އެމްއެމްޕީއާރުސީގެ ޚިޔާނާތުގެ ފައިސާ ދައުރުކުރުމަށް ބޭނުން ކޮށްފައިވާ އެސްއޯއެފްގެ އެކައުންޓުތައް ދޫކޮށްލުމަށް ސިވިލް ކޯޓުން އަމުރު ކޮށްފިއެވެ.
މައުލޫމާތު ލިބިފައިވާ ގޮތުގައި މި އެކައުންޓުތައް އަންފްރީޒް ކުރުމަށް ސިވިލް ކޯޓުން އަމުރު ކޮށްފައިވަނީ މި މަހުގެ 7 ވަނަ ދުވަހު އެ ކޯޓުން ނެރުނު އަމުރެއްގައެވެ.
އެސްއޯއެފްގެ އެކައުންޓުތައް އަންފްރީޒް ކުރުމަށް އަމުރުކުރިއިރު އެ އެކައުންޓުގައި ހުރީ ކިހާ އަދަދެއްގެ ފައިސާއެއް ކަމެއް ސާފުވެފައެއް ނުވެއެވެ. އަދި އަންފްރީޒް ކުރުމަށް އަމުރު ކޮށްފައިވަނީ ކޮން ފަރާތަކުން ހުށަހަޅައިގެން ކަމެއްވެސް ސާފުވެފައެއް ނުވެއެވެ.
މިމައްސަލައާއި ގުޅޭގޮތުން އޭސީސީން ހާމަ ކޮށްފައިވާ ގޮތުގައި، އެ ކޮމިޝަނުން މިހާރު ގެންދަނީ، މިއެކައުންޓު ފްރީޒް ކުރުމަށް ކުރާންޖެހޭ މަސައްކަތްތައް ކުރަމުންނެވެ.
ރާއްޖޭގެ ގިނަ އަދަދެއްގެ ފަޅުތަކާއި ރަށްތައް ކުއްޔަށް ދީގެން ދަައުލަތަށް ލިބެންޖޭހޭ ގިނަ އަދަދެއްގެ ފައިސާ ޖަމާކޮށް، ދައުރު ކުރުމަށް ބޭނުން ކޮށްފައިވަނީ އެސްއޯއެފްގެ އެކައުންޓެވެ. އަދި މި އެކައުންޓުން އެކި މީހުންނަށް ފައިސާ ދޫކޮށްފައި ވާއިރު، ޑޮލަރު ގަތުމުގެ ބޭނުމުގައި އެކި ފަރާތްތަކުން ވަނީ އެސްއޯއެފްގެ ޗެކްތަކުން އަމިއްލަ ފަރާތްތަކުގެ އެކައުންޓުތަކަށް ފައިސާ ޖަމާ ކޮށްފައެވެ.
