އެސްޖޭ ކޮންސްޓްރަކްޝަނުން އަމިއްލަ ޚަރަަދުގައި އަޅައިދޭގޮތަށް މީގެ އަހަރެއްހާ ދުވަސްކުރިން ސޮއިކުރި ޒިކުރާ މިސްކިތް އިމާރާތްކުރުމަށް، ދީލަތި އެހީއެއް ލިބިފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު ޝަހީމް މީޑިއާތަކަށް ފޮނުއްވި މެސެޖެއްގައި ވިދާޅުވީ، ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަށް އެހީ ދިން ފަރާތުން، މި ރަމަޟާން މަހުގެ 27 ވިލޭރޭ އެ މިސްކިތުގެ ބިންގާ އެޅުމަށް އެދިވަޑައިގެންފައިވާ ކަމަށެވެ. ނަމަވެސް އެހީ ދިން ފަރާތުގެ ތަފްސީލެއް ހާމަކުރައްވާފައެއް ނުވެއެވެ. މިނިސްޓަރު މިހެން ވިދާޅުވެފައިވާއިރު، ޒިކުރާ މިސްކިތް ތިން ބުރިއަށް އިމާރާތްކުރުމަށް އެސްޖޭ ކޮންސްޓުރަކްޝަނާ ހަވާލުކޮށް، އެކަމުގެ އެއްބަސްވުމުގައި ސޮއިކުރީ 2024 ވަނަ އަހަރުގެ ޖެނުއަރީ މަހުގެ 24 ވަނަ ދުވަހުއެވެ. އޭރު އިސްލާމިކް މިނިސްޓްރީން ބުނެފައިވަނީ އެ މަސައްކަތް އެސްޖޭއިން ކޮށްދެނީ އެ ކުންފުނީގެ އަމިއްލަ ޚަރަދުގައި ކަމަށެވެ.
އެ އެއްބަސްވުމުގައި ސޮއިކުރިތާ ފަސްމަސް ފަހުން، 2024 ވަނަ އަހަރުގެ މޭ މަހުގެ 9 ވަނަ ދުވަހު މިނިސްޓަރު ޝަހީމް ވަނީ މިސްކިތް ނިމޭއިރު ހުންނާނެ ގޮތުގެ ކުރެހުންވެސް ދައްކާލައްވާފައެވެ. އަދި މިސްކިތުގެ އަމަލީ މަސައްކަތް އެ އަހަރުތެރޭގައި ފެށޭނެކަމަށްވެސް އޭރު ވިދާޅުވިއެވެ. އެހެންނަމަވެސް އޭގެ ފަހުން އެސްޖޭއާއެކު ވެވުނު އެއްބަސްވުމަށް ވީގޮތެއް ހާމަނުކުރައްވައި، މިއަދު މިނިސްޓަރު އިއުލާންކުރެއްވީ މިސްކިތް އެޅުމަށް އެހެން ފަރާތެއްގެ އެހީ ހަމަޖެހުނު ވާހަކައެވެ.
ޒިކުރާ މިސްކިތުގެ މަޝްރޫއަކީ މީގެ ކުރިންވެސް ތަފާތު މައްސަލަތައް ފެންމަތިވެފައިވާ މަޝްރޫއެކެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި 2018 ވަނަ އަހަރުވެސް އެތަނުގައި މިސްކިތަކާއެކު 10 ބުރީގެ އޮފީސް އިމާރާތެއް އަޅަން އެސްޖޭއާ ހަވާލުކުރިއެވެ. ނަމަވެސް އެކަމުގައި ކޮރަޕްޝަން ހިމެނޭކަމަށް އޭސީސީން ނިންމުމުން ނިމިދިޔަ އެމްޑީޕީ ސަރުކާރުން އެ އެއްބަސްވުން ބާތިލުކުރިއެވެ. އަދި މަގާމުގެ ނުފޫޒު ބޭނުންކުރެއްވި ކަމުގެ ތުހުމަތުގައި އޭރުގެ އިސްލާމިކް މިނިސްޓަރު ޑރ. އަހްމަދު ޒިޔާދު ބާގިރުގެ މައްޗަށް ދައުވާވެސް ކުރިއެވެ. ދަށު ކޯޓުން އެ މައްސަލަ ސާބިތުނުވުމުން ޕީޖީ އޮފީހުން ވަނީ އެ މައްސަލަ ހައިކޯޓުގައި އިސްތިއުނާފުކޮށްފައެވެ.
ކޮމެންޓު ފޮނުވާ