ސައުތުގެ މަޝްހޫރު އެކްޓަރު ޕްރަބާސް ގެ ކުރިއަށް އޮތް ފިލްމް "ސަލާރް" ރިލިޒް ކުރާ ދުވަސް އިއުލާން ކޮށްފިއެވެ.
ސޯޝަލް މީޑިއާގައި ފިލްމުގެ ޕޯސްޓަރެއް ހިއްސާ ކުރަމުން ޕްރަބާސް ބުނެފައިވަނީ 2023 ވަނަ އަހަރުގެ ސެޕްޓެމްބަރު މަހުގެ 28 ވަނަ ދުވަހަށް ފިލްްމ ރިލީޒް ކުރުމަށް ތާވަލް ކޮށްފައިވާ ކަމަށެވެ.
"ސަލާރް"ގެ މަސައްކަތަށް، ޕްރަބާސްވަނީ އޭނާގެ ހަށިގަނޑަށް ވަރަށް ބޮޑަށް ބަދަލުގެނެސްފައިއެވެ. އެގޮތުން ހަށިގަނޑު ވަރުގަދަ ކޮށްލައި މަސްތަށް އަރުވައލައިފައި ހުރި ފޮޓޯޢެއް ވެސް މީގެ ކުރިން ވަނީ ދައްކައިލައިފައިއެވެ.
ހުރިހާ ފިލްމް އަކަށްވެސް ވަރަށް ބޮޑަށް ތައްޔާރުވާ އެކްޓަރެއްގެ ގޮތުގައި ފާހަގަ ކުރެވޭ ޕްރަބާސް އެންމެ ފަހުން ފެނިގެންދިއައީ ޕޫޖާ ހޭގްޅޭ އާއި އެކުގައި "ރާދޭ ޝިޔަމް" އިންނެވެ.
ޕްރަޝަންތު ނީލް ޑައިރެކްޓްކުރާ "ސަލާރު"ގައި ޕްރަބާސްގެ އިތުރުން ޝުރުތީ ހަސަން އާއި ޕްރިތުވިރާޖް ސުކުމަރަން އަދި ޖަގަޕަތީ ބާބޫ ވެސް ފެނިގެންދާނެއެވެ.
ފިލްމް ރިލީޒް ކުރާ ދުވަސް އިއުލާން ކުރި އިރު ޕްރަބާސް ހުރީ ކަކުލަށް ލިބުނު އަނިޔާއެއްގެ ސަބަބުން ފިލްމީ މަސައްކަތާއި ދުރުގައިއެވެ.
View this post on Instagram
މީގެ ތިން މަސް ކުރިން ޕްރަބާސް ވަނީ ކަކުލުގެ ސާޖަރީއެއް ހަދައިފައެވެ. އެއަށް ފަހު އޭނާ މިހާރު މަސައްކަތް ކުރަމުން އަންނަ ފިލްމް "ޕްރޮޖެކްޓް ކޭ"ގެ ޝޫޓިންގައި އުޅެނިކޮށް އަނެއްކާ ކަކުލުގައި ރިއްސާތީ އޭނާ ވަނީ އިމްޖެންސީ ބްރޭކެއް ނަގައިފައެވެ.
ޕްރަބާސްގެ ކަކުލުގައި މައްސަލަ ޖެހުނީ އޭނާގެ އެންމެ ކާމިޔާބު އެއް ފިލްމު ކަމުގައިވާ "ބާހޫބަލީ"ގެ ޝޫޓިންގެ ތެރެއިންނެވެ. ނަމަވެސް އޭނާ ސާޖަރީ ހެދުން ފަސް ކޮށްލީ ނުނިމި ހުރި މަސައްކަތްތައް ކުރުމަށެވެ. ކޯވިޑްގެ ބަލިމަޑުކަމާއެކު ފިލްމު ތަކުގެ މަސައްކަތް ލަސްވުމުން އޭނާގެ ކަކޫ އޮޕަރޭޝަން ކުރުން އިތުރަށް ލަސްވީއެވެ.
އެތައް ދުވަހަކު މަޑުކުރުމަށް ފަހު ޕްރަބާސް ކަކުލުގެ އޮޕަރޭޝަން ކުރީ އޭނާގެ އެންމެ ފަހުގެ ފިލްމް "ރާދޭ ޝިޔަމް" ރިލީޒް ކުރިފަހުންނެވެ.
