ކުރިޔަށް އޮތް ރިޔާސީ އިންތިޚާބަށް އަހަރަކަށްވުރެ ކުޑަ ދުވަސްކޮޅަކަށް ވެފައި ވާއިރު، ދޭދޭ ޕާޓީތަކުގެ މެދުގައި އޮތް 2023ގެ ވާދަވެރިކަމަށްވުރެ، ފާއިތުވެދިޔަ ތަނުގައި ވާދަވެރިކަން އެންމެ ބޮޑުކޮށް ފެނިގެން ގޮސްފައިވަނީ، ވެރިކަން ކުރާ ކޯލިޝަންގެ އެންމެ ބޮޑު ޕާޓީ އެމްޑިޕީގެ އެތެރޭގައި ކަމުގައި ދެންނެވިދާނެއެވެ.

އަދި މި ވާދަވެރިކަން އެންމެ ބޮޑަށް އޮތީވެސް އެމްޑީޕީގެ އެންމެ އިސް ދެ ލީޑަރުންގެ މެދުގައިކަންވެސް މި ފުރުސަތުގައި ފާހަގަ ކޮށްލާން ޖެހެއެވެ. މިގޮތުން އެމްޑީޕީގެ ރައީސް މުހައްމަދު ނަޝީދު، ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލުކޮށް، އަންނަ ރިޔާސީ ދައުރުން ފެށިގެން ބޮޑުވަޒީރަކަށް ވެވަޑައިގަތުމުގެ ހުވަފެންފުޅުން ދެކެވަޑައިގަންނަވަމުން ގެންދެވިއިރު، ރައީސް ސާލިހު ގެންދަވާފައިވަނީ 2023ގެ އެމްޑީޕީގެ ރިޔާސީ ޓިކެޓް ކަށަވަރު ކުރެއްވުމުގެ މަސައްކަތް ވަރަށްވެސް ފުރިހަމަޔަށް ކުރިޔަށް ގެންދަވަމުންނެވެ.

އޭގެތެރޭގައި، އެމްޑީޕީގެ ޗެއަރޕާސަންކަމުގެ މަގާމަށް ރައީސް ސާލިހުގެ ތާއީދު އޮތް ބޭފުޅަކު ގެންނެވުމުގެ އިތުރުން ޕާޓީގެ އެތެރޭގެ ގިނަ މަގާމްތަކުގައިވެސް މިހާރު ތިއްބެވީ، އެޕާޓީގެ އެތެރޭގައި އުފެދިފައިވާ ދެ ފެކްޝަންގެ ތެރެއިން ރައީސް ސާލިހަށް ތާއީދު ކުރައްވާ ބޭފުޅުންކަން މިފުރުސަތުގައި ފާހަގަ ކޮށްލާން ޖެހެއެވެ. އޭގެ ތެރޭގައި ޕާޓީގެ ޗެއަރޕާސަންގެ ނާއިބުކަމުގެ މަގާމްވެސް ހިމެނެއެވެ.

ހަމައެއާއެކު، އެމްޑީޕީގެ ރިޔާސީ ޓިކެޓް ކަށަވަރު ކުރެއްވުމުގައި ރައީސް ސާލިހަށް ލިބިގެންދިޔަ އެންމެ ބޮޑު އަނެއް ކާމިޔާބީއެއްގެ ގޮތުގައި ފާހަގަވެގެން ދިޔައީ ނިމިދިޔަ އެޕާޓީގެ ގައުމީ ކޮންގެރެސްއެވެ. ރާއްޖޭގެ މިވަގުތު އޮތް ރިޔާސީ ނިޒާމް ބަރުލަމާނީ ނިޒާމަކަށް ބަދަލު ކުރުމަށް، ފާއިތުވި 2 އަހަރެއްހާ ދުވަހުގެ މުއްދަތުގައި، ނަޝީދު ކުރައްވަމުން ގެންދެވި މަސައްކަތް އެކީ ފެއިލް، މި މަސައްކަތާއިގެ ދެން ކުރިޔަށް ވަޑައި ނުގެންނެވޭ މިންވަރަށް މި މަސައްކަތް ވަޅުޖެހިގެން ދިޔައީ ނިމިދިޔަ ކޮންގެރެސްގައި، ނިޒާމު ބަދަލު ކުރުމަށް އެމްޑީޕީގެ އެތެރޭގައި ތާއީދު ނެތްކަން ސާފުވެގެން ދިޔަ ހިސާބުންނެވެ.

އަދި އެއާއެކު، ޕާޓީގެ އެތެރޭގެ ގޮފިތަކުން ރައީސް ސާލިހަށް އޮތް ތާއީދު ޔަގީންކުރެވި، ކުރިޔަށް އޮތް ޕާޓީގެ ރިޔާސީ ޕްރައިމަރީގައިވެސް ޕާޓީގެ އެތެރެއިން އެހެން ބޭފުޅަކަށް ރައީސް ސާލިހާއި ވާދަކޮށްގެން އެ ޕްރައިމަރީ ކާމިޔާބު ނުކުރެއްވޭނެކަން މިހާރުވަނީ ވަރަށްވެސް ގިނަ ގޮތްގޮތުން ޔަގީން ކުރެވިފައި ކަމުގައި ދަންވާން ޖެހެއެވެ.

ނަޝީދުގެ އެންމެ ފަހުގެ ކާޑު! ނުރަސްމީ ދަތުރު ފުޅެއްގައި އިންޑިއާއަށް!

އެމްޑީޕީގެ ފާއިތުވި ކޮންގްރެސް ނިމިގެން ދިޔައީ ޕާޓީގެ އެންމެ އިސް ދެ ލީޑަރުން އެއްގަލަކަށް އަރުއްވައިގެން ކަމުގައި ކޮންގްރެސްގެ ރިޔާސަތުން އިއުލާން ކުރެއްވި ނަމަވެސް، ނަޝީދުގެ ބަރުލަމާނީގެ ހުވަފެން ބިލާހަކަށް ވެގެންދާން އެބީދައިން ނަޝީދު ދޫކޮށް ނުލައްވާނޭ ކަމުގައި ގަބޫލުކުރާ ގިނަބަޔަކު އެބަ ތިއްބެވެ.

ސަބަބަކީ، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކޮށް ނުލެއްވިއްޖެނަމަ، ދެން އެމްޑީޕީއަށް ވެރިކަން ނުލިބޭނެކަމަށް ވިދާޅުވެފައި ވުމާއި، އަދި އޭގެ އިތުރުން، ވެރިކަން ބަދަލު ކުރުމަށް ކޮންގްރެސްއަށް އެއްބަސްވުމަކަށް ނާދެވިއްޖެނަމަ، ކުރިޔަށް އޮތް ރިޔާސީ ކެމްޕޭނުގައި އެމްޑީޕީގެ ކެނޑިޑޭޓަށް ތާއީދު ނުކުރައްވާނެކަމަށް ނަޝީދު ވިދާޅުވެފައި ވާތީއެވެ.

ފާއިތުވެދިޔަ ކޮންގްރެސްއަށްފަހު، އެމްޑީޕީންވަނީ އެޕާޓީގެ ރިޔާސީ ޕްރައިމަރީ އަންނަ އޮކްޓޫބަރުމަހު ބާއްވާނޭކަން ހާމަ ކޮށްފައެވެ. އަދި މި ޕްރައިމަރީގައި ވާދަކުރައްވާނޭކަމަށް ނަޝީދު ތަކުރާރުކޮށް އިއުލާން ކުރައްވާފައިވާއިރު، ރައީސް ސާލިހުވެސް ވިދާޅުވެފައިވަނީ އެމްޑީޕީއަށް އޮތް ހަމަ އެކަނި ޗޮއިސްއަކީ އެމަނިކްފާނު ކަމުގައެވެ.

އެހެންކަމުން މިހާރު ބެލެވޭގޮތުގައި، އެމްޑީޕީގެ އެތެރޭގައި އޮތް ސިޔާސީ ވާދަވެރިކަމުގެ މައިގަޑު އަމާޒަކަށް މިހާރު ވެގެން ގޮސްފައިވަނީ ކުރިޔަށް އޮތް ރިޔާސީ ޕްރައިމަރީއެވެ. އަދި މި ޕްރައިމަރީއަށް، އެ ޕާޓީގެ އެތެރޭގައި އޮތް ވާދަވެރިކަމުގެ ތެރެއިން، އެމްޑީޕީން ނިކުންނަށް ކެނޑިޑޭޓަކަށް އިންޑިއާގެ ރުހުން އޮތީ ކިހާ މިންވަރަކަށްތޯ ގިނަބަޔަކު ސުވާލު އުފައްދާ އެއް ސަބަބަކަށް ވެގެން ދަނީ، ރައީސް ސާލިހުގެ ސަރުކާރުން ފެށުނީއްސުރެ އިންޑިއާއާއެކީ ބާއްވަމުންދާ ގާތް ގުޅުންތަކެވެ. އަދި ޒަމާނުއްސުރެ ރާއްޖެއިން ގެންގުމުން އައިސްފައިވާ "އިންޑިއާ ފަރސްޓް ޕޮލިސީ"އަށް ރައީސް ސާލިހުގެ ސަރުކާރުން ދެމުންއައިސްފައި ޚާއްސަ އިސްކަމެވެ.

މިގޮތުން ބަލާއިރު، ގަބޫލުކުރެވޭ ގޮތުގައި ރައީސް ސާލިހު މީގެ ތިން ހަފްތާކުރިން އިންޑިއާއަށް ކުރެއްވި ރަސްމީ ދަތުރުފުޅަކީވެސް، އަދި މި ހަފްތާގައި، ނަޝީދު މިހާރު އިންޑިއާއަށް ކުރައްވަމުން ގެންދަވާ ނުރަސްމީ ދަތުރުފުޅަކީވެސް، އެއްގޮތަށްވުރެ ގިނަ ގޮތްގޮތުން، 2023ގެ ރިޔާސީ ޓިކެޓާއި ގުޅި ލާމެހިގެންދާ ދަތުރުފުޅުތަކެއް ކަމުގައި ގަބޫލުކުރާން ޖެހެއެވެ.

ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ރައީސް ސާލިހު އެންމެ ފަހުން އިންޑިއާއަށް ކުރެއްވި ދަތުރުފުޅުގައި އިންޑިއާއިން ބާރުއަޅާފައިވަނީ، ރިޔާސީ އިންތިޚާބާއި ކުރިމަތިލުމުގައި، އެމްޑީޕީގެ އެތެރޭގައި އުފެދިގެން ގޮސްފައިވާ ކޯޅުންތަކަށް ހައްލު ހޯދުމުގެ މައްޗަށެވެ. އެހެންނަމަވެސް އެ ހައްލު އެމްޑީޕީގެ އެތެރެއިން ނުހޯދިއްޖެނަމަ، އިންޑިއާގެ ތާއީދު ރައީސް ސާލިހަށް އޮންނާނޭ ކަމުގެ ފެހި ސިގްނަލް އިންޑިއާއިން ދީފައިވާކަމަށްވެސް، ޚަބަރު އޮންލައިންއާއި މައުލޫމާތު ހިއްސާކުރި ފަރާތުން ވިދާޅުވެފައި ވެއެވެ.

ނަޝީދުގެ ދަތުރުފުޅާ ދިމާކޮށް ޝާހިދުވެސް އިންޑިއާއަށް!

އެމްޑީޕީގެ ކުރިޔަށް އޮތް ރިޔާސީ ޕްރައިމަރީއަށް މަހެއްހާ މުއްދަތު އޮއްވާ، ނަޝީދު އިންޑިއާއަށް ކުރެއްވި ނުރަސްމީ ދަތުރުފުޅުން ގިނަ ބަޔަކު މޭރުން ކޮށްފައިވަނީ، ރިޔާސީ އިންތިޚާބުގެ ނިންމުންތަކާއި ގުޅިފައިވާ ދަތުރުފުޅެއްގެ ގޮތުގައެވެ.

ހަމައެއާއެކު، ނަޝީދުގެ އިންޑިއާ ދަތުރުފުޅަށް ލިބިގެންދިޔަ ސަމާލުކަން އެއަށްވުރެ ބޮޑުވެގެން ދިޔަ އަނެއް ސަބަބަކީ، ހަމަ މިދަތުރުފުޅާއި ދިމާކޮށް، އާންމު މަޖިލިހުގެ ރައީސްގެ ހައިސިއްޔަތުންނަމަވެސް، ފޮރިންގ މިނިސްޓަރ ޝާހިދު އިންޑިއާއަށް ވަޑައިގެންނެވި ވަޑައިގެންނެވުމެވެ.

އިންޑިއާގައި ހުންނަ ޔޫއެން މިޝަންއިން ހާމަކޮށްފައިވާ ގޮތުގައި ޝާހިދު އިންޑިއާއަށް ކުރައްވާ މި ދަތުރުފުޅަކީ މިމަހުގެ 28 އިން 29އަށް ކުރައްވާ ރަސްމީ ދަތުރުފުޅެކެވެ.

އަދި ޝާހިދުގެ މި ދަތުރުފުޅުގައި އިންޑިއާގެ ނާއިބު ރައީސް ޖަގްދީޕް ދަންކަރުއާއި ފޮރިންގ ސެކެޓްރީ ވިނޭ މޯހަން ކަވަޓްރާއައި ބައްދަލުކޮށް، ޖެނެރަލް އެސެމްބްލީގައި ކުރިޔަށްދާ މައްސަލަތަކުގެ އިތުރުން، އިންޑިއާއިން ޔޫއެންއެންގައި ކުރަމުންދާ މަސައްކަތްތަކާއި ގުޅޭގޮތުން މަޝްވަރާ ކުރައްވާނޭކަމަށްވެސް އިންޑިއާގައި ހުންނަ ޔޫއެން މިޝަންއިން ހާމަ ކޮށްފައި ވެއެވެ.

އެހެންނަމަވެސް، ނަޝީދުގެ ނުރަސްމީ ދަތުރުފުޅާއި ދިމާކޮށް، ޝާހިދު އިންޑިއާއަށް ކުރެއްވި މިދަތުރުފުޅަކީ ޔުއެންޖީއޭގެ ރައީސްގެ ހައިސިއްޔަރުން ކުރެއްވި ދަތުރުފުޅެއްނަމަވެސް، މިއީ ކުރިޔަށް އޮތް ރިޔާސީ އިންތިޚާބުގައި ވާދަކުރެއްވުމަށް އެމްޑީޕީގެ އެތެރޭގައި އުފެދިފައިވާ ސިޔާސީ ވާދަވެރިކަމާއި ގުޅުންހުރި، ދަތުރުފުޅެއްކަމުގައި ގިނަބަޔަކަށް ދެކެން މަޖުބުރިވީ ސަބަބުތަކެއް ހުރެގެން ކަމުގައި ގަބޫލުކުރާން ޖެހެއެވެ.

މިގޮތުން، ފާއިތުވި 5 އަހަރު ތެރޭގައި އިންޑިއާއިން ރާއްޖެއަށް ދޫކޮށްފައިވާ ބޮޑެތި ލޯންތަކާއި، ފޯރުކޮށްދީފައިވާ މާލީ އެހީތެރިކަމާއި، ރައީސް ސާލިހުގެ ސަރުކާރާއެކީ ބާއްވަމުންދާ ގާތް ގުޅުމުގެ ނަތީއަކީ، ކޮބައިކަން ރައީސް ސާލިހުގެ އިންޑީއާ ދަތުރުފުޅުންނާއި، އަދި ނަޝީދުގެ ދަތުރުފުޅާއި ދިމާކޮށް ޝާހިދު އިންޑިއާއަށް ކުރެއްވި ދަތުރުފުޅުގެ އިތުރުން، ނަޝީދު ނުރަސްމީ އިންޑިއާ ދަތުރުފުޅު އެމުނި އެކުލެވިގެން ގޮސްފައިވާ ގޮތުން ވަރަށްވެސް ރަގަޅަށް ވަނީ ސާފުވެގެން ގޮސްފައެވެ.

އެހެންކަމުން މިހާރު ގިނަ ބައެއްގެ އިންތިޒާރީތައް ގުޅިފައިވަނީ، މި ދަތުރުފުޅުތަކުގެ ނަތީޖާއަށެވެ. އެމްޑީޕީގެ ކުރިޔަށް އޮތް ޕްރައިމަރީއާއި ހަމައިން މި ދަތުރުފުޅުގެ ނަތީޖާތައް ވަޒަން ކުރެވި، އެމްޑީޕީގެ އެތެރޭގެ ކޯޅުމުގައި އިންޑާއިން ރުހުންދީގެން އޮތީ ކޮން ފެކްޝަނަކަށް ކަންވެސް ވަރަށްވެސް ރަގަޅަށް ހާމަވެގެން ދާނޭކަމީ ކަށަވަރުވެ ޔަގީންވާން އޮތް ކަމެކެވެ.