ހުޅުމާލޭގެ ރޭގެ ވަގުތެއްގައި ނިޔާވި އަސްފާހް އިބްރާހިމްގެ މަރާއިއެކު އެތައް ބަޔަކުގެ ހިތާމައިގައި ބައިވެރިވެ ތައުޒިޔާގެ މެސެޖްތައް ފޮނުވަން ފަށައިފިއެވެ.

މިޒުވާނާއަކީ އުމުރުން 29 އަހަރުގެ ތ.ކަނޑޫދޫއަށް ނިސްބަތްވާ ޒުވާނެކެވެ. ގިނަ ބަޔަކާއި ގުޅޭ އެކުވެރި މިޒާޖެއްގެ މިޒުވާނާއަކީ ސިޔާސީ މަސައްކަތްތަކުގައި އިދިކޮޅު ޕީޕީއެމްއާއިއެކު މަސައްކަތް ކުރަމުންދިޔަ ޒުވާނެކެވެ. ވަރަށް ހަރަކާތްތެރިކޮށް ސިޔާސީ އެކި އިނވެންޓަކުން އޭނާ ފެނިގެން ގޮސްފައިވެއެވެ.

އެކުވެރި އަސްފާޙު ކުއްލި ގޮތަކަށް ނިޔާވިޚަބަރު އެހީ ކުއްލި ސިހުމާ ނުހަނުފުންހިތާމައާއިއެކު. އަސްފާޙު އަކީ އެންމެނާގުޅޭ އެކުވެެރިއެއް. އަސްފާޙުގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރުކުރައްވާ ޢާއިލާއަށް ކެތްތެރިކަން ދެއްވުންއެދި ދުޢާދަންނަވަން.
 إنا لله وإنا إليه راجعون pic.twitter.com/gucLvByjD8

— Ahmed Shiyam (@Shiyamaldives) September 10, 2022

މި މަރާ ގުޅޭ އެއްވެސް މައުލޫމާތެއް ރަސްމީ އެއްވެސް ފަރާތަކުން އަދި ހާމަކޮށްފައެއް ނުވެއެވެ. މައުލޫމާތު ލިބިފައިވާ ގޮތުގައި އެ ޒުވާނާ މަރުވީ ހުޅުމާލޭގައެވެ. އޭނާ ނިޔާވީ ރޭ 7:30 ހާއިރު ކަމަށް މައުލޫމާތު ލިބިފައިވެއެވެ. ހުޅުމާލޭގައި ރޭ ކުއްލި ގޮތަކަށް ޒުވާނަކު ނިޔާވިއިރު މި ފަހުން ކުއްލި މަރުތައް ރާއްޖޭގައި ކޮންމެވެސް ވަރަކަށް އިތުރުވެފައިވާކަން ފާހަގަ ކުރެވެއެވެ.

ޒުވާނަކު ކުއްލި ގޮތަކަށް ނިޔާވިއިރު، އޭނާގެ ދަރިފުޅު ވަނީ މީގެ ފަސް މަހެއްހާ ދުވަސް ކުރިން ނިޔާވެފައިވެފައެވެ. އަޝްފާހް ނިޔާވުމާ ގުޅިގެން އޭނާގެ ރަހުމަތްތެެރިން ދަނީ ޕޯސްޓްތައް ކުރަމުންނެވެ. ޚަބަރު އޮންލައިންގެ ފަރާތުންގެ އަޝްފާހުގެ ފުރާނައަށް ސުވަރުގޭގެ މަތިވެރި ނިއުމަތް މިންވަރުކޮށްދެއްވުން އެދި ދުޢާކޮށް، އާއިލާއަށް ކެތްތެރިކަން ދެއްވުން އެދެމެވެ.

މީގެ ކުޑަ ދުވަސްކޮޅެއް ކުރިން ތ. އަތޮޅުގައި 29 އަހަރުގެ ޒުވާނަކު ކުއްލި ގޮތަކަށް ނިޔާވިއިރު އޭގެ ކުޑަ ދުވަސްކޮޅެއް ކުރިން ރ. އުނގޫފާރު ބޯޅަ ޓީމުގެ ކުޅުންތެރިޔަކު ކުއްލި ގޮތަކަށް ނިޔާވިއެވެ. އެއީ އުމުރުން އެންމެ 25 އަހަރުގެ ޒުވާނެކެވެ. އޭގެ ކުޑަ ދުވަސްކޮޅެއް އަރިއަތޮޅު ރަށެގައި ވޮލީ ކުޅެން ހުރި ޒުވާނަކުވެސް ކުއްލި ގޮތަކަށް ނިޔާވިއެވެ. ރާއްޖޭގައި މިފަހުން ކުއްލި މަރުތައް ވަނީ ވަރަށް ބޮޑަށް އިތުރުވެފައެވެ.