަށެވެ. ސޯޝަލް މީޑިއާގައި އާންމުވެފައިވާ ވީޑިއޯއިން ފެންނަގޮތުގައި ނޭފަތާ ދިމާލުން ދަގަނޑު ވަދެފައި ހުރިއިރު ހަށިގަނޑުން ބޭރަށް ފެންނަން އިނީ އެ ދަގަނޑުގެ ކައިވަތެއްހާ ތަނެވެ.
އޭޑީކޭ ހޮސްޕިޓަލުގެ މެނޭޖިންގ ޑިރެކްޓަރ އަހުމަދު އަފްޢާލް ވިދާޅުވީ، އެ ދަގަނޑުގެ ސަބަބުން އޭނާގެ އެތެރެހައްޓަށް ވަރަށް ބޮޑެތި ޒަޚަމްތަކެއް ވެފައިވާކަމަށެވެ. އެމީހާގެ ހަށިގަނޑުން ދަގަނޑު ނަގައި އޭނާގެ އެތެރެހައްޓަށް ލިބިފައިވާ ގެއްލުންތަކުގެ ތެރެއިން މިހާތަނަށް ދެނެގަނެވުނު ކަންތައްތަކަށް ފަރުވާދިނުމަށް ހަދަން ޖެހޭ ސަރޖަރީތައް މިހާރު ހަދާފައިވާ ކަމަށް އޭނާ ވިދާޅުވިއެވެ. އެގޮތުން އެ ސާޖަރީތަކަށް 8 ގަޑި އިރު ހޭދަވި ކަމަށާއި، އޭގެ ފަހުން މިހާރު އޭނާއަށް ފަރުވާދެމުން އަންނަނީ އައިސީޔޫގައި ކަމަށް ވިދާޅުވިއެވެ.
ހ. ހާޒަމްގައި ހަދާ 10 ބުރީގެ އިމާރާތުގެ މަސައްކަތް ކުރަމުން އަންނަނީ އާރްސީސީ އިންނެވެ.
