އިސްރާއީލުން ފަލަސްތީނުގެ ގާޒާއަށް އުދުވާނީ ހަމަލާ ދެމުންދާދާ ދެދުވަސް ފާއިތުވެފައި ވަނިކޮށް، މިސްރުން މެދުވެރިވެގެން ހަމަލާ ބަދަލުކުރުން ހުއްޓާލުމަށް އެއްބަސްވެފައިވާކަމަށް، ބައިނަލްއަގުވާމީ މީޑިއާތަކުން ރިޕޯޓު ކޮށްފިއެވެ.
މިހަފްތާ ބަންދުގައި އިސްރާއީލުން ގާޒާއަށް ހަމަލާ ދޭން ފެށުމާއި ގުޅިގެން ފަލަސްތީނުގެ މިނިވަންކަމަށް ހަނގުރާމަކުރަމުންދާ އިސްލާމިކް ޖިހާދު ޖަމާއަތުންވަނީ އިސްރާއީލުގެ ސިޓިތަކަށް އަމާޒުކޮށް ރޮކެޓް ހަމަދާ ދޭން ފަށާފައެވެ.
އިސްރާއިލުން މެދުނުކެޑި ދެ ދުވަސް ވަންދެން ގާޒާއަށް ދީފައިވާ ހަމަލާތަކުގައި އިސްލާމިކް ޖިހާދު ޖަމާއަތުގެ އިސް ދެ ކޮމާންޑަރަކު ޝަހީދުވެފައި ވާއިރު، ފަލަސްތީނުގެ ޖުމްލަ 29 މީހަކު ވަނީ ޝަހީދުވެފައެވެ. މީގެ ތެރޭގައި 6 ކުޑަކުދިންވެސް ހިމެނެއެވެ.
މަސްދަރުތަކާއި ހަވާލާދީ ބައިނަލްއަގުވާމީ މީޑިއާތަކުން ރިޕޯޓު ކޮށްފައި ވާގޮތުގައި މިސްރުން އެހީތެރިވެދީގެން އެކުލަވާލި ސުލްހައިގެ އެއްބަސްވުމުގައި ވާގޮތުން ދެފަރާތުންވެސް ހަމަލާ ބަދަލުކުރުން ހުއްޓާލުމަށް އެއްބަސްވެފައިވަނީ އާދީއްތަ ދުވަހުގެ ރޭގަޑު 20:00 އިން ފެށިގެންނެވެ.
އިސްރާއީލާއި އިސްލާމިކް ޖިހާދު ޖަމާއަތުގެ ތަރުޖަމާނުން މިކަން ޔަގީން ކޮށްދީފައި ނުވިނަމަވެސް ވިދާޅުވެފައިވަނީ ދެފަރާތުން މިސްރާއި ވާހަކަ ދައްކަމުން ދާކަމުގައެވެ.
އިސްރާއީލާ ފަލަސްތީނުގެ ހަގުރާމަވެރި ޖަމާއަތްތަކާ ދެމެދު އަލުން ވަރުގަދަ ކުރިމަތިލުންތަކެއް އުފެދިގެން ހިގައިދާނެތީ ދުނިޔޭގެ ގައުމުތަކުންވަނީ ކަންބޮޑުވުން ފާޅު ކޮށްފައެވެ. އެހެންނަމަވެސް، އިސްލާމިކް ޖިހާދު ޖަމާއަތަށްވުރެ ވަރުގަދަ ހަމާސް ޖަމާއަތުން މިފަހަރުގެ މިހަމަ ނުޖެހުމުގެ ތެރެއަށް އައިސްފައި ނުވާތީ މިހަމަނުޖެހުން އިތުރަށް ހޫނުވެގެން ގޮސްފައެއް ނުވެއެވެ.
އިސްރާއީލުން ގާޒާއަށް ދޭންފެށި ހަމަލާތަކުގެ ބަދަލު ހިފުމުގެ ގޮތުން އިސްލާމިކް ޖިހާދު ޖަމާއަތުންވަނީ އާދީއްތަ ދުވަހު ހެދުނުން ފެށިގެން އިސްރާއީލުން ހިފާފައިވާ ޖެރޫސެލަމްއަށްވެސް މިސައިލް ހަމަލާތައް އަމާޒު ކޮށްފައެވެ.
އިސްރާއީލުން ބުނެފައިވަނީ އިސްލާމިކް ޖިހާދުގެ ގިނަ މިސައިލްތައް އެގައުމުން ގާއިމް ކޮށްފައިވާ އަޔަން ޑޯމް ޑިފެންސް އިންޓަރސެޕްޓަރއިން ވައްޓާލާފައި ވާކަމުގައެވެ.
އެހެންނަމަވެސް އިސްލާމިކް ޖިހާދުގެ މިސައިލްތައް އަމާޒު ވުމުގެ ސަބަބުން އިސްރާއީލުގެ ދެކުނުގެ ބޮޑު ސަހަރައްދަކުން ވަނީ މީހުން ހުސްކުރަން ޖެހިފައެވެ. އަދި މިމީހުންވަނީ ވެރިރަށް ޓެލްއަވީވްއާއި އަޝްކެލޮންއަށް ގޮސް ބިންގަރާސްތަކުގައި ހިމާޔަތް ހޯދާފައެވެ.
އިސްލާމިކް ޖިހާދު ޖަމާއަތުންވަނީ އިސްރާއީލުގެ ވެރިރަށް ޓެލްއަވީވްއަށްވެސް ހަމަލާ ދޭނެކަމުގެ އިންޒާރު ދީފައެވެ.
