ބޮލީވުޑްގެ އެކްޓަރު އަކްޝޭ ކުމަރާކީ ކާމިޔާބު އެތައް ފިލްމު ތަކެއް ކުޅެފައިވާ އެކްޓަރެކެވެ. އަދި ހަމަ އެއާއި އެކުގައި އޭނާ އަކީ އެންމެ ބިޒީ އެއް އެކްޓަރުވެސް މެއެވެ.
މިއަހަރުގެ މިހާތަނަށް އަކްޝޭގެ 3 ފިލްމެއް ވަނީ ރިލީޒް ކޮށްފައެވެ. މިއީ އެހެން އެކްޓަރުންނާ އަޅައި ބަލާއިރު އަކްޝޭއަށް ކާމިޔާބެކެވެ. އަހަރު މެދަކާ ހަމައަށް ދިއަ އިރުވެސް އެންމެ ފިލްމްއެއް ވެސް ރިލީޒް ނުކުރެވި ތިބި އެތައް އެކްޓަރުންނެއް އެބަތިއްބެވެ.
އަކްޝޭ މިއަހަރު ފެށީ އޭނާގެ ފިލްމް "ބަޗަން ޕާންޑޭ" އިންނެވެ. އެއީ 24 މާރިޗުގައިއެވެ. ނަމަވެސް ފިލްމަށް ބޮކްސް އޮފީހުގައި މާބޮޑު ކާމިޔާބެއް ނުލިބުނެވެ. ނަމަވެސް ފިލްމަށް ވަނީ އުފެއްދުމަށް ދިއަ ހަރަދު ލިބިފައެވެ. މި ފިލްމާއި ވާދަކޮށް ކުޑަ ބަޖެޓަޖުން އުފެއްދި "ކަޝްމީރު ފައިލްސް" ވަނީ ބޮކްސް އޮފީހުގައި ބޮޑު ކާމިޔާބެއް ހޯދާފައެވެ.
އަކްޝޭގެ ދެވަނަ ފިލްމަކީ "ސަމްރާޓް ޕްރިތުވީރާޖް" އެވެ. ސެޕްޓެމްބަރު މަހުގެ 9 ވަނަ ދުވަހު ރިލީޒް ކުރި މި ފިލްމުގައި އަޅުވަން ޖެހުނީ ފްލޮޕް ބޯޑެވެ. މި ފިލްމަކީ ރީތީގެ ރާނީ މަނޫޝީ ޗިއްލަރު ބޮލިވުޑަށް ތައާރަފްވި ފިލްމު ވެސްމެެވެ. ނަމަވެސް ފިލްމަށް ކުރިމަތިވީ ބޮޑު ނާކާމިޔާބީ އަކާއެވެ.
އަކްޝޭގެ މި އަހަރުގެ ތިންވަނަ ފިލްމު މިހާރު އޮތީ ސިނަމާގައެވެ. އެއީ "ރަކްޝާ ބަންދަން"އެވެ. މި ފިލްމަކީ 4 ދައްތައިންގެ ވާހަކަ ކިޔައިދޭ ފެމެލީ ޑްރާމާއެކެވެ. މި ފިލްމު ރިލީޒް ކުރީ މިމަހުގެ 11 ވަނަ ދުވަހުއެވެ. ނަމަވެސް ފިލްމަށް މިހާތަނަށް ބޮކްސް އޮފީހުގައި ލިބެމުން އަންނަނީ ނާކާމިޔާބީއެވެ. ފިލްމު އޮތީ ސިނަމާތަކުން ނަގާ ހިސާބުގައެވެ. މިހާރު ވަނީ ފިލްމްގައި ފްލޮޕް ބޯޑު އަޅުވާފައެވެ.
މީގެ އިތުރުން މި ފިލްމު ވަނީ އާމިރު ޚާންގެ "ލާލް ސިންގް ޗައްޑާ" އާއި އެއްދުވަހެއްގައި ރިލީޒް ކުރުމުގެ ސަބަބުން ވަރަށް ބޮޑަށް އަސަރު ކޮށްފައެވެ. އާންމުކޮށް ބޮޑެތި ސްޓާރުންގެ ފިލްމުތަށް އެއް ދުވަހެއްގައި ރިލީޒް ކުރުމަކީ ކޮށްއުޅޭ ކަމެއް ނޫނެވެ. ނަމަވެސް މިދެ ފިލްމާކީ ވެސް ދެ ޖޯނަރާގެ ދެ ފިލްމު ކަމާށް ވުމުން އެއްވެސް އެކްޓަރަކު ފިލްމު ރިލިޒް ކުރާ ދުވަހަށް ބަދަލު ގެންނާކަށް ބޭނުން ނުވިއެވެ.
މި އަހަރުގެ މިހާތަނަށް އެންމެ ގިނަ ފިލްމު ބެލުންތެރިންނާ ހަމައަށް ގެނެސްދިން އެކްޓަރު އަކްޝޭގެ ރިލީޒް ކުރި ހުރިހާ ފިލްމެއް ހެން އަންނަނީ ފްލޮޕް ވަމުންނެވެ. ނަމަވެސް ކުރިއަށް ވެސް އަކްޝޭގެ ބައެއް ފިލްމްތައް އެބަހުއްޓެވެ. އެގޮތުން މިއަހަރު ރިލީޒް ކުރުމަށް ތާވަލް ކޮށްފައި އޮތް ދެ ފިލްމަކީ "ރާމް ސޭތު" އާއި "މިޝަން ސިންދްރެލާ" އެވެ.
