"ޒުވާނުންގެ އިނާމް"އަށް ނަން ހުށަހެޅުމުގެ ފުރުޞަތު ހުޅުވާލައިފިއެވެ.
މިއެވޯޑަކީ ޤައުމީ ޒުވާނުންގެ ދުވަހާ ގުޅުވައިގެން ދޭ އެވޯޑެކެވެ. ރާއްޖޭގައި މީގެކުރިން ޒުވާނުންގެ ދުވަސް ފާހަގަކުރަމުން އައިސްފައިވަނީ ބައިނަލްއަޤްވާމީ ޒުވާނުންގެ ދުވަސް، 12 އޮގަސްޓްގައެވެ. ޤައުމީ ފެންވަރުގައި ރާއްޖެއިން ޒުވާނުންގެ ދުވަހެއް ފާހަގަކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމެވީ 2019ވަނަ އަހަރުގެ ޑިސެމްބަރު މަހުއެވެ. ޤައުމީ ޒުވާނުންގެ ދުވަހުގެ ގޮތުގައި ހަމަޖައްސަވާފައިވަނީ 22 އޮކްޓޯބަރެވެ.
މިއާއެކު ސަރުކާރުން ވަނީ "ޒުވާނުންގެ އެވޯޑް" ދިނުމަށްވެސް ނިންމާފައެވެ. މިއަހަރުގެ ޒުވާނުންގެ އެވޯޑަށް ނަން ހުށައެޅުވުމުގެ ފުރުޞަތު މިނިސްޓްރީ އޮފް ޔޫތް ސްޕޯޓް އެންޑް ކޮމިއުނިޓީ އެމްޕަވަމަންޓުން މިވަނީ ހުޅުވާލާފައެވެ.
ޒުވާނުންގެ އެވޯޑަކީ ތަފާތު ދާއިރާތަކުން ޤައުމުގެ ތަރައްޤީއަށް ޒުވާނުންކުރާ އަގުހުރި މަސައްކަތްތައް ފާހަގަކޮށް ހިތްވަރު ދިނުމުގެ ގޮތުން ދެވޭ އެވޯޑެކެވެ. އަދި މި އިނާމަކީ ޤައުމުގެ ތަރައްޤީގައި ޒުވާނުން އަދާކުރާ މުހިންމު ދައުރު ފާހަގަކޮށް ޒުވާނުންނަކީ މުޖުތަމަޢަށް ފައިދާހުރި، އުފެއްދުންތެރި، ޒިންމާދާރު ބަޔަކަށް ހެދުމަށް ބާރުއަޅައި، ވާގި ދިނުމުގެ ގޮތުން ދެވޭ އެވޯޑެކެވެ.
މިފަހަރުގެ އެވޯޑަށް 18 ދާއިރާއިން ކުރިމަތިލުމަށް ވަނީ ހުޅުވާލާފައެވެ.
ޒުވާނުންގެ އިނާމަށް ހުޅުވާލާ ދައިރާތައް:
1. ވިޔަފާރިއާއި އިޤްތިޞާދު
2. އާރޓް – ފަންނުވެރި ޒުވާނާ
3. މަސްތުވާތަކެއްޗާ ދެކޮޅަށް މަސައްކަތްކުރުން
4. ޞިއްޙީ ނުރަނގަޅު އާދަތަކާއި ދެކޮޅަށް މަސައްކަތްކުރުން
5. ކުޅިވަރަށް ޚިދުމަތްކުރުން
6. ދަރުމަވެރިކަން
7. ވޮކޭޝަނަލް ޓްރެއިނިންގް – ދަސްކޮށްދިނުން
8. ނަފްސާނީ ދުޅަހެޔޮ ސިއްޙަތެއް ބިނާ ކުރުމަށް މަސައްކަތް ކުރުން
9. ތިމާވެށި ހިމާޔަތް ކުރުމަށް މަސައްކަތް ކުރުން
10. މަސްވެރިކަމުގެ ދާއިރާ
11. ދަނޑުވެރިކަމުގެ ދާއިރާ
12. މިންތީގެ ހަމަހަމަކަން ޤާއިމް ކުރުމަށް މަސައްކަތްކުރުން
13. ނުކުޅެދުންތެރިކަން ހުންނަ ފަރާތްތަކުގެ ބާރުވެރިކަން އިތުރު ކުރުމަށް މަސައްކަތްކުރުން
14. ޒުވާނުންގެ ބާރުވެރިކަން އިތުރުކުރުމަށް މަސައްކަތްކުރުން
15. ހަށިހެޔޮ ދުޅަހެޔޮ ސިއްޙަތެއް ބިނާކުރުމަށް މަސައްކަތްކުރުން
16. ދިވެހިބަހާއި ޘަޤާފަތަށް ޚިދުމަތްކުރުން
17. ޝަހީދު ޖަވާދު ޢުމަރުގެ ހަނދާނީފިލާ
18. ނޭޝަނަލް ޔޫތު ވޮލަންޓި
އަދި ޚާއްސަ އިނާމު (ޝަހީދު ޖަވާދު ޢުމަތުގެ ހަނދާނީ ފިލާ) އާއި، ނެޝަނަލް ޔޫތް ވޮލަންޓިއަރ ޕްރޮގްރާމްގެ ތެރެއިން މިނިސްޓްރީ އޮފް ޔޫތް ސްޕޯޓްސް އެންްޑް ކޮމިއުނިޓީ އެމްޕަވަމަންޓުން ދެއްވާ ޚާއްސަ އިނާމު ހިމެނެއެވެ.
ޒުވާނުންގެ އިނާމާ ގުޅޭ ތަންސީލްތަކާއި، މާކްސް ދޭނެ ގޮތުގެ ތަފްސީލް ގެޒެޓްގައި ވަނީ އާއްމުކޮށްފައެވެ. އިނާމަށް ނަން ހުށައެޅުމަށް ޝަރުތު ހަމަވާ ފަރާތްތަކުން، މިމަހުގެ 29ވަނަ ދުވަހުގެ 13:00ގެ ކުރިން ފޯމް ހުށައަޅަން ޖެހޭނެއެވެ.
