އީރާނުގެ ހަމަނުޖެހުންތަކުގެ ސަބަބުން ދުނިޔޭގެ ސަޕްލައި ޗެއިންއަށް ކުރިމަތިވެފައިވާ ގޮންޖެހުންތަކާ ގުޅިގެން، މެދުއިރުމައްޗާއި އޭޝިއާ އަދި ޔޫރަޕް ގުޅުވައިދޭ ދެ ޚިދުމަތެއް ވަގުތީގޮތުން މެދުކަނޑާލަން ނިންމައިފިކަމަށް ދުނިޔޭގެ އެންމެ ބޮޑު ކޮންޓެއިނަރު ޝިޕިންގ ކުންފުނި، މާސްކުން ހުކުރު ދުވަހު ހާމަކޮށްފި އެވެ.
މާސްކުން ކަސްޓަމަރުންނަށް ފޮނުވި އެޑްވައިޒަރީއެއްގައި ބަޔާންކޮށްފައިވާ ގޮތުގައި، މި ފިޔަވަޅަކީ ކުންފުނީގެ މުވައްޒަފުންނާއި އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް އެޅި މުހިންމު ފިޔަވަޅެކެވެ. އަދި މިއީ އެ ކުންފުނީގެ ވިއުގައިގެ މަސައްކަތްތަކަށް ކުރިމަތިވަމުންދާ ބުރޫތައް ކުޑަކޮށް، އޮޕަރޭޝަންތައް ރައްކާތެރިކަމާއެކު ކުރިއަށް ގެންދިއުމަށް ނިންމި ނިންމުމެއް ކަމަށް އެ ކުންފުނިން ބުނެފައިވެ އެވެ.
މި ހަމަނުޖެހުންތަކުގެ އަސަރު ކަނޑުދަތުރުފަތުރުގެ ނިޒާމަށް ވަރަށް ބޮޑަށް ކޮށްފައިވާއިރު، ފްރައިޓް ޑޭޓާ އެނަލިސިސް ހަދާ ފާމެއް ކަމަށްވާ ޒެނެޓާއިން ހާމަކޮށްފައިވާ ގޮތުގައި ގަލްފް ސަރަހައްދުގައި މިވަގުތުވެސް 147 ކޮންޓެއިނަރު އުޅަނދު ވަނީ ތާށިވެފަ އެވެ. މީގެ ނަތީޖާއެއްގެ ގޮތުން ބަނދަރުތައް ތޮއްޖެހި، މުދާ އުފުލުމުގެ އަގުތައް އުފުލެން ފަށާފައިވާކަން އެ ފަރާތްތަކުން ފާހަގަކުރެ އެވެ.
މާހިރުން ވިދާޅުވާ ގޮތުގައި މި ބަދަލުތަކުގެ ސަބަބުން އޭޝިއާއިން ފެށިގެން ޔޫރަޕާ ހަމައަށް މުޅި ދުނިޔޭގެ ސަޕްލައި ޗެއިންއަށް ލޮޅުން އަންނާނެ އެވެ. މާސްކުން ވަނީ ހާލަތު ވަރަށް ގާތުން ބަލަމުންދާ ކަމަށާއި، އޮޕަރޭޝަންތަކަށް ގެންނަ ބަދަލުތަކުގެ މައުލޫމާތު ކަސްޓަމަރުންނާ ހިއްސާކުރަމުން ގެންދާނެ ކަމުގެ ޔަގީންކަން ދީފަ އެވެ.
ކޮމެންޓު ފޮނުވާ