މިއަހަރުގެ ސެޕްޓެމްބަރުމަހު އޮންނަ އދ.ގެ އާންމު މަޖިލިުހުގެ ޖަޕްސާގައި ރަޝިއާގެ ރައީސް ލާޑިމިރު ޕުޓިން ބައިވެރިވެ ވަޑައި ނުގަންނަވާނޭކަން ރަޝިއާއިން ހާމަ ކޮށްފިއެވެ.
ރަޝިއާގެ ސަރުކާރުގެ ރަސްމީ ނޫސް އޭޖެންސީ TASS އަށް މައުލޫމާތު ދެއްވަމުން ކްރެމްލިންގެ ތަރުޖަމާން ޑިމްޓްރީ ޕެސްކޯވް ވިދާޅުވެފައިވާ ގޮތުގައި "ޕުޓިން ދަތުރެއްވެސް އަދި ތަގުރީރެއްވެސް ހަމަޖެހިފައި ނުވާ" ކަމުގައެވެ.
އޭނާ ވިދާޅުވެފައިވާ ގޮތުގައި، ރައީސް ޕުޓިންގެ އިތުރުން، މިއަހަރުގެ ސެޕްޓެމްބަރުމަހު އޮންނަ ޔޫއެންޖީއޭގެ ބައްދަލުވުމަށް ވަފުދަކާއެކީ ވަޑައިގެންނަވާނީ ރަޝިއާގެ ފޮރިންގ މިނިސްޓަރ ސާގޭ ލާވްރޯވްއެވެ.
ޔޫއެންގެ ޖެނެރަލް އެސެމްބްލީގެ 77 ވަނަ އާންމު ޖަލްސާ މިއަހަރު ފެށުމަށް ހަމަޖެހިފައިވަނީ އަންނަ ސެޕްޓެމްބަރުމަހުގެ 13ވަނަ ދުވަހުއެވެ. މި ޖަލްސާގައި ދުނިޔޭގެ 193 ގައުމެއްގެ އެންމެ އިސްވެރީން ބައިވެރިވެ ވަޑައިގެން ތަގުރީރު ކުރައްވާނެއެވެ.
މިޖަލްސާއާއެކީ، ޔޫއެންޖީއޭގެ ރައީސްކަމުގައި މިހާރު ހުންނެވި ރާއްޖޭގެ ފޮރިންގ މިނިސްޓަރު ޝާހިދުގެ ރައީސްކަމުގެ ދައުރު ހަމަވެގެން ދާނެއެވެ.
