ސަރުކާރުން އޮތީ މީޑިޔާ ތަންމިނަށް މިނިވަންކޮށް, ހުޅުވާލައިފައި ކަމުގައި މިނިސްޓަރ ޢިމްރާން ވިދާޅުވެއްޖެއެވެ.
އެމަނިކުފާން މިހެން ވިދާޅުވީ މޯލްޑިވްސް މީޑިޔާ ކައުންސިލާއި, ބްރޯޑް ކާސްޓިންގ ކޮމިޝަނާއި, ޝަހީބު މީޑިޔާ ގުޅިގެން ދެހަފްތާގެ މުއްދަތަށް ކުރިއަށްގެންދިޔަ ނޫސްވެރިކަމުގެ ތަމްރީނު ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ކޯސް ފުރިހަމަކުރެއްވި ބައިވެރިންނާ މުހާތަބުކުރައްވާ މިނިސްޓަރ ވިދާޅުވީ ރަނގަޅު ގޮތުގައި ކަމެއް ކުރުމަށްޓަކައި ކުރަންޖެހޭ ކަމަކީ އެކަމެއް ރަނގަޅު ދަސްކުރުންކަމަށެވެ. ކޮންމެ ކަމެއް ކުރިޔަސް އެކަމެއް ރަނގަޅަށް ކުރެވޭނީ އެކަމެއް ދަސްކޮށްގެންކަން ފާހަގަކުރައްވާ މިނިސްޓަރ އެދިވަޑައިގެންނެވީ ކޯސް ނިންމި ބައިވެރިން ޒިންމާދާރުކަމާއެކު ނޫސްވެރިކަން ކޮށްދެއްވުމަށެވެ.
މިނިސްޓަރ ވިދާޅުވީ އަދުލުވެރިކަމާނުލާ ނޫސްވެރިކަން ކުރެވިއްޖެނަމަ ކޮންމެވެސް ދުވަހަކުން އޭގެ ޒިންމާ އަމިއްލައަށް ނަންނަގަވަން ޖެހޭނެކަމަށެވެ. ސަރުކާރުން އޮތީ މީޑިޔާ ތަންމިނަށް މިނިވަންކޮށްގެން, ހުޅުވާލައިގެންކަމަށާއި, ރަނގަޅަށް ބައްލަވައިފިނަމަ އެކަން ފެނިވަޑައިގަންނަވާނެކަމަށް މިނިސްޓަރ ވިދާޅުވިއެވެ. ސަރުކާރުން މީޑިޔާގެ މިނިވަންކަން ހަނި ނުކުރައްވާނެކަމަށް ވިދާޅުވިއެވެ.
މިނިސްޓަރ ވިދާޅުވީ ޚުދު އެމަނިކުފާނަށް ނިސްބަތްކުރައްވާ މީޑިޔާތަކުންވެސް އެއްޗިހި ގޮވާކަމަށާއި, އެކަމަކު އެންމެ މީޑިޔާއަކަށްވެސް އިސްވެ ފިޔަވަޅެއް ނާޅުއްވާނެކަމަށެވެ. ސަރުކާރުން އިރާދަކުރެއްވިއްޔާ މީޑިޔާއަށް މިނިވަންކަން ވާނީ ދީފައި ކަމަށާއި, ހެޔޮގޮތުގައި ބޭނުންކުރައްވާ, އެކަންތައް އެންމެ ރަނގަޅުގޮތުގައި ކޮށްދެއްވުމަށް އެދިވަޑައިގަންނަވާކަމަށް މިނިސްޓަރ ވިދާޅުވިއެވެ.
އަޅުގަނޑުމެން ތިބެގެނެއް މީޑިޔާ ހަންޏެއް ނުކުރާނަން. އެކަމަކު މީޑިޔާ ޒިންމާދާރުވުމަށް މީޑިޔާ އަދުލުވެރިވުމަށް, މީޑިޔާ ރަނގަޅު ގޮތުގައި ބޭނުންކުރުން އެއީ ތިޔަބޭފުޅުންގެ ބޮލުގައި އެޅިފައި އޮތް ބޮޑު ދީނީ ޤައުމީ ބޮޑު ޒިންމާއެއް, ބޮޑު ވާޖިބެއް. އެކަން ފުރިހަމަގޮތުގައި ކޮށްދެއްވުމަކީ ތިޔަބޭފުޅުން ކޮށްދެއްވަންޖެހޭ ކަމެއް.
– މިނިސްޓަރ ވިދާޅުވިއެވެ.
މިނިސްޓަރ ޢިމްރާން ވިދާޅުވީ މީގެކުރީގެ ސަރުކާރުތަކުންވެސް އަދި ފަހުން އަންނާނެ ސަރުކާރުތަކުންވެސް މީޑިޔާއަށް ނުދޭހާ މިނިވަންކަމެއް މިއަދުގެ ސަރުކާރުން ވަނީ ދީފައިކަމަށެވެ. އެވަރުގެ މިނިވަންކަމެއް ސަރުކާރުން ދިނީމާ މީޑިޔާތަކުން އޭގެ ޒާތުގައި ފުރުހަމަ ފައިމައްޗަށް ތެދުވެ މީޑިޔާ ވަރުގަދަކުރުން އެއީ މީޑިޔާގެ އަހުލުވެރިންގެ ޒިންމާއެއްކަމަށެވެ.
މިނިވަންކަމުގެ ނާޖާއިޒު ފައިދާ ނަގާ, އޭގެތެރެއިން މުޖުތަމައު ހަރާބުވެ, ފަސާދައަށް ދާބަޔަކަށް މީޑިޔާ ވެގެންނުވާނެ. މީޑިޔާއަކީ ބިނާކޮށް, ޘާބިތުކޮށް, މުޖުތަމައުގެ ރައްކާތެރިކަމާއި, މުޖުތަމައުގެ ހަމަޖެހުން ކަށަވަރުކުރުމުގައި އެންމެބޮޑު ޒިންމާއެއް އަދާކުރާ އެއްބަޔަކަށްވުން އެއީ އަޅުގަނޑުމެންގެ ޤައުމުގެ ކުރިމަގަށް އޮތް ހަޤީޤީ ރަނގަޅަކީ. އެދިމާއަށް ދަތުރުކުރުން އެއީ ތިޔަބޭފުޅުންގެ އަރިހުން އަޅުގަނޑު ވަރަށްބޮޑަށް އެދޭކަމެއް.
– މިނިސްޓަރ ވިދާޅުވިއެވެ.
ކުރިއަށް އޮތީ ސިޔާސީގޮތުން ހަލަބޮލި ދުވަސްތަކެއްކަން ފާހަގަކުރައްވާ މިނިސްޓަރ އެދިވަޑައިގެންނެވީ އަދުލުވެރިކަމާއި, ޒިންމާދާރުކަމާއެކުގައި މީޑިޔާގެ މަސައްކަތްކުރެވި އަޅުގަނޑުމެންގެ ޤައުމަށް އެންމެ ފައިދާވާގޮތަށް މައުލޫމާތުތައް ފޯރުކޮށްދެވި, އެކަންކަން ބައްޓަންކޮށްދެއްވުމަށެވެ.
