އަންނަ ހަފްތާގައ ޔޫއެޖްނީއޭގެ ރިޔާސަތުގެ ދައުރު ފުރިހަމަ ކުރައްވާ، މަގާމުން ވަކިވެވަޑައިގަތުމަށް ހަމަޖެހިފައިވާ، ރާއްޖޭގެ ފޮރިންގ މިނިސްޓަރ ޝާހިދު، ޔޫއެން ޖެނެރަލް އެސެމްބްލީގެ ރައީސްގެ ހައިސިއްޔަތުން ބޭއްވި އެންމެ ފަހުގެ ނޫސްވެރިންގެ ބައްދަލުވުމުގައި، ޝާހިދުގެ "އުއްމީދީ ރިޔާސަތަށް" ގިނަ ބަޔަކު ތައުރީފް ކޮށްފިއެވެ.

މި ނޫސްވެރިންގެ ބައްދަލުވުން ފައްޓަވަމުން ޝާހިދު ވިދާޅުވެފައިވަނީ، މިއީ ޔޫއެން ޖެނެރަލް އެސެމްބްލީގެ ރައީސްގެ ހައިސިއްޔަތުން ނޫސްވެރިންނާ ބައްދަލު ކުރައްވާ ފަހު ފަހަރު ކަމުގައެވެ. އަދި ޝާހިދުވަނީ ޔޫއެން ޖެނެރަލް އެސެމްބްލީގެ 79ވަނަ ސެޝަންގައި ހިގައިދިޔަ އެންމެހާ ކަންކަން ވަރަށް ފުރިހަމަޔަށް ކަވަރު ކޮށްދެއްވާފައިވާތީ އެންމެހާ ނޫސްވެރިންނަށް ޝުކުރު އަދާ ކުރައްވާފައެވެ.

މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝާހިދު ވިދާޅުވެފައިވަނީ، ޔޫއެންޖީއޭގެ ދައުރު ފެއްޓެވިއިރު މުޅި ދުނިޔެ އޮތީ ކޯވިޑް ކާރިސާގެ އެންމެ ނުރައްކާތެރި ހާލަތުގައި ކަމުގައެވެ. އެހެންނަމަވެސް، 365 ދުވަހަށްފަހު ދައުރު ނިންމަވާލައްވާއިރު، ކޯވިޑްގެ އެހާލަތުން ދުނިޔެއަށް އަރައިގަނެވިފައިވާ ކަމުގައި ޝާހިދު ވިދާޅުވިއެވެ.

އަދި ރިޔާސަތަށް ވަޑައިގެންނެވުމަށް ކުރެއްވި ކެމްޕެއިންގައި ވައުވެ ވަޑައިގަތް 5 ވައުދުގެ މައްޗަށް ބައްލާލައްވަމުން ޝާހިދުވަނީ މިވައުދުތައް ފުއްދިފައިވާ މިންވަރުގެ މައްޗަށް ވާހަކަ ދައްކަވާފައެވެ.

އަދި ދައުރުގައި ކުރިމަތުވެވަޑައިގެންނެވި އެންމެ ބޮޑު އެއް ގޮންޖެހުމުގެ ގޮތުގައި، ރަޝިއާއިން ޔޫކުރެއިންގައި ހިންގަމުންދާ އުދުވާން ފާހަގަކުރައްވާ، ވީޓޯ ކުރުމުގެ ބާރު އޮންނަ، ޔޫއެން ސެކިއުރިޓީ ކައުންސިލްގެ މެމްބަރު ގައުމުތައް މިމައްސަލާގައި ޒިންމާދާރު ކުރުވުމަށް އޭނާގެ ރިޔާސަތުގައި ކުރެވިގެންދިޔަ މަސައްކަތްތަކުގެ މައްޗަށްވެސް ތަފްސީލީ ގޮތެއްގައި ޝާހިދު ބައްލަވާލައްވާލާފައި ވެއެވެ.

މީގެ އިތުރުންގެ ޝާހިދުވަނީ ރިޔާސަތުގައި ހޭދަކުރެއްވި އެއް އަހަރުދުވަހުގެ ތެރޭގައި ކުރިމަތިވެވަޑައިގެންނެވި ގޮންޖެހުންތަކާއި އަދި ހާސިލްކުރެވުނު ލަނޑުދަނޑިތަކުގެ މައްޗަށް ބައްލަވާލައްވާފައެވެ.

މި ނޫސްވެރިންގެ ބައްދަލުވުމުގައި، ނޫސްވެރިން ޝާހިދުއާއި ކުރެއްވި ސުވާލުތަކުގެ ތެރޭގައިވަނީ، ދައުރުގައި ކުރެއްވުނު މަސައްކަތްތަކާއި އަދި ހާސިލް ކުރެއްވުނު މަސައްކަތްތަކާއި އަދި ހާސިލް ކުރެއްވިފައި ނުވާ ކަންކަމާއި ގުޅޭގޮތުންވެސް ސުވާލު ކޮށްފައި ވެއެވެ. އަދި އެއް ނޫސްވެރިޔަކު އޮންލައިންކޮށް ވާހަކަ ދައްކަވަމުން ވިދާޅުވެފައިވަނީ އޭނާއަކީ ޔޫއެންގެ ސިސްޓަމްގެ ތެރޭގައި 1957 ވަނަ އަހަރުއްސުރެ އުޅުއްވަމުން ގެންދަވާ މީހެއް ކަމަށާއި، އޭނާ ދެކެވަޑައިގަންނަވާ ގޮތުގައި ޝާހިދުއަކީ ދުނިޔޭގެ ވަރުގަދަ ޝަޚްސިއްޔަތެއް ކަމުގައެވެ.

ހިތުގެ އަޑިން އަހަރެން ގަބޫލުކުރާ ގޮތުގައި ތިޔައީ ދުނިޔޭގަ މިވަގުތު ތިއްބެވި ވަރުގަދަ ޝަޚްސިއްޔަތުންގެ ތެރޭގައި ހިމެނޭ ބޭފުޅެއް. އަހަރެން ޝާހިދުގެ ހުރިހާ ނޫސްވެރިންގެ ބައްދަލުވުމެއް ބެލިން. އަދި ތިޔަ ގެންދަވަނީ ދުނިޔޭގެ ހުރިހާ ކަންކޮޅުތަކަކަށް ދަތުރު ކުރައްވަމުން. އެ މަސައްކަތް ދިވެހިރާއްޖޭގެ ޚާރިޖީ ވަޒީރެއްގެ ހައިސިއްޔަތުން ކުރިޔަށް ގެންދަވަން ވާނެ. އަހަރެން ކޮށްލަން ބޭނުންވާ ސުވާލަކީ، މިމަގާމުން ވަކިވުމަށްވަހު، ކިހިނެއްތޯ މަނިކްފާނާ އަހަރެމެން ގުޅުން ދަމަހައްޓާނީ، އަދި ދުނިޔޭގެ ޖަމިއްޔާތަކުން މަނިކްފާނާ ގުޅުން ބާއްވާނީ.

މި ނޫސްވެރިންގެ ބައްދަލުވުމުގައި ނޫސްވެރިޔަކު ޝާހިދުއާއި ސުވާލު ކުރައްވަމުން ވިދާޅުވެފައި ވެއެވެ.

ގްލޯރިއާ ނަމަކަށް ކިޔާ މި ނޫސްވެރިޔާގެ ސުވާލުގެ ޖަވާބުގައި ޝާހިދު ވިދާޅުވީ ޔޫއެން ސިސްޓަމްގައި މަސައްކަތް ކުރެއްވި އެފަދަ ތަޖުރިބާކާރު ބޭފުޅެއްގެ ތައުރީފް ލިބިގެން ދިއުމަކީ ވަރަށް އުފާކުރައްވާ ކަމެއް ކަމުގައެވެ. އަދި ޔޫއެންޖީއޭގެ ރައީސްކަމުން ވަކިވެވަޑައިގަތުމަށފަހު ގުޅުއްވޭނެ އެއްގޮތަކީ ނިއުޔޯކުގައި ހުންނަ ދިވެހިރާއްޖޭގެ މިޝަން މެދުވެރިކޮށް ކަމަށެވެ. އަދި ޝާހިދު ވިދާޅުވީ އޭނާގެ އަމިއްލަ ފޯނު ނަމްބަރު އެ ނޫސްވެރިޔާއާއި ހިއްސާ ކުރައްވާނޭ ކަމުގައެވެ.

މި ނޫސްވެރިންގެ ބައްދަލުވުމުގައި ޝާހިދު ވިދާޅުވީ، ޔުއެންއިން ހޯދާ ކާމިޔާބީތަކުގެ ފަހަތުގައި ތިބެނީ މެމްބަރު ގައުމުތަކާއި ޔުއެންގެ ހީވާގި މުވައްޒަފުން ކަމުގައެވެ. އަދި ދައުރުގައި ހާސިލްކުރެވުނު ކާމީޔާބީއެއްވާނަމަ، އޭގެ ހުރިހާ ޝަރަފެއްވެސް ހައްގުވަނީ އެކީގައި މަސައްކަތް ކުރެއްވި ހީވާގި މުވައްޒަފުންނަށް ކަމުގައެވެ.

މިމަހުގެ 12 ވަނަ ދުވަހު ޝާހިދު، ޔޫއެންޖީއޭގެ ރައީސްގެ ހައިސިއްޔަތުން އަދާ ކުރައްވަމުން ގެންދަވާ ހުރިހާ ރަސްމީ މަސްއޫލިޔައްތުތަކުން ދުރަށް ވަޑައިގަތުމަށް ވަނީ ހަމަޖެހިފައެވެ.

ޔޫއެންގެ ޖެނެރަލް އެސެމްބްލީގެ 76 ވަނަ ދައުރުގެ ރިޔާސަތު ރާއްޖޭގެ ފޮރިންގ މިނިސްޓަރ ޝާހިދު ކާމިޔާބު ކުރައްވާފައިވަނީ ފާއިތުވެދިޔަ އަހަރުގެ ޖޫން މަހުގެ 7 ވަނަ ދުވަހު ބޭއްވުނު އިންތިޚާބު 193 ގައުމު އެކުލެވޭ އާންމު މަޖިލިހުގެ 143 ގައުމުގެ ބޮޑު އަޢުލަބިއްޔަތެއް ހޯއްދަވައިގެންނެވެ.

މި އިންތިޚާބުގައި ޝާހިދުއާއި ވާދަ ކޮށްފައިވަނީ، އަފްގާނިސްތާން ކުރީގެ ފޮރިންގ މިނިސްޓަރ ޑރ. ޒަލްމާއި ރަސޫލުއެވެ. އޭނާއަށް ލިބިގެން ދިޔައީ، 48 ވޯޓެވެ.

2021 ސެޕްޓެމްބަރު 14 ގައި ފެށުނު ޢާއްމު މަޖިލީހުގެ 76 ވަނަ ދައުރުގައި އޭޝިއާ ޕެސިފިކް ސަރަހައްދުގެ ފަރާތުން ރިޔާސަތު ބަލަހައްޓަން ފޮރިން މިނިސްޓަރ ޝާހިދު ނޮމިނޭޓްކުރެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހްއެވެ. މިއީ އދގެ ޢާއްމު މަޖިލީހުގެ ރިޔާސަތަށް ދިވެހިރާއްޖެއިން ކުރިމަތިލި ފުރަތަމަ ފަހަރެވެ. އަދި ދިވެހިރާއްޖެ ވެގެން މިދިޔައީ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ތެރެއިން އދގެ ރިޔާސަތު ބެލެެހެއްޓި 6 ވަނަ ގައުމު ކަމުގައެވެ.

ޔޫއެންގެ ޖެނެރަލް އެސެމްބްލީގެ 76 ވަނަ ދައުރުގެ ރިޔާސަތަށް ޝާހިދު ވަޑައިގެންނެވީ، މައިގަޑު 5 އަމާޒެއް ހާސިލް ކުރެއްވުމަށް މަސައްކަތް ކުރައްވާނެކަމަށް، އޭރު ކުރެއްވި ކެމްޕޭނުގައި ވަދުވެ ވަޑައިގަތުމަށްފަހުއެވެ. އަދި އެއްއަހަރުގެ ދައުރުގައި އާންމު މަޖިލިހުގެ ރައީސްކަން ކުރައްވާފައިވަނީ "ޕްރެސިޑެންސީ އޮފް ހޯޕް" (އުއްމީދީ ރިޔާސަތު) މި ޝިއާރުގެ ދަށުންނެވެ.