މިމަހުގެ 9 ވަނަ ދުވަހު ބޭއްވުނު ކެންޔާގެ ރިޔާސީ އިންތިޚާބުގެ ނަތީޖާ ގަބޫލު ނުކުރައްވާނޭކަމަށް، އިންތިޚާބުގައި ވާދަކުރެއްވި، ރައިލާ އޯޑިންގާ ވިދާޅު ވެއްޖެއެވެ. އޭނާ ވިދާޅުވި ގޮތުގައި ކެންޔާގެ ޑިމޮކްރަސީއަށްވަނީ ދިގު މުއްދަތަކަށް ކުރިމަތިވާނޭ ގާނޫނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ.
ފާއިތުވެދިޔަ ހުކުރު ދުވަހު އިއުލާންކުރި އިންތިޚާބުގެ ނަތީޖާއިން، ކުޑަ ތަފާތަކުން ކުރި ހޯއްދެވީ މިހާރުގެ ނާއިބު ރައީސް ވިލިއަމް ރުޓޯއެވެ.
އިންތިޚާބުގެ ނަތީޖާއާއި ގުޅޭގޮތުން އޯޑިންގާ ކޮމެންޓް ކޮށްފައިވަނީ މިވަނީ އިއުލާން ކުރެވިގެންދިޔަ އިންތިޚާބުގެ ނަތީޖާ ސައްހަކަމަށް އިލެކްޝަން ކޮމިޝަންގެ 7 މެމްބަރުންގެ ތެރެއިން 4 މެމްބަރުން ވިދާޅުވިތާ މަދު ވަގުތު ކޮޅެއްގެ ތެރޭގައެވެ. އޭގެ އެއް ދުވަސްކުރިން އިލެކްޝަންސް ކޮމިޝަންގެ މެމްބަރުންވަނީ، ވޯޓު ގުނުމުގެ އެންމެ ފަހުގެ މަރުހަލާ ކުރިޔަށް ގޮސްފައިވަނީ ދެފުށް ފެންނަ ގޮތަކަށް ނޫންކަމުގައި ވިދާޅުވެފައެވެ.
"އަރެމެން ދެކޭ ގޮތުގައި، އިލެކްޝަންސް ކޮމިޝަންގެ ޗެއަރމަން ވަފުލާ އިއުލާން ކޮށްފައިވާ ނަތީޖާތަކަކީ ބާތިލް ނަތީޖާތަކެއް، އަދި ކޯޓުތަކުން މި ނަތީޖާތައް ބާތިލް ކުރަން ޖެހޭނެ،" އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި އޯޑިންގާ ވިދާޅުވެފައި ވެއެވެ.
"އިއްޔެ (ނަތީޖާ އިއުލާންކުރި ދުވަހު) އަހަރެމެންނަށް ފެނިގެން ދިޔައީ، ކެންޔާގެ ގާނޫނު އަސާސީއަށާއި ހެދިފައިހުރި ގާނޫނުތަކާއިވެސް ޚިލާފަށް ކަންކަން ކުރެވިގެން ދިޔަތަން."
ބެލެވޭ ގޮތުގައި އޯޑިންގާ އިންތިޚާބުގެ މައްސަލަ ވަރަށް އަވަހަށް ކެންޔާގެ ސުޕްރިމް ކޯޓަށް ހުށަހަޅުއްވާނެއެވެ.
ކެންޔާގެ އިލެކްޝަންސް ކޮމިޝަންގެ ޗެއަރމަން ޗެބުކަޓި ވަނީ، މިއިންތިޚާބު 50.49 އިންސައްތަ ކާމިޔާބު ކުރައްވައިގެން އެގައުމުގެ ނާއިބު ރައީސް ވިލިއަމް ރުޓޯ އިންތިޚާބު ކާމިޔާބު ކުރެއްވިކަން ހޯމަ ދުވަހު އިއުލާން ކުރައްވާފައެވެ. އަދި އޯޑިންގާއަށް ކާމިޔާބު ކުރެއްވުނުކަމަށް އިއުލާން ކޮށްފައިވަނީ 48.5 އިންސައްތަ ވޯޓެވެ.
އޯޑިންގާގެ ނޫސްވެރިންގެ ބައްދަލުވުމުގެ ކުރިން، އިލެކްޝަންސް ކޮމިޝަންގެ ވައިސް ޗެއަރމަން ޖޫލިއާނާ ޗެރެރާ މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ އޭނާއާއި އިތުރު ކޮމިޝަނަރުން ނަތީޖާ ގަބޫލު ނުކުރައްވާ ކަމަށެވެ.
ޗެރޭރާ ވިދާޅުވަފައިވަނީ ކުޑަތަފާތަކުން ރުޓޯއަށް އިންތިޚާބުގައި ކުރި ލިބިފައިވަނީ ނަތީއަށް ބަދަލު ގެނެސްގެން ކަމުގައެވެ. އަދި ތުހުމަތު ކޮށްފައިވަނީ، އެންމެ ފަހުގެ ހިސާބުތަކާއި ގުޅޭގޮތުން އެމީހުން ކޮށްފައިވާ ސުވާލުތަކަށް އިލެކްޝަންސް ކޮމިޝަންގެ ޗެއަރމަން ފަރުވާލެއް ނުބެހެއްޓެވި ކަމުގައެވެ. އޭނާ ވިދާޅުވެފައިވަނީ އިންތިޚާބު ބާއްވާފައިވަނީ ރަގަޅަށް ކަމަށާއި، ނަތީޖާ އޮޅުވާލާފައިވަނީ އެންމެ ފަހުގެ ހިސާބުތަކުން ކަމުގައެވެ.
