އެމްއެމްޕީއާރުސީ ޚިޔާނާތުގެ ހުރިހާކަމެއް ހިންގާފައިވަނީ ކުރީގެ ރައީސް ޔާމީން އިސްކޮށް ހުންވައިގެން ކަމަށް ދިއްގަރު ދާއިރާގެ ކުރީގެ މެމްމަބަރު އަހުމަދު ނާޒިމް ވިދާޅުވެއްޖެއެވެ.

ވ. އާ ރަށް ކުއްޔަށް ދިނުމުގައި ޔާމީން ރިޝްވަތު ނެންނެގި ކަމަށް ބުނެ ދައުލަތުން ކުރާ ދައުވާގައި ޔާމީނާ ދެކޮޅު ހެއްކެއްގެ ގޮތުގައި ދައުލަތުން ނާޒިމްގެ ނަން ހުށަހެޅުމުން ޔާމީނާ ދެކޮޅަށް ހެކިބަސް ދެއްވަން ނާޒިމް ހުންނެވީ ކޯޓުގައެވެ. ޝަރީއަތް ކުރިއަށް ގެންދާ ކޯޓު ރޫމުގެ މެދުގައި ހުރި ބެންޗުގައި ޔާމީން އިންނެވިއެވެ. ބެންޗުގައި އެއް ފަރާތުގައި ބަހައްޓާފައި ހުރި މޭޒު ކައިރީގައި ހުންނެވީ ނާޒިމެވެ.

ކްރިމިނަލް ކޯޓުގައި މިއަދު ހެކިބަސް ދެއްވަމުން ނާޒިމް ވިދާޅުވީ 2013 ވަނަ އަހަރު ރިޔާސީ އިންތިހާބުގެ ކެމްޕޭނަށް އެންމެ ގިނައިން ފައިސާ ހޯދާފައިވަނީ ކުރީގެ ނައިބް ރައީސް އަހްމަދު އަދީބު ކަމަށެވެ. އެ ފައިސާ އަދީބު ހޯއްދެވީ ވިޔަފާރިވެރިންގެ އަތުން ޔާމީންގެ ނަން ބޭނުންކުރައްވައިގެން ދަރަންޏަށް ކަމަށެވެ. އަދީބުގެ އިތުރުން ކުރީގެ ޓޫރިޒަމް މިނިސްޓަރު މޫސާ ޒަމީރު އަދި ޔާމީންގެ ޅިޔަނެއް ވެސް ކެމްޕޭނަށް ފައިސާ ހޯއްދެވި ކަމަށް އޭނާ ވިދާޅުވި އެވެ.

ކެމްޕޭނު ދުވަސްވަރު ޔާމީންގެ އޭރުގެ ގެކޮޅު، ގ. ދޫވެހީގައި ނާޒިމު އިންނަވަނިކޮށް ކަޅު ދަބަހެއްގައި އަދީބު ނަގުދު ފައިސާ ހިފައިގެން އައި ކަމަށާއި އެ ދަބަހުގައި 15 މިލިއަން ރުފިޔާ ހުންނާނެ ކަމަށް އަދީބު ވިދާޅުވެފައިވާ ކަމަށް ނާޒިމް ވިދާޅުވިއެވެ.

ޔާމީން ވެރިކަމަށް ވަޑައިގެންނެވިތާ އެންމެ ކުރީކޮޅު އެ ދަރަނިތައް އަދާކުރެއްވުމަށް އެންމެ ފުރަތަމަ އަދީބު ފައިސާ ނެންގެވީ މޯލްޑިވްސް ޕޯސްޓް ލިމިޓެޑް (އެމްޕީއެލް) އިން ކަމަށް ނާޒިމް ވިދާޅުވި އެވެ. އެގޮތުން އެމްޕީއެލްގެ ބޯޑު މެމްބަރުންނަށް "ބުލީ" ކުރައްވައިގެން ފަސް މިލިއަން ޑޮލަރަށްވާ ވަރަށް އަދީބު ފައިސާ ނަންގަވާފައިވާ ކަމަށާއި އެ ފައިސާ ޖަމާކުރައްވާފައިވަނީ ކެމްޕޭނަށް އަދީބަށް ފައިސާ ދިން ވިޔަފާރިވެރިޔާގެ އެކައުންޓަށް ކަމަށް ވެސް ނާޒިމް ވިދާޅުވި އެވެ. އެފައިސާ އަދީބު ނެންގެވީ އެއަށް ވާވަރަށް އަނބުރާ ޑޮލަރު ދައްކާ ގޮތަށް ކަމަށެވެ.

އެމްޕީއެލް އިން އަދީބު ފައިސާ ނެންގެވިކަން އެނގިވަޑައިގެންނެވި ހިސާބުން ލިޔެކިޔުންތަކާ އެކީ ޔާމީން އަރިހަށް، ރައީސް އޮފީހަށް ވަޑައިގެން އެ މައުލޫމާތު ހިއްސާކުރެއްވި ކަމަށްވެސް ނާޒިމް މިއަދު ވިދާޅުވިއެވެ. އަދީބު ނެންގެވި ހުރިހާ ފައިސާއެއް އެމަނިކުފާނަށް ލިބިވަޑައިގަންނަވާ ކަމަށާއި އެކަމަކު އެމްޕީއެލް އިން ނެންގެވި ކަމަށް ބުނާ ފައިސާ ލިބިވަޑައިނުގަންނަވާ ކަމަށް އެދުވަހު ޔާމީން ވިދާޅުވި ކަމަށް ނާޒިމް ވިދާޅުވިއެވެ.

އޭނާ ވިދާޅުވީ އެ މައުލޫމާތުތައް އޮޑިޓާ ޖެނެރަލްއާ ވެސް ހިއްސާކުރެއްވި ކަމަށާއި އެކަމާ ގުޅިގެން އަޅަންޖެހޭ ފިޔަވަޅުތައް އަޅައި އޮޑިޓާ ޖެނެރަލް ރިޕޯޓެއް ވެސް ނެރުއްވި ކަމަށެވެ.

އެމްއެމްޕީއާރްސީ ހިޔާނާތަކީ ޔާމީންގެ މޭސްތިރިކަމުގެ ދަށުން ހިނގައި ދިޔަކަމެއް. އެދުވަހު އަޅުގަނޑު އެމްޕީއެލް ކަންތައްތައް ސަމާލުކަމަށް ގެނައުމުން (ރައީސް ޔާމީން) ފިޔަވަޅު އެޅުއްވިނަމަ ފަހަތުން ހިނގައި ދިޔަ ކަންތަކެއް ނުހިނގާނެ. އެމްއެމްޕީއާރްސީ ހިޔާނާތް އުފަންވީ އެމްޕީއެލްއާ ހިސާބުން.

– ނާޒިމް ވިދާޅުވިއެވެ.

ޔާމީނާ ހަވާލާ ދެއްވައި ނާޒިމް ވިދާޅުވީ، އަދީބު އެކި ވިޔަފާރިވެރިންގެ އަތުން ފައިސާ ނަންގަވަނީ ޔާމީން ވިދާޅުވެގެން ކަމަށެވެ. ނަމަވެސް އެމްޕީއެލް އިން ފަސް މިލިއަން ޑޮލަރު ނެގި ކަން އެނގިވަޑައިނުގަންނަވާ ކަމަށް ރައީސް އޮފީހުގައި އޮތް ބައްދަލުވުމުގައި ޔާމީން ވިދާޅުވި ކަމަށެވެ.

އެ ދުވަހު އަޅުގަނޑުގެ ބަސް ގަބޫލު ކުރައްވައި އަޅުއްވަން ޖެހޭ ފިޔަވަޅުތައް އެޅުއްވި ނަމަ އެމްއެމްޕީއާރުސީގެ މުޅި މައްސަލަ 70 މިލިއަން ޑޮލަރުގެ ހިޔާނާތަކަށް ވެގެން ނުދިޔައީސް.

– ނާޒިމް ވިދާޅުވިއެވެ.

ޔާމީންގެ ވެރިކަމުގައި ނާޒިމަށް ބޮޑު އަދަބެއް ލިބުނު ފަހުން، ދެ ބޭފުޅުންގެ މެދުގައި އެއްވެސް ކަހަލަ ގުޅުމެއް ނެތެވެ. ސިޔާސީ ގޮތުން ވެސް އަދި ރައްޓެހިކަމުގެ ގޮތުން ވެސް ތިބީ ދުރުގަ އެވެ. ޔާމީނާއި ނާޒިމާ އެންމެ ފަހުން ބައްދަލުވީ އެމްޕީއެލްގެ ފަސް މިލިއަން ޑޮލަރުގެ މައްސަލަ ޔާމީނަށް ހުށަހަޅުއްވަން އޭޕްރީލް 28، 2015 ގައި ރައީސް އޮފީހުގަ އެވެ. އޭގެ ފަހުން ދެން މި ފެނުނީ މިއަދު ޔާމީނާ ދެކޮޅަށް ހެކިބަސް ދެއްވަން ކްރިމިނަލް ކޯޓުންނެވެ.