މާލޭ ސިޓީގައި މިނީ ބަހުގެ ޚިދުމަތް ދޭން ފެށިފަހުން، ބަސް ދަތުރުކުރާ ރޫޓުތަކުގައި ޤަވާއިދާ ޚިލާފަށް ޕާކުކޮށްގެން މިހާތަނަށް 500 އަށްވުރެ ގިނަ އުޅަނދުގައި ސްޓިކަރ ޖަހާ، 31 އުޅަނދެއް ޓޯކޮށްފިއެވެ.
އެމް.ޓީ.ސީ.ސީގެ "ރާއްޖެ ޓްރާންސްޕޯޓް ލިންކް"ގެ ދަށުން މާލޭ ސިޓީގައި މިނީ ބަހުގެ ޚިދުމަތްދޭން ފަށާފައިވަނީ މިމަހުގެ 6 ވަނަ ދުވަހުއެވެ. ފުރަތަމަ ދެ ހަފްތާގައި މި ޚިދުމަތް ދިނުމަށް ނިންމާފައިވަނީ މުޅިން ހިލޭއެވެ. އެއަށްފަހު ދަތުރަކަށް 7 ރުފިޔާ ނަގާގޮތަށް ވަނީ ހަމަޖެހިފައެވެ. އެހެންނަމަވެސް ސްކޫލް ކުދިންނާއި، 65 އަހަރުން މަތީގެ މީހުންނާއި ޚާއްސަ އެހީއަށް ބޭނުންވާ ފަރާތްތަކަށް މި ޚިދުމަތް ހިލޭ ލިބިގެންދާނެއެވެ.
މާލޭގައި މިނީ ބަހުގެ ޚިދުމަތް ދޭން ފެށިތާ ހަފްތާއަކާ ގާތްވެފައިވާއިރު، މި ޚިދުމަތް ހޯދާ މީހުންގެ ޢަދަދު ދުވަހުން ދުވަހަށް އިތުރުވެ، ޚިދުމަތަށް އޮންނަ ޑިމާންޑް ބޮޑުވަމުންދާކަން އެމް.ޓީ.ސީ.ސީން ފާހަގަކުރައްވައެވެ. އެހެންނަމަވެސް މި ޚިދުމަތް އެންމެ ފުރިހަމަގޮތުގައި ފޯރުކޮށްދިނުމަށްޓަކާ އަދިވެސް އާއްމުންގެ ފަރާތުން ވަރަށް ބޮޑު އެހީތެރިކަމަކާ އެއްބާރުލުމެއް ބޭނުންވާކަމަށް އެކުންފުނިން ވިދާޅުވެއެވެ. ވަކިން ޚާއްސަކޮށް މަގުމަތީގެ ޤަވާއިދުތަކާ އެއްގޮތަށް ހުރިހާ ފަރާތްތަކަކުންވެސް އަމަލުކުރުމަށް އެމް.ޓީ.ސީ.ސީން އަންނަނީ ބާރު އަޅަމުންނެވެ.
މާލޭގައި @RTLnetwork އިން ފޯރުކޮށްދެމުންދާ މިނީ ބަހުގެ ޚިދުމަތް އޮމާންކަމާއެކު ކުރިއަށް ގެންދިއުމަށްޓަކައި ފުލުހުން ކުރަމުންގެންދާ މަސައްކަތުގެ އަދާހަމަ! #އެންމެންގެލާބައަށް މަގުމަތި ބޭނުންކުރުމުގެ ރީތި އާދަތަކަށް ލޯބިކުރަމާ! pic.twitter.com/l623ekc43j
— Maldives Police (@PoliceMv) September 11, 2022
ބަސް ސްޓޮޕްތައް ކައިރީ ވެހިކަލް ޕާކުކުރުމާއި މަޑުކުރުން، ބަސްތަކަށް ދަތިވާގޮތަށް ޚާއްސަކޮށް ކަންކަން މަތީ އުޅަނދުތައް ޕާކުކުރުމާއި، އެކަށީގެންވާ ދުރުމިނެއް ނުބަހައްޓާ ބަސްތައް ކައިރިން ދަތުރުކުރުމާއި، ޤަވާއިދާ ޚިލާފަށް އޯވަޓޭކްކުރަން އުޅުންފަދަ ކަންކަން ނުކުރުމަށް އެމް.ޓީ.ސީ.ސީގެ އިތުރުން ފުލުހުންވެސް ތަކުރާރުކޮށް ދަނީ އިލްތިމާސްކުރަމުންނެވެ. އަދި މިފަދަ ކަންކަން ކުރާނަމަ، ކަނޑައެޅިފައި އޮންނަ އުޞޫލުގެ ތެރެއިން އަޅަންޖެހޭ ފިޔަވަޅުތައް އަޅަމުންދާނެކަމަށް ފުލުހުން ވިދާޅުވެއެވެ.
އެގޮތުން މިނީ ބަސް ރޫޓްގައި ޕާކުކުރުން މަނާކުރުމާ ގުޅިގެން އެކަން ތަންފީޒުކުރުމަށް ފުލުހުން ކުރަމުންދާ މަސައްކަތުގެ ދަށުން މިމަހުގެ 6 އިން 10ގެ ނިޔަލަށް 30 ސައިކަލަކާއި އެއް ކާރު ޓޯކޮށްފައިވާކަމަށް ފުލުހުން ވިދާޅުވެއެވެ. އަދި ބަސްތަކަށް ދަތުރުކުރުމުގައި ދަތިވާގޮތަށް ޕާކުކުރި 538 އުޅަނދެއްގައި ވައިލޭޝަން ސްޓިކަރ ހަރުކޮށްފައިވާކަމަށް ފުލުހުން ވިދާޅުވެއެވެ.
މިނީ ބަސްތައް ދަތުރުކުރާ ރޫޓަށް ދަތިވާގޮތަށް ޕާކުކޮށްފައި ހުންނަ އުޅަނދުތަކުގައި ވައިލޭޝަން ސްޓިކަރ ޖަހަމުންދާނެކަމަށް ފުލުހުން ވިދާޅުވެފައިވެއެވެ. އަދި އެފަދަ އުޅަނދުތައް ޓޯކުރަން ޖެހިއްޖެ ޙާލަތެއްގައި އެކަންވެސް ކުރާނެކަމަށް ފުލުހުން ވިދާޅުވެފައިވެއެވެ.
