މާދަމާ ހައްދުން މަތީ ގަމުގައި ފެށުމަށް ހަމަޖެހިފައިވާ "ވިއަވަތި ކޮންފަރެންސް" ގައި ބައިވެރިވެ ވަަޑައިގެންނެވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ހައްދުއްމައްޗަށް ވަޑައިގެންނެވުމުން ހޫނު މަރުހަބާއެއް ދަންނަވައިފިއެވެ.
ކައްދޫ އެއްޕޯޓް ސަރަހައްދުން ރައީސުލްޖުމްހޫރިއްޔާއަށް މަރުހަބާ ދެންނެވުމަށްޓަކައި ލ.އަތޮޅުގެ ގިނަ އަދަދެއްގެ ބަޔަކު ވަނީ ޖަމާވެފައެވެ. ވިއަވެތި ކޮންފަރެންސް ފެށުމަށް ހަމަޖެހިފައިވަނީ މާދަމާ ހެދުނުވެ. ނަމަވެސް މިއަދު ހަވީރު ކުރިއަށް ގެންދިއުމަށް ހަމަޖެހިފައިވާ ކުޅިވަރު ހަރަކާތްތަކުގައިވެސް ރައީސުލްޖުމްހޫރިއްޔާ ބައިވެރިވެ ވަޑައިގަތުމަށް ވަނީ ހަމަޖެހިފައެވެ.
"ވިއަވަތި ރާއްޖެ" ކޮންފަރެންސްގެ މައިގަނޑު މަޤްޞަދަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދިވެހިރާއްޖޭގެ ލާމަރުކަޒީ ނިޒާމު ފުރިހަމަކުރައްވައި ކައުންސިލުތައް ބާރުވެރިކުރުމަށް ފަށްޓަވާފައިވާ މަސައްކަތް އިތުރަށް ހަރުދަނާކުރެއްވުމެވެ. އަދި ރާއްޖޭގެ ލާމަރުކަޒީ ނިޒާމުގެ ހަޤީޤީ މަންފާ ކައުންސިލުތަކަށް ލިބިދިނުމަށް، ޤާނޫނަށް ގެނައި އިސްލާހުތަކަށް ކައުންސިލްތައް އަހުލުވެރިކުރުމެވެ.
— The President's Office (@presidencymv) September 10, 2022
އިދާރީ ގޮތުންނާއި މާލީ ގޮތުން ކައުންސިލްތަކަށް ލިބިފައިވާ ބާރުތައް، ތަންފީޒުކުރުމުގެ ކަންކަން ކުރިޔަށްދާގޮތް ގާތުން ބެއްލެވުމާއި އެކަމުގައި ކުރިމަތިވާ ގޮންޖެހުންތައް ޙައްލުކޮށްދިނުމުގެ ގޮތުން ރައީސުލްޖުމްހޫރިއްޔާއާއި ކަމާބެހޭ ވަޒީރުންނާއި މަޝްވަރާކޮށް ގޮތްތަކެއް ހޯދުމަށް މަގުފަހިކޮށްދިނުމަކީވެސް ކޮންފަރެންސްގެ މުހިންމު ބޭނުމެކެވެ.
ވިއަވަތި ދެވަނަ ކޮންފަރެންސް މިމަހުގެ 10އިން 12އަށް ލ.ގަމުގައި ބޭއްވުމަށް ހަމަޖެހިފައިވާއިރު، މިކޮންފަރެންސްގައި ރާއްޖޭގެ ދެކުނުގެ އަތޮޅުތަކުގެތެރެއިން ދ.އަތޮޅާއި، ތ.އަތޮޅާއި، ލ.އަތޮޅާއި، ގއ.އަދި ގދ.އަތޮޅުގެ އިތުރުން ދެކުނުގެ ބޮޑު ދެސިޓީކަމަށްވާ އައްޑޫ ސިޓީއާއި ފުވައްމުލައް ސިޓީއިންވެސް މިކޮންފަރެންސްގައި ބައިވެރިވުމަށްވަނީ ހަމަޖެހިފައެވެ.
މިގޮތުން ސިޓީތަކުގެ މޭޔަރުންނާއި ކައުންސިލްތަކާއި އަންހެނުން ތަރައްޤީއަށް މަސައްކަތްކުރާ ކޮމެޓީތަކުގެ ރައީސުން މިބައްދަލވުމުގައި ބައިވެރިވާނެކަމަށް ރައީސް އޮފީހުން ވިދާޅުވެއެވެ. މިފަހަރުގެ ކޮންފަރެންސްގައި މޭޔަރުންނާއި ކައުންސިލްތަކުގެ ރައީސުންނާއި އ.ތ.މ ކޮމެޓީތަކުގެ ރައީސުންގެ އިތުރުން ކެބިނެޓް މިނިސްޓަރުންނާއި، ސަރުކާރު މުއައްސަސާތަކުގެ އިސްވެރިންނާއި، ޓެކްނިކަލް މުވައްޒަފުން ހިމެނޭހެން 250 އަށްވުރެ ގިނަ ބައިވެރިން ބައިވެރިވާނެކަމަށް ރައީސް އޮފީހުން ވިދާޅުވެއެވެ.
ވަކި ދާއިރާތަކެއް ކަނޑައެޅިގެން ސިލްސިލާގޮތެއްގައި އަތޮޅުތެރޭގައި ހުރި އެކި މައްސަލަތައް ޙައްލުކުރުމަށް ސީދާ ރައީސުލްޖުމްހޫރިއްޔާއާއެކު ބާއްވާ މިފަހަރުގެ މިބައްދަލުވުމުގައިވެސް މައިގަނޑު 4 ދާއިރާއެއްވަނީ ކަނޑައަޅާފައެވެ. މިފަހަރުގެ މަޝްވަރާ ބައްދަލުވުމުގައި ކައުންސިލްތައް މާލީ ގޮތުން ބާރުވެރިކުރުވުން، ބިނާވެށި ޕްލޭން އެކުލަވާލުން، މިންތީގެ ހަމަހަމަކަން އަދި ވިލުންވެރި މުޖްތަމަޢެއް ބިނާކުރުމާއި ގުޅޭގޮތުން މަޝްވަރާކުރުމަށްވަނީ ހަމަޖެހިފައެވެ. އަދި ކޮންފަރެންސްގައި ބައިވެރިވާ ފަރާތްތަކުގެ މެދުގައި ގުޅުންބަދަހިކުރުމަށް ހިންގާ ޙަރަކާތެއްގެ ގޮތުން މިމަހުގެ 10ވަނަ ދުވަހު ސްޕޯޓްސް ފެސްޓިވަލެއް އޮންނާނެކަމަށް ރައީސް އޮފީހުން ވިދާޅުވެއެވެ.
