ކޯވިޑް19 އާއި ގުޅިގެން ބޯޑަރު ބަންދު ކޮށްފައި އޮތުމަށްފަހު، އެގައުމަށް ފަތުރުވެރިންނަށް އެތެރެވުމުގެ ފުރުސަތު ފަހިކުރުމުގެ މަސައްކަތް ޖަޕާން ސަރުކާރުން ފަށައިފިއެވެ. ޖަޕާނުގެ ބޯޑަރުތައް ހުޅުވާލުމުގެ މަސައްކަތް އެގައުމުގެ ސަރުކާރުން ފަށާފައި މިވަނީ އެގައުމުގައި މިއަހަރު ބޭއްވުމަށް ހަމަޖެހިފައިވާ ދުނިޔޭގެ އޮލިމްޕިކް ކުޅިވަރުވަރު މުބާރާތް 2021 ވަނައަހަރަށް ލަސް ކުރެވިފައި ވަނިކޮށެވެ. އޮލިމްޕިކް ކުޅިވަރު މުބާރާތް މިހާރު ބޭއްވުމަށް ހަމަޖެހިފައި ވަނީ އަންނަ އަހަރުގެ ޖުލައި މަހުގެ 23 ވަނަ ދުވަހުން އޮގަސްޓް 8 އާއި ހަމައަށެވެ.
ޖަޕާނުގެ ބޯޑަރުތައް ހުޅުވާލުމަށް މިހާރު ކުރެވެމުންދާ މަސައްކަތްތަކުގެ ތެރޭގައި އެގައުމަށް ޒިޔާރަތް ކުރާ ކޯވިޑަށް ޝައްކު ކުރެވޭ ފަތުރުވެރިންނަށް ޚާއްސަ ކޮންސަލްޓޭޝަން ސެންޓަރެއް ގާއިމްކުރުމާއި، އަދި މީގެ އިތުރުން ޚާއްސަ ސްމާރޓް ފޯން އެޕްލިކޭޝަނެއް މެދުވެރިކޮށް ފަތުރުވެރިންގެ ސިއްޙީ ޙާލަތު ދެނެގަނެވޭނެ އިންތިޒާމް ހަމަޖެއްސުން ހިމެއެވެ. މިގޮތުން ޖަޕާނަށް ޒިޔާރަތް ކުރުމަށް ބޭނުންވާ އެގައުމުން ބޭރުގެ ފަތުރުވެރިން އެ ފަތުރުވެރިޔަކު ނިސްބަތްވާ ގައުމެއްގަ ނުވަތަ އެންމެ ކައިރި ގައުމެއްގަ ހުންނަ ޖަޕާން ކޮންސިއުލޭޓެއް މެދުވެރިކޮށް ވިސާ ހޯދުމަށްފަހު، މި އެޕްލިކޭޝަން ޑައުން ލޯޑްކޮށް ހެލްތު ޗެކަޕެއް ހަދަން ޖެހެއެވެ. އަދި ޖަޕާނަށް ވަނުމަށްފަހުވެސް މި އެޕްލިކޭޝަން މެދުވެރިކޮށް ސިއްޙީ ހާލަތާއި ގުޅޭ މައުލޫމާތު 14 ދުވަސްދެން ފޯރުކޮށްދޭން ޖެހޭއިރު މި މުއްދަތުގެ ތެރޭގައި ކަރަންޓީން ވުން ލާޒިމެއް ނޫނެވެ. އަދި މީގެ އިތުރުން، ޖަޕާނަށް ދަރުތު ކުރުމުގެ ކުރިން ނެގެޓިވް ކޯވިޑް ޓެސްޓެއް ހެދުމުގެ އިތުރުން ޖަޕާނަށް އެތެރެ ވުމަށްފަހު ކުރިމަތިވެދާނެ ކޯވިޑްގެ ހާލަތަކަށް ތައްޔާރުވެ ތިބުމުގެ ގޮތުން ޕްރައިވެޓް މެޑިކަލް އިންޝޫރަންސްއެއްވެސް އޮންނަން ޖެހޭނެކަމަށް ޖަޕާން ސަރުކާރުން މައުލޫމާތު ދެއެވެ. ޖަޕާނުގެ ޓޯކިޔޯގައި އަންނަ އަހަރު ބޭއްވުމަށް ހަމަޖެހިފައިވާ އޮލިމްޕިކް ކުޅިވަރު ހަރަކާތްތައް ބެލުމަށް އެގައުމަށް އެތެރެވެވޭނީ ކޯވިޑް ނެގެޓިވް ޓެސްޓެއް އޮންނަ ފަތާތްތަކަށް އެކަންޏެވެ.
ބޯޑަރުތައް ހުޅުވާލުމުގެ ގޮތުން ހަމަޖައްސާ މިއިންތިޒާމަތަކަށް އަންނަ ފިނި މޫސުން ނިމޭހިސާބުގައި ލަސްވެގެން އަމަލީ ސިފަ ގެނައުމަށް ޖަޕާން ސަރުކާރުން ދަނީ މަސައްކަތް ކުރަމުންނެވެ. ޖަޕާނުގެ ފިނިމޫސުން ނިމި ހޫނު މޫސުމަށް ފެށެނީ ފެބްރުއަރީ މަސް ނިމި މާރިޗް މަސް ފެށޭ ހާތާގައެވެ.
ކޯވިޑް19 މުޅި ދުނިޔޭގައި ފެތުރެން ފެށުމާއިއެކު ޖަޕާނުންވެސްވަނީ އެގައުމުގެ ބޯޑަރުތައް ބަންދު ކޮށްފައެވެ. މިގޮތުން ދުނިޔޭގެ 159 ގައުމަކުން އެގައުމަށް މީހުން އެތެރެވުން ޖަޕާން ސަރުކާރުން ވަނީ މަނާ ކޮށްފައެވެ. އެހެންނަމަވެސް ދާދިފަހުން ޖަޕާނުން ވަނީ މައިގަޑު ބައެއް ވިޔަފާރީގެ ދަތުރުތައް އެގައުމަށް ކުރުން ހުއްދަ ކޮށްފައެވެ.
