ޖަޕާންގެ ބޮޑުވަޒީރު ފުނިއޯ ކިޝިޑާ ކޯވިޑް19 އަށް ޕޮޒިޓިވް ވެއްޖެއެވެ. ކިޝިޑާގެ އޮފީހުން ހާމަ ކޮށްފައިވާ ގޮތުގައި ކޯވިޑަށް ޕޮޒިޓިވް ވުމާއި ގުޅިގެން ކިޝިޑާ މިހާރު ގެންދަވަނީ ޓޯކިޔޯގައި ހުންނާ އޭނާގެ ރަސްމީ ގެކޮޅުގައި އަރާމު ކުރައްވަމުން ކަމުގައެވެ.
ހަފްތާއެއް ވަންދެން ޗުއްޓީގައި ހުންނެވުމަށްފަހު، ކިށިޑާ އޮފީހަށް ނުކުންނެވުމަށް ހަމަޖެހިފައިވަނީ މި ހަފްތާގެ ހޯމަ ދުވަހުއެވެ. އަދި މި ހަފްތާގެ ފަހުކޮޅު ރަސްމީ ދަތުރެއްގައި ގައުމުން ބޭރަށް ވަޑައިގަތުމަށް ވަނީ ހަމަޖެހިފައެވެ.
ކެބިނެޓް އޮފީހުގެ ތަރުޖަމާން ވިދާޅުވި ގޮތުގައި، މިއަދު ކިޝިޑާ ކެއްސާ ހުން އައުމާއި ގުޅިގެން ޕީސީއާރު ޓެސްޓު ހެދުމުން ވަނީ ކޯވިޑަށް ޕޮޒިޓިވްކަން ވަނީ ކަށަވަރު ވެފައެވެ.
ޖަޕާނުގައި ކޯވިޑް ކޭސްތައް މިހާރުވަނީ ރެކޯން މިންވަރަށް މަތިވެފައެވެ. މިގޮތުން މި ހަފްތާގެ އާދީއްތަ ދުވަހުވެސް ވެރިރަށް ޓޯކިޔޯގައިވަނީ 24،780 ކޯވިޑް ކޭސްތައް ރިޕޯޓު ކުރެވިފައެވެ. އަދި ސިޔާސީ ފަރާތްތަކާއި ސިއްޙީ އިދާރާތަކުން މިހަރުވަނީ ކޯވިޑް ކޭސްތައް އިތުރުވަމުން ދާދިއުން ކޮންޓްރޯލް ކުރުމަށް އަޅާނެ އާ ފިޔަވަޅުތަކާއި ގުޅޭގޮތުން އިތުރަށް މަޝްވަރާ ކުރަން ފަށާފައެވެ.
ޖަޕާނުގައި ކޯވިޑް ޖެހޭ މީހުންގެ އަދަދު އާދަޔާ ޚިލާފަށް އިތުރުވެގެން ދިޔަ ނަމަވެސް، ކޯވިޑް19ގައި މަރުވި މީހުންގެ އަދަދު އެގައުމަގައި އަދިވެސް އުޅެނީ ވަަރަށް ދަށަކޮށެވެ. އަދި ދުނިޔޭގެ 3 ވަނައަށް އެންމެ ވަރުގަދަ އިގްތިސާދެއް އޮތް ގައުމު ހިމެނިގެން ދަނީ ކޯވިޑްގެ ސަބަބުން އެންމެ ކުޑަކޮށް އަަސަރު ކުރި ގައުމުތަކުގެ ތެރޭގައެވެ.
