އެމްޑީޕީގެ ޗެއަރޕާސަން އަދި އިކޮނޮމިކް މިނިސްޓަރ ފައްޔާޟް އިސްމާޢީލާއި އިދިކޮޅަށް މަސައްކަތް ކުރެއްވުމަކީ ކުރެވުނު ގޯސްކަމެއްކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޗެއަރޕާސަން އިންތިޚާބުގެ ވާދަވެރިން ބޮޑުވީ ރައީސް ނަޝިދު އިމްތިޔާޒް ފަހުމީއަށް ތަޢީދުކުރެއްމުންނެވެ. ރައީސް އިބްރާހީމް މުޙައްމަދު ޞާލިޙް ތަޢީދުކުރެއްވީ މިނިސްޓަރ ފައްޔާމްއަށެވެ.
އެމްޑީޕީ ޤައުމީ މަޖިލީހުގެ ވަޓްސްއަޕް ގްރޫޕަށް ރައީސް ނަޝީދު ކުރުރެއްވި މެސެޖުގައި ވިދާޅުވި، ފައްޔާޟްއާއި އިދކޮޅަށް ދެން ނާރުއްވާނެކަމަށާއި، އެކުގައި ކުރިއަށް ވަޑައިގަންނަވާނެކަމަށެވެ. ފައްޔާޟްއާއި ދެކޮޅަށް ނުކުތުން ނަޝީދު ވަނީ ހެންވޭރު ދެކުނު ދާއިރާގެ މެންބަރު ޙުސައިން ޝަހީމް (އަނދުން ޙުސައިން)ގެ އިސްތަށިފުލުގައި އަރުއްވާފައެވެ. ނަޝީދު ވިދާޅުވީ އެއްފަހަރު ހުސައިން ނަޝިދު ލައްވާ އެކަން ކުރުވިކަމަށާއި، އެއީ ކުރެވުނު ގޯސްކަމެއްކަމަށެވެ.
އެއް ފަހަރު ހުސެއިން [އަންދުން ޙުސައިން] އަޅުގަނޑު ލައްވާ އެކަން ކުރުވި. އެއީ އަޅުގަނޑަށް ކުރެވުނު ގޯސް ކަމެއް,
– ނަޝީދު ވިދާޅުވިއެވެ.
ނަޝީދު މިހެން ވިދާޅުވީ އަނދުން ހުސައިން ކުރެއްވި ޝަކުވާއަކާއި ގުޅިގެންނެވެ. އެއީ ރާއްޖޭގައި އޮތް ވެރިކަމުގެ ނިޒާމު ބަދަލުކުރަން ފެންނަ، ނުފެންނަ ވޯޓެއް އެހުމަށް ގޮވާލައްވައި އެމްޑީޕީގެ ރައީސް މުހައްމަދު ނަޝީދު، އެޕާޓީގެ ކޮންގްރެސް އަށް ހުށަހަޅާފައިވާ ޤަރާރާއި، އަދި ބަރުލަމާނީ ކެމްޕެއިންގެ މަސައްކަތުގެ ކެމްޕެއިން މެނޭޖަރަކަށް، އެޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލްގެ ކެމްޕެއިން މޭނޭޖަރުކަން ކުރެއްވި އިބްރާހިމް ވަހީދު ހަމަޖެއްސެވުމުންނެވެ.
ކޮންގްރެސްގެ ކަންކަމުގައި އިސްކޮށް، ކޮންގްރެސްއަށް ހުށަހެޅޭ އެންމެ ހައްސާސް ކަމެއް ހަވާލުވެ އެކަމުގައި ކެމްޕޭން މެނޭޖަރަކަށް ހުރުމަކީ ހުތުރުކަމެއް. އަދި މަސްލަހަތު ގެއްލި ރައީސް ނަޝީދު ހުށަހަޅުއްވާފައިވާ ގަރާރު ނުވަތަ ހުށަހެޅުމަށް ވެސް ބައެއްގެ ނުރުހުން ވެސް އަދި ބަޔަކަށް އެކަން އޮޅެންވެސް މަގު ފަހިވެދާނެ ކަމެއް ކަމުގައި އަޅުގަނޑު ދެކެނީ….
– އަނދުން ޙުސައިން ވިދާޅުވިއެވެ.
ނަޝީދުގެ ވިސްނުންފުޅު ބަދަލުވެ ފައްޔާޒާއި އެކު މަސައްކަތްކުރެއްވުމަށް ބޭނުންވާކަމަށް ހާމަކުރައްވާފައި މިވަނީ މީގެ ކުރިން ފައްޔާޟަށް ބޮޑެތި ފަޑުކިޔުންތަކެއް އަމާޒުކުރެއްވުމަށްފަހުއެވެ. ނަޝީދު ވިދާޅުވީ އެމްޑީޕީގެ އެތެރޭގައި ބްރޯ ހެދިގެން ފައްޔާޟް އުލުއްވާކަމަށެވެ. ނަޝިދުގެ ފެކްޝަނުން ވަނީ ފައްޔާޟް މަޤާމުން ވަކިކުރެއްވުމުގެ މަސައްކަތްވެސް ކުރައްވާފައެވެ.
ނަޝީދު ކުރެއްވި މެސެޖްގައި ވިދާޅުވީ، ބަރުލަމާނީ ނިޒާމް ކެމްޕެއިން މެނޭޖަރަކަށް އިބްރާހިމް ވަހީދު ހަމަޖައްސަވާފައިވާ ކަމަށެވެ. އަދި އެއީ މާ ކުރިން ނިންމާފައި އޮތް ނިންމުމެއް ކަމަށްވެސް އެމަނިކުފާނު ވިދާޅުވިއެވެ. ނަޝީދުގެ އެ މެސެޖަށް ޖަވާބު ދެއްވައި އިބްރާހިމް ވަހީދު ވިދާޅުވީ، އޭނާއަކީ ބުނާ ބަހެއްގައި ހިފަހައްޓާ މީހެއް ކަމަށެވެ. އެއާ އެކު ނަޝީދު ވިދާޅުވީ އެކަން އެމަނިކުފާނަށް އެނގިވަޑައިގަންނާވާ ކަމަށެވެ.
ނަޝީދުގެ ބަރުލަމާނީ ކެމްޕެއިނާއި ވަހީދު ހަވާލިވިއިރު ވަހީދަކީ ނިމިދިޔަ އެމްޑީޕީގެ އެންމެ ވާދަވެރި އެތެރޭގެ އިންތިޚާބުގައި ރައީސް ނަޝީދާއި ދެކޮޅަށް މަސައްކަތް ކުރެއްވި ބޭފުޅެކެވެ. ނަމަވެސް ވަހީދަކީ އަބަދުވެސް ބަރުލަމާނީ ނިޒާމަށް ތާއީދުކުރާ، އަދި ނިމިދިޔަ ކެމްޕެއިންގައިވެސް ބަރުލަމާނީއަށް ތާއީދު ކުރާކަން ވިދާޅުވެފައިވާ ބޭފުޅެކެވެ.
