ކަންކަމުގައި އުދަގޫކޮށް، ދުއްތުރާކޮށް ކަންތަތައް ހުއްޓުވަން މަސައްކަތް ކުރުމަކީ ޚިޔާލު ތަފާތުވުމެއް ނޫންކަމަށާއި، މިއަދުވެސް އެކަން އެބަ ކުރިޔަށް ދާކަމަށާއި، އެހެންނަމަވެސް އެކަންކަން ގިރާކޮށް، ސަރުކާރުން ގެންދަނީ ރައްޔިތުންގެ ވެރިކަމެއް ކޮށްދެއްވަމުން ކަމުގައި ރައީސް ސާލިހު ވިދާޅުވެއްޖެއެވެ.
މިހާރު މ. އަތޮޅަށް ކުރައްވަމުން ގެންދަވާ ދަތުރުފުޅުގައި، މ.ދިއްގަރު ގޮނޑުދޮށް ހިމާޔަތްކުރުމުގެ މަސައްކަތް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ މި ސަރުކާރު ވެރިކަމަށް އައިއިރު ރައްޔިތުން ބޭނުންވާ އެތައް ގިނަ ކަންތައްތަކެއް ހުރީ ނުފުދި ކަމަށެވެ. އަދި ކުރީގެ ސަރުކާރުތަކުން އެކަންކަން ކޮށްދިނުމަށް ދިއްގަރު ރައްޔިތުންނަށް ވައުދުވެފައި އޮތް ކަމަށްވެސް ރައީސް ސާލިހު ވިދާޅުވިއެވެ.
ރޭ ދިއްގަރުގެ އުތުރުފަރާތުގެ ހިއްކި ބިމުގައި އޮތް ރަސްމިއްޔަތުގައި ވާހަކަ ދައްކަވަމުން ރައީސް ސާލިހު ވިދާޅުވީ، ދިއްގަރުގެ ތަރައްޤީއަށް މަސައްކަތްކުރުމުގައި، ސަރުކާރަށް އެއްބާރުލުންދޭ ކައުންސިލެއް އޮތުމާއި ދާއިރާގެ މަޖިލީހުގެ މެމްބަރުގެ ފަރާތުން ލިބިވަޑައިގަންނަވާ އެއްބާރުލެއްވުން ފާހަގަކުރައްވާ ކަމަށެވެ. އަދި އެއީ ދިއްގަރު ބިން ހިއްކުމުގެ މަޝްރޫޢު ކުރިޔަށް ގެންދިޔުމުގައި ސަރުކާރަށް ލިބުނު ވަރަށްބޮޑު ފަސޭހައެއް ކަމަށް ވިދާޅުވިއެވެ.
އަޅުގަނޑު މިދަންނަވަނީ، ޚިޔާލު ތަފާތުވުން ނުހުންނާށެކޭ ނޫން. އުނދަގޫކޮށް ދުއްތުރާކޮށް، ކަންތައްތައް ހުއްޓުވުމަށް މަސައްކަތް ކުރުމަކީ ޚިޔާލުތަފާތުވުމެއް ނޫން. މިއަދުވެސް އެކަން އެބައޮތް އެހެން ނަމަވެސް އެކަންތައްތައް ގިރާކޮށް އަޅުގަނޑުމެން މިދަނީ ރައްޔިތުންނަށް ރައްޔިތުންގެ ވެރިކަމެއް ކޮށްދެމުން
މި ރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވިދާޅުވިއެެވެ.
މިރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވިދާޅުވީ، ދިއްގަރަށް އުދައެރުން ހުއްޓުވުމަށްޓަކައި މިހާތަނަށް ކުރެވުނު މަސައްކަތުގައި ގާތްގަނޑަކަށް، 700 މީޓަރުގެ ސަރަހައްދަކަށް ވެލިއަޅައި، ހިލަތޮށި ލެވިފައިވާ ކަމަށެވެ. އަދި ކުރިޔަށް މިއޮތް ދެތިން އަހަރުގައި މިލެވުނު ހިލަތޮށިން ލިބެނީ ކިހާވަރެއްގެ ހިމާޔަތެއްތޯ ބަލައި، އިތުރަށް ރަނގަޅު ކުރަންޖެހޭ ކަމެއް އޮތްނަމަ އެކަމެއް ސަރުކާރުން ކޮށްދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވެފައި ވެއެވެ.
ރައީސް ސާލިހު މިހާރު މ. އަތޮޅަށް ކުރައްވަމުން ގެންދަވާ ދަތުރުފުޅުގައި މުލަކު އަތޮޅުގެ 5 ރަށަކަށް ވަޑައިގަންނަވާނެއެވެ. އިއްޔެ ފެއްޓެވި މި ދަތުރުފުޅުގައި ރައީސް ސާލިހު ގެންދަވަނީ މި ރަށްތަކުގެ ތަރައްގީގެ ގިނަ މަޝްރޫއުތަކެއް ބައްލަވާ ލައްވާ އަދި ކުރިޔަށް ރޭވިފައިހުރި ގިނަ މަޝްރޫއުތަކުގެ މައުލޫމާތު ދެއްވަމުންނެވެ.
ކޮމެންޓު ފޮނުވާ