އިންޑިއާގެ މަޝްހޫރު ސްޓޭންޑަޕް ކޮމޭޑީއަން ރާޖޫ ސްރިވަސްތަވް ހާލު ދެރަވެ އައިސީޔޫގައި ފަރުވާ ދެމުން އަންނަ ކަމަށް ޚަބަރުތައް ބުނެފިއެވެ.
58 އަހަރުގެ ރާޖޫއަށް ފަރުވާ ދެމުން އަންނަނީ އެއިމްސް ހޮސްޕިޓަލުގައެވެ. އަދި އޭނާ އޮތީ ވެންޓިލޭޓަރުގައި ކަމަށާއި ހާލު ސީރިއަސް ކަމަށް ރިޕޯޓްތައް ބުނެއެވެ.
މިދިއަ ބުދަދުވަހު ރާޖޫ ހޮސްޕިޓަލަށް ގެންދިއައީ ހާޓް އެޓޭކެއް ޖެހިގެންނެވެ. އޭނާއަށް ހާޓް އެޓޭކް ޖެހުނީ ޖިމެއްގައި ކަސްރަތު ކުރަން ހުއްޓައެވެ.
ހޮސްޕިޓަލުން މިހާރު އުންމީދު ކަނޑާލައިފާވާ ކަމަށް އޭނާގެ މެނޭޖަރާ ހަވާލާދީ އީޓައިމްސްގައި ރިޕޯޓްކުރި ނަމަވެސް އާއިލާ އިން ބުނަނީ އޭނާގެ ހާލު ރަނގަޅު ވަމުން އަންނަ ކަމަށެވެ. އަދި ހެޔޮ ދުޢާ ކޮށްދިނުމަށް އާއިލާ އިން ވަނީ އެދިފައެވެ.
ބައެއް ފިލްމު ތަކުންވެސް މަޖާ ރޯލުތަކުން ފެނިފައިވާ ރާޖޫ ވަނީ އިންޑިއާގެ މަޝްހޫރު ކޮމެޑީ ޝޯ ތަކުން ފެނިގެން ގޮސްފައެވެ. އޭގެތެރޭގައި މިހާރު އިންޑިއާގެ އެންމެ މަގުބޫލު "ދަ ކަޕިލް ޝަރްމާ ޝޯ" ވެސް ހިމެނެއެވެ.
