ރައީސުލްޖުމްހޫރިއްޔާ އިބްރާހިމް މުހައްމަދު ޞާލިގެ ސަރުކާރުން އެމްޓީސީއާއި ހަވާލު ކުރައްވާ ކޮންމެ މަސައްކަތަކާއި ހަވާލުވަނީ ރައްޔިތުންނަށް އެކަމުން ލުއިފަސޭހަކަން ހޯދައިދޭން ކަމުގައި އެމްޓީސީސީގެ ސީއޯއޯ އާދަމް އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ ސަރުކާރުން އެމްޓީސީސީއާ ހަވާލުކޮށްގެން ކުރިއަށް ގެންދާ ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުން މާލޭގައި މިނީ ބަހުގެ ދަތުރުތައް ރަސްމީކޮށް މިއަދު ފެށުމާއި ގުޅިގެން ކުރެއްވި ޓުވީޓެއްގައެވެ. އާޒިމްއަކީ މިސަރުކާރުން ހިންގާ ތަރައްޤީގެ އެންމެ ބޮޑެތި މަޝްރޫޢުތައް ނިންމުގައި އެންމެ ބޮޑަށް މަސައްކަތް ކުރައްވާ އެއް ބޭފުޅާއެވެ.
އެމްޓީސީސީގެ ސީއީއޯގެ މަޤާމާއި ހަވާލު ވުމަށްފަހު އާޒިމް ގެންދަވަނީ ސަރުކާރުން ހިންގަން ބޭނުންވާ ތަރައްޤީގެ ގިނަ މަޝްރޫޢުތަކެއް ބޭނުންވާ ތާރީހުތަކަށް ނިންމަވައި ދެއްވުމުގައި ނަމޫނާ ދައްކަވަމުންނެވެ. މިއަދު ފެށިގެން ދިޔަ މިނީ ބަހުގެ ޚިދުމަތަކީވެސް އެންމެ ޒަމާނީ ބަސްތަކާއިއެކު ފެށިގެން ގޮސްފައިވާ ޚިދުމަތަކެވެ. ޚާއްސަ އެހީއަށް ބޭނުންވާ މީހުނަށާއި، އުމުރުން ދުވަސްވީ މީހުންނަށްވެސް ފަސޭހައިން ޚިދުމަތް ލިބޭނެ ގޮތަކަށް ބަސްތަކުގައި އިންތިޒާމު ވަނީ ހަމަޖައްސާފައެވެ.
އާޒިމް ވިދާޅުވީ އެމްޓީސީސީއާއި ސަރުކާރުން ހަވާލު ކުރައްވާ ކޮންމެ މަޝްރޫއެއްގައިވެސް އެންމެ ބޮޑު އިސްކަމެއް ދެއްވަނީ ރައްޔިތުންނަށް އެކަމުން ލިބޭނެ މަންފާއާއި ލުއިފަސޭތަކަށް ކަމުގައެވެ. ރައީސް ޞާލިހުގެ އިރުޝާދުގެ ދަށުން އެމަނިފާނު ބޭނުންވާ އަމާޒަށް ވާސިލް ވުމަށްޓަކައި އެމްޓީސީސީން ކުރިއަށް އޮތް ތަނުގައިވެސް މަސައްކަތް ކުރައްވަމުންދާނެކަމަށް އާޒިމް ވިދާޅުވިއެވެ.
ރައީސް އިބްރާހިމް މުހައްމަދު ޞާލިހުގެ ސަރުކާރުން އެމްޓީސީސީއާއި ހަވާލުކުރި ކޮންމެ ޕްރޮޖެކްޓެއްވެސް ރައީސް އެދިލައްވާ ގޮތަށް ރައްޔިތުންނަށް އުފާވެރިކަން އަދި ފަސޭހަކަން އިހުސާސް ކުރުމަކީ އެމްޓީސީސީގެ އަމާޒު. މާލޭގެ ބަހުގެ ޚިދުމަތްވެސް ރައްޔިތުންނަށް އުފާވާވަރަށް ދެވޭތޯ ބަލާނަން.
– އާޒިމް ވިދާޅުވިއެވެ.
އެމްޓީސީސީން މިއަދު މިނީބަހުގެ ޚިދުމަތް މާލެއަށް ފަށާފައިވާއިރު، އެކުންފުނިން ގެންދަނީ މާލެއާއި ހުޅުމާލެެއާއި ދޭތެރޭގައިވެސް ބަސް ދަތުރު ކުރަމުންނެވެ. އަދި އަތޮޅު ތެރޭގެ ބޮޑެތި އާބާދީތަކުގައިވެސް މިޚިދުމަތް ދެމުންނެވެ. އެކުންފުނިން ދަނީ އެއާޕޯޓްތަކާއި ބަނދަރުތަކާއި، ތަރައްޤީގެ އެތަކެއް މަޝްރޫއެއް ރާއްޖޭގެ އެކި ކަންކޮޅުތަކުގައި މިހާރުވެސް ހިންގަމުންނެވެ.
