2023 ވަނަ އަހަރު ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނަވާނީ އަދާލަތުގެ ބޭފުޅެއްކަމަށް އެޕާޓިގެ ރައީސް ޢިމްރާން ވިދާޅުވެއްޖެއެވެ.

ޢިމްރާން މިހެން ވިދާޅުވީ، ކުރިއަށް އޮތް 10 އަހަރަށް އެޕާޓިގެ ސްޓްރެޓެޖިކް ޕްލޭން އެކުލަވާލުމާއި ގުޅިގެން ކުރެއްވި ޓްވީޓްގައެވެ. ކުރިއަށް އޮތް 10 އަހަރަށް އަދާލަތު ޕާޓީ ވަރުގަދަކޮށް މެންބަރުން އިތުރުކުރުމަށް ނިންމާފައިވާއިރު، އެކަމާއި ގުޅިގެން ޢިމްރާން ވިދާޅުވީ 2033 ވަނަ އަހަރު ރާއްޖޭގެ ރައީސްކަން ކުރައްވާނީ އަދާލަތުގެ ބޭފުޅެއްކަމަށެވެ.

Maiy Allah iraadhakurehviyya 2033 vana aharu raajjeyge Raeeskan kurahvaanee @AdhaalathOffice ge beyfulheh. pic.twitter.com/Q4T5x0gvXq

— Imran Abdulla (@ShimranAb) September 5, 2022

ސަރުކާރު ކޯލިޝަންގައިވެސް ހިމެނޭ އަދާލަތު ޕާޓީން މި ސްޓްރެޓެޖިކް ޕްލޭން ފާސްކުރީ ރޭ ބޭއްވި އެޕާޓިގެ މަޝްވަރާ ބައްދަލުވުމުގައި، ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުންނެވެ. ހޯމް މިނިސްޓަރ އަދި އެޕާޓިގެ ރައީސް ޢިމްރާން ރިޔާސަތު ބެލެހެއްޓެވި މި ބައްދަލުވުމުގައި ޕްލޭން ފާސްކޮށްފައިވަނީ މައިގަނޑު 8 ދާއިރައަކުން އެޕާޓީގެ ހަރަކާތްތައް ކުރިއަށް ގެންދިއުމަށެވެ.

އަދާލަތު ޕާޓިގެ ސްޓްރެޓެޖިކް ޕްލޭންގައި ހިމެނޭ ދާއިރާތައް:

• އެތެރޭގެ ހިންގުން
• ގޮފި އަދި ދާއިރާތައް
• ޕަބްލިކް ރިލޭޝަންސް
• ޕާޓީގެ ސިޔާސަތު
• އިންތިހާބުތައް
• ޕާޓީގެ މާލިއްޔަތު
• ދާހިލީ އަދި ހާރިޖީ ގުޅުންތައް
• ޕާޓީގެ މެންބަޝިޕް

ސްޓްރެޓެޖިކް ޕްލޭން ރޭ ތަސްދީްްކޮށް އަމަލުކުރަން ފަށާފައިވާއިރު، އެޕާޓިން ވަނީ އެ ޕްލޭންގެ ޑްރާފްޓް މިއަހަރުގެ ފެބުރުއަރީގައި އެކުލަވާލާފައެވެ. އަދި ޕްލޭން ފައިނަލް ކޮށްފައިވަނީ މިދިޔަ މަހުގެ 11 އިން 13 އަށް ކިނޮޅަހުގައި ކުރިއަށް ގެންދިޔަ މަސައްކަތު ބައްދަލުވުމެއްގައެވެ.

އަދާލަތުން ވަނީ އެޕާޓިގެ މެންބަރުންގެ ޢަދަދު އިތުރުކުރުމުގެ މަސައްކަތްވެސް ފަށާފައެވެ. އެގޮތުން ޕާޓީގެ ލީޑާރޝިޕްގައި ހިމެނިވަޑައިގަންނަވާ މެންބަރުންނާއެކު އަތޮޅުތަކަށް ދަތުރުތަކެއް ކުރުމަށްވެސް ނިންމާފައިވެއެވެ. އަދާލަތަށް ސަރުކާރު ހިންގާ މައި ޕާޓީއާއި އިދިކޮޅުންވެސް އެންމެ ބޮޑު ފާޑުކިޔުމެއް އަމާޒުކުރަނީ އެޕާޓީއަށް މަޖިލިސް އިންތިޚާބުގައި އެއްވެސް ދާއިރާއެއް ކާމިޔާބު ނުކުރެވޭތީއެވެ.