ޔަހޫދީންނާއި އެމެރިކާ ގުޅިގެން އިރާނަށް ހަމަލާތައް ދެމުންދާ ދަނޑިވަޅެއްގައި، އިސްލާމީ އުންމަތަށް ކުރިމަތިވެފައިވާ ނުރައްކާތެރި ދުވަސްތަކުން ސަލާމަތްވުމަށްޓަކައި، މުޅި އުންމަތް އެކަތިގަނޑަކަށް ވުމަށް މިއަދުގެ ހުކުރު ޚުތުބާގައި ގޮވާލައިފިއެވެ.
މިއަދުގެ ޚުތުބާގައި ފާހަގަކުރެއްވި ގޮތުގައި އިސްލާމީ އުންމަތުގެ ދުޝްމަނުން ދަނީ ކެނޑިނޭޅި މި އުންމަތް ބަލިކަށިކޮށް، ބައިބައިކޮށްލުމަށް ގިނަގުނަ ރޭވުންތައް ރާވަމުންނެވެ. އޭގެ ނަތީޖާއެއްގެ ގޮތުން ދުނިޔޭގެ އެކި ކަންކޮޅުތަކުގައި މުސްލިމުންގެ ލޭއޮހޮރުވައިލައި، އިސްލާމީ ޤައުމުތަކުގެ މެދުގައި ފިތުނަ އުފައްދައި ބައިބައިވުންތައް އުފެދިފައިވާ މަންޒަރު ފެންނަމުންދާކަމަށް ޚުތުބާގައި ވިދާޅުވިއެވެ.
މިފަދަ ނާޒުކު ދަނޑިވަޅެއްގައި މުސްލިމުންގެ މެދުގައި އޮންނަންޖެހޭނީ އަޚުވަންތަކަމާއި އެއްބައިވަންތަކަންކަން ހަނދާންކޮށްދެއްވަމުން، އުންމަތުގެ ސަފުތައް ބަދަހިކުރުމަށް ޚުތުބާގައި ވަނީ ބާރުއަޅުއްވާފައެވެ. އަދި އިސްލާމީ މަތިވެރި އަޤީދާގައި ސާބިތުވެ ތިބުމަށާއި، މުސީބާތާއި ނުރައްކަލުގެ ވަގުތުގައި ކެތްތެރިކަމާއި ޙިކުމަތްތެރިކަން އިސްކުރުމަށްވެސް ވަނީ ނަސޭހަތްތެރިވެފައެވެ.
ޚުތުބާގައި އިތުރަށް ބަޔާންކުރެއްވި ގޮތުގައި އިސްލާމީ އުންމަތަށް ނަސްރާއި ކާމިޔާބު ލިބޭނީ އެންމެން އެކަތިގަނޑެއްގެ ގޮތުގައި ތިބެގެންނެވެ. އަދި ބައިބައިވެ ވަކިވަކިވެއްޖެނަމަ އުންމަތް ބަލިކަށިވެ، ދުޝްމަނުންގެ ކުރިމަތީގައި ނާކާމިޔާބުވެދާނެކަމުގެ އިންޒާރުވެސް މިއަދުގެ ޚުތުބާގައި ވަނީ ދީފައެވެ.
ކޮމެންޓު ފޮނުވާ