ފަހު ޒަމާނުގައި ފާޅުވާނެކަމަށް ބުނާ ކުދި ދައްޖާލުންގެ އަދަދު 30 އަހަރާ ކަމަށާއި، ކުދި ދައްޖާލުންގެ ސިފަތައް ހުރި 5 ދައްޖާލުން ރާއްޖެއިން ފާޅުވެއްޖެ ކަމުގައި، އޭދަފުށީ ދާއިރާގެ މެމްބަރު އަދި ޕީޕީއެމްގެ ޕާލަމެންޓްރީ ގުރޫޕްގެ ލީޑަރު އަހުމަދު ސަލީމް ވިދާޅުވެއްޖެއެވެ.

ރޭ ޕީޕީއެމް އޮފީހުގައި އޮތް ޖަގަހަ ޖަލްސާގައި ވާހަކަ ދައްކަވަމުން ސަލީމް ވިދާޅުވީ، މިއިން ކޮންމެ ދައްޖާލެއްގެވެސް މަގުސަދަކީ އެއް މަގުސަދެއް ކަމަށާއި، އެއީ މީހުން މަގު ފުރެއްދުމާއި، އޮޅުވާލުމާއި، ދޮގު ހެދުމާއި، އިސްލާމް ދީނުގެ އުސޫލުތައް ގޮތް ގޮތަށް ބަދަލުކޮށް، މީހުން މަގު ފުރެއްދުން ކަމުގައެވެ.

ސަލީމް ވިދާޅުވި ގޮތުގައި، އައްތަހިއްޔާތުގެ ފަހުގައި ދުއާކުރަނީ މަސީހުއްދައްޖާލުގެ ކިބައިން ސަލާމަތް ވުމަށް ކަމަށާއި، އެހެންނަމަވެސް މިއަދު މިވަނީ ކުދި ދައްޖާލުންގެ ކިބައިން ސަލާމަތްވުމަށްވެސް އައްތަހިއްޔާތުގެ ފަހުގައި ދުއާކުރަން ޖެހިފައި ކަމަށެވެ.

ހަމަ ގައިމުވެސް ރާއްޖެއިން، މި ސިފަތައްހުރި 5 ދައްޖާލުން ފާޅުވެއްޖެ. އަޅުގަޑު މިބަލާ ސިފަތަކަށް ބަލާއިރުގަ، ދައްޖާލެއްގެ ހުންނަންވާ ސިފަތަކަށް ބަލާއިރުގަ، މީގެ 5 ދައްޖާލުން ފާޅުވެއްޖެ. އެހެންވީމަ މީ ބިރުހުރި ކަމެއް. މި ހުރިހާ ދައްޖާލުންގެ މަސަދަކީވެސް މީހުން މަގު ފުރެއްދުން. މީހުންނަށް ހައްގާއި ބާތިލް އޮޅުވާލުން.

މި ޖަލްސާގައި ވާހަކަ ދައްކަވަމުން ސަލީމް ވިދާޅުވެފައި ވެއެވެ.

ސަލީމް ވިދާޅުވީ މިއީ ވިސްނާންޖެހޭ ކަންކަން ކަމަށާއި، މިއީ މަޖަލެއްގެ ގޮތުގައި ނަގައިގެން ކަމުނުދާނެ ކަންކަން ކަމުގައެވެ. ސަލީމް އިތުރަށް ވިދާޅުވީ ރައީސް ޔާމިން ވިދާޅުވާ ފަދައިން މީހުން ދަސްކުރުން މިހާރު ދަތިކަމަކަށް ވެއްޖެ ކަމުގައެވެ. އެގޮތުން ޝޭޚު އިމްރާނަކީ ވަރަށް ގާތް ބޭފުޅެއް ކަމަށާއި، އެހެންނަމަވެސް ޝޭޚު އިމްރާން މިހާތަނަށް އައި އިރުވެސް ދަސް ނުވި ކަމުގައެވެ.

އިމްރާންގެ ހުރި ސިފަތަކަށް ބަލައިގެން އިމްރާނަކީ މާތް މީހެއްކަމުގައި ބަލައިގެން އަޅުގަޑުމެން އައީ. އެކަމަކު އަޅުގަޑު ދަންނަވާލާނަން، ސުލައިމާނުގެފާނުގެ އަރިހުގައި ދޫންޏަށް ލިބުނު ލަނޑު ހަގީގަތުގައި އަޅުގަޑުމެންނަށް ލިބުނީ.

ސުލައިމާނުގެފާޅުގެ ޒަމާނުން މިސާލު ޖައްސަވަމުން، ސަލީމް ވިދާޅުވީ އިމްރާނަކީ ރަގަޅު ބޭފުޅެއް ކަމުގައި ދެކި އެކީގައި އުޅުއްވުމުގެ ސަބަބުން ލިބިފައިވަނީ ހަތްތަހާވެސް ލަނޑު ކަމުގައެވެ.