ޓޫރިޒަމް ޤާނޫނުގެ ދަށުން ނަގަމުންދާ ގްރީން ޓެކްސް އަލުން ނެގުމަށް ޤާނޫނަށް އިސްލާޙު ހުށަހަޅައިފިއެވެ.
ޤާނޫނަށް އިސްލާހު ހުށަހެޅުއްވީ ސަރުކާރުގެ ފަރާތުން ތިނަދޫ ދެކުނު ދާއިރާގެ މެމްބަރު ސަނީފެވެ. ގްރީން ޓެކްސް ނެގުން މިހާރު ހުއްޓާލާފައިވާތީ، ދައުލަތަށް ލިބެން ޖެހޭ ޢާމްދަނީން ބޮޑު ބައެއް ލިބުން ވަނީ ހުއްޓިފައެވެ.
ގްރީން ޓެކްސް ނެގުން ހުއްޓުނީ މިދިޔަ ޖޫން 30 ގައި ފާސް ކުރި ޓޫރިޒަމާ ބެހޭ ގާނޫނަށް 11 ވަނަ އިސްލާހާއެކުގައެވެ. އެ އިސްލާހުގައި ވަނީ ގްރީން ޓެކްސް ނަގަން ފަށާނީ އަންނަ އަހަރުގެ ޖެނުއަރީ މަހުން ފެށިގެން ކަމަށެވެ. ފިނޭންސުން އާއްމު ކުރި ތަފާސް ހިސާބުތައް ދައްކާ ގޮތުން ގްރީން ޓެކްސް ޖަމާކުރާ ފަންޑުގެ ޖުމްލަ އަދަދު ވަނީ 846 މިލިއަން ރުފިޔާއަށް އަރާފައެވެ.
ގްރީން ޓެކްސްގެ ގޮތުގައި ރިސޯޓުތަކާއި ސަފާރީއާއި ހޮޓާތަކުގައި ޗުއްޓީ ހޭދަކުރާ ކޮންމެމީހެއްގެ އަތުން 6 ޑޮލަރު ނަގައެވެ. އަދި ގެސްޓް ހައުސްތަކުގައި ޗުއްޓީ ހޭދަކުރާ މީހުންގެ އަތުން 3 ޑޮލަރު އަންނަނީ ނަގަމުންނެވެ. އެހެންނަމަވެސް ސަރުކާރުން ގެޒެޓުކޮށްފައި މިހާރު އޮތް އިސްލާޙުގައި ވަނީ ގްރީން ޓެކްސް ނަގާނީ އަންނަ ޖެނުއަރީ މަހުގެ 1 ދުވަހުން ފެށިގެންކަމަށް ބަޔާންކޮށްފައެވެ. ދައުލަތަށް ބޭރުފައިސާއިން 4 ވަނައަށް އެންމެ ބޮޑު ޢާމްދަނީ ލިބެނީ ގްރީން ޓެކްސްގެ ގޮތުގައެވެ.
މިދިޔަ ޖުލައިމަހު އެކަނިވެސް ގްރީން ޓެކްސްގެ ގޮތުގައި ދައުލަތަށް 70 މިލިއަނަށްވުރެ ގިނަ ރުފިޔާވަނީ ލިބިފައެވެ. މިޓެކްސް މިހާރު ނަގަމުންދާ ރޭޓަށް ބަދަލުގެނެސް ބޮޑެތި ގެސްޓް ހައުސްތަކުން ނަގާ ޓެކްސްގެ ރޭޓު ބޮޑުކުރުމަށް ސަރުކާރުން އަންނަނީ މަސައްކަތްކުރަމުންނެވެ.
ގްރީން ޓެކްސް ނަގަން ފަށާފައިވަނީ 2016 ވަނަ އަހަރުގެ ތެރޭގައެވެ.
